قازاقستاندا 40 مىڭ ادام ەلەكتروندىق تىركەۋ ارقىلى قايتىس بولعاننان كەيىن دونور بولۋعا تىركەلگەنمەن, سونىڭ 15 پايىزى عانا بۇعان ناقتى كەلىسكەن. جالپى ءمايىتتىڭ اعزاسىن الۋ تۋرالى زاڭنىڭ قولداۋ تابۋى قازىرگى تاڭدا قوعامدا ءتۇرلى پىكىر تۋدىرۋدا. وسى دەمالىس الدىندا ەلىمىزدە ءبىر ازاماتتىڭ باس ميى ولىمىنە بايلانىستى ونىڭ تۋىستارى مايىتتىك دونورلىققا رۇقسات بەرىپ, استانا ترانسپلانتولوگتارى سونىڭ ارقاسىندا 3 ناۋقاستىڭ ءومىرىن امان الىپ قالدى.
ۇلتتىق عىلىمي ونكولوگيا ورتالىعى مەن استانا قالاسىنىڭ كارديوحيرۋرگيا ورتالىعىنىڭ ترانسپلانتولوگتارى, كارديوحيرۋرگتارى, انەستەزيولوگتارى مەن مەيىرگەرلەرىنەن قۇرالعان جوعارى بىلىكتى دارىگەرلەر توبى ساناۆياتسيا بورتى ارقىلى پاۆلودار وبلىسىنا باردى. باس مي اۋرۋىنان كوز جۇمعان مارقۇمنىڭ تۋىستارى ونىڭ مايىتتىك دونور بولۋىنا كەلىسىم بەرگەن. سونىڭ ارقاسىندا ەلدىڭ ءار تۇكپىرىنەن كەلگەن ءۇش پاتسيەنتكە ەلوردالىق ترانسپلانتولوگتار ءبىر اعزا دونورىنىڭ ەكى بۇيرەگى مەن جۇرەگىن اۋىستىرىپ سالدى.
وسى ارالىقتا استانا قالاسىندا كۇتۋ پاراعىندا تۇرعان, باعدارلاما ارقىلى ىرىكتەلگەن رەتسيپيەنتتەر قوسىمشا تالداۋ تاپسىرۋ ءۇشىن شاقىرىلدى. مەديتسينالىق زەرتتەپ-قاراۋ جۇمىستارىنان سوڭ جانە كوميسسيانىڭ شەشىمى بويىنشا 26 جاستاعى رەتسيپيەنت انىقتالدى. ول بۇيرەكتىڭ V تەرمينالدى ساتىسى دياگنوزىمەن 6 جىل بويى گەمودياليزدە بولعان. استانا قالاسىنداعى ۇلتتىق عىلىمي ونكولوگيا ورتالىعىندا دارىگەرلەر ەرەسەك پاتسيەنتكە كاداۆەرلىك بۇيرەكتى ترانسپلانتتاۋ وتاسىن ءساتتى جۇرگىزدى. رەتسيپيەنت پالاتاعا اۋىستىرىلدى, بۇگىندە ونىڭ جاعدايى جاقسى. بۇيرەك تولىق جۇمىس ىستەپ تۇر. ەكىنشى بۇيرەك استاناداعى انا مەن بالا ورتالىعىندا بالاعا سالىندى. ءۇشىنشى اعزا – جۇرەكتى ترانسپلانتتاۋ كارديوحيرۋرگيا ورتالىعىندا جۇرگىزىلدى.
– ءبىزدىڭ ورتالىقتا جىل باسىنان باستاپ 11 ناۋرىزعا دەيىن 16 بۇيرەك ترانسپلانتاتسياسى جاسالدى. سونىڭ ىشىندە 4-ەۋى مايىتتىك دونوردان الىنسا, 12-ءسى – تۋىستىق بۇيرەك ترانسپلانتاتسياسى. ودان بولەك, 1 مايىتتىك جانە 1 تۋىستىق باۋىر ترانسپلانتاتسياسىن جاسادىق. ال 6 ناۋرىزدا پاۆلودار وبلىستىق كارديوحيرۋرگيا ورتالىعىندا باس مي ءولىمى تىركەلگەن دونور انىقتالدى, ونىڭ تۋىسقاندارى اعزا الۋعا رۇقسات بەردى. ترانسپلانتاتسيا ۇيلەستىرۋ ورتالىعى جانە ساناۆياتسيامەن بىرلەسە وتىرىپ, ءبىر بريگادا سول جاققا ۇشىپ بارىپ, ول جاقتا اعزا الۋ وتاسىن جاسادى. ەكىنشى بريگادا ءبىزدىڭ استاناداعى ورتالىقتا مۇقتاج ناۋقاستاردى تولىق تەكسەرۋدەن وتكىزىپ, وتاعا دايىندادى. جالپى وتالار ءساتتى ءوتتى, بۇگىندە اعزا سالىنعان ناۋقاستاردىڭ جاعدايى جاقسى, – دەيدى استانا ترانسپلانتاتسيالاۋ ورتالىعى اعزا ترانسپلانتتاۋ سەكتورىنىڭ مەڭگەرۋشىسى, دارىگەر ونكولوگ, ۋرولوگ, حيرۋرگ مەلس اسىقباەۆ.
ەلىمىزدە بۇگىندە اعزاسىن اۋىستىرۋعا بولادى دەگەن 4 مىڭعا جۋىق ادام بار. مۇقتاج جانداردىڭ ىشىندە 70 پايىزى بۇيرەككە ءزارۋ. نەگىزىندە, 1 ءمايىت 5 ادامنىڭ ءومىرىن قۇتقارادى. ەگەر قايتىس بولعان ادامنىڭ اعزالارىنا زاقىم كەلمەسە, وندا ونىڭ جۇرەگى, وكپەسى, بۇيرەگى, باۋىرى, ءتىپتى كوزىنىڭ ءمولدىر قابىعى الىنادى. زاڭ بويىنشا كوپ ەلدە دارىگەرلەر رۇقساتسىز جارامدى اعزانى الا بەرەدى. الايدا قايتىس بولعان ادامداردىڭ بارلىعى دونور بولا المايدى. ءتىرى كەزىندە سوزىلمالى اۋرۋى بولعان ادامنىڭ اعزاسى جارامسىز كەلەدى. ادام ولگەننەن كەيىن جۇرەككە 2 ساعات ىشىندە, باۋىر مەن بۇيرەككە 12 ساعات ىشىندە ترانسپلانتاتسيا جاساۋ كەرەك. مىسالى, قايتىس بولعان ادام اعزاسى 10 ادامعا جاراۋى مۇمكىن. مۇندايدا دونور ورنالاسقان قالاعا جاقىن ادام شاقىرىلىپ, وتا جاسالادى. وتا نەعۇرلىم تەز ءارى ءساتتى جاسالسا, اعزانىڭ جۇمىس ىستەۋ فۋنكتسياسى جاقسىراق بولادى.
