الداعى ۋاقىتتا استانا قالاسىندا تىركەۋگە تۇرۋ قيىنداۋى مۇمكىن. قۇقىق قورعاۋ ورگاندارى استانا پاتەرلەرىندە 15 شارشى مەترگە 1 ادامنىڭ عانا رەسمي تىركەلۋىنە رۇقسات بەرۋ ماسەلەسىن كوتەرىپ جاتىر. استانا قالالىق كوشى-قون پوليتسياسى باسقارماسى مۇنداي قادامعا ىشكى ميگراتسيا مەن قالا قاۋىپسىزدىگى ءۇشىن بارىپ وتىر.
«تىركەۋگە تۇرۋ ءۇشىن ءار ادام باسىنا 15 شارشى مەتر دەگەن تالاپ قويىپ وتىرمىز. قازىرگى تاڭدا اكىمدىككە ارنايى ۇسىنىس بەردىك. قارالىپ جاتىر. جاقىن ارادا شەشىم شىعۋى ءتيىس» دەپ ءمالىم ەتتى استانا قالالىق كوشى-قون پوليتسياسى باسقارماسى باسشىسىنىڭ ورىنباسارى ەركىن شومبينوۆ.
وسى ورايدا ىشكى ىستەر ءمينيسترى قالمۇحانبەت قاسىموۆ باس قالامىزدا تىركەۋگە تۇرۋ جۇيەسىنىڭ بەتىمەن كەتكەنىن, كەيبىر پىسىقايلاردىڭ ونى بيزنەسكە اينالدىرىپ جاتقانىن ايتقان بولاتىن. «بۇگىندە استانادا «رەزەڭكە پاتەرلەر» قاپتاپ كەتتى. ءبىر ۇيگە جۇزدەگەن ادامدار تىركەلگەن دەگەن دەرەك بار. وسىنىڭ ءبارىن تەكسەرىپ, ءبىر جۇيەگە كەلتىرۋ كەرەك» دەدى مينيستر.
استانا قالاسى ەلدىڭ ورتالىعى بولعان سوڭ مۇندا كەلۋشىلەر سانى ارتا تۇسۋدە. جۇمىس ىزدەپ, ءبىلىم الۋعا كەلەتىندەردىڭ ءبارى بىردەي باسپانامەن قامتىلمايتىنى انىق. ال تىركەۋسىز ەشكىم جۇمىسقا دا, وقۋعا دا قابىلدانبايدى. سوندىقتان دا تىركەۋ ءىسى «كولەڭكەلى بيزنەسكە» اينالىپ كەتكەن.
وسى جاعدايعا بايلانىستى كوشى-قون پوليتسياسىنىڭ ماماندارى تەكسەرۋ بارىسىندا استاناداعى ءبىر پاتەردە 140 ادام تىركەلگەنىن انىقتادى. جالپى, بۇگىندە استانادا رەسمي 857 480 ادام تىركەۋدە تۇر. قازىر 15 شارشى مەترگە 1 ادامدى تىركەۋ تالابى الماتىدا عانا بار. ەندى, وسىنداي ەرەجە استانا قالاسىندا دا بولۋى مۇمكىن.
بۇركىت نۇراسىل
