بۇرىن ەلوردا تۇرعىندارى قولدارىنا بىرنەشە تۇبىرتەكتى سامساتىپ ۇستاپ الىپ, كوممۋنالدىق قىزمەت اقىسىن تولەپ ءجۇرۋشى ەدى. 2008 جىلى بىرىڭعاي ەسەپتەۋ ورتالىعى جۇمىسقا كىرىسكەلى قالالىقتار گاز بەن جارىقتىڭ تولەمىنەن باسقاسىنىڭ ءبارىن ءبىر تۇبىرتەكپەن تولەيتىن بولدى. الايدا وسى بىرىڭعاي قىزمەت ءتۇرى توڭىرەگىندە جۇرتشىلىقتى تولعاندىرعان ماسەلە از ەمەس. وسى جونىندە «استانا-بىرىڭعاي ەسەپتەۋ ورتالىعى» جشس باس ديرەكتورىنىڭ ورىنباسارى تيمۋر ەسەنگەلدينمەن اڭگىمەلەسكەن ەدىك.
مۇنداي تاجىريبە استانادا عانا بار
–تيمۋر ءبىتىمبايۇلى, كوممۋنالدىق قىزمەتتەردىڭ تولەمىن ءبىر تۇبىرتەككە بىرىكتىرۋ تاجىريبەسى استانادا عانا بار دەپ ەستيمىز. تۇتىنۋشىلارعا كورسەتىلەتىن قىزمەت ساپاسىن ارتتىرۋ ماقساتىندا 2008 جىلى قۇرىلعان بىرىڭعاي ەسەپتەۋ ورتالىعى بەس جىل ىشىندە ءوزىن قانشالىقتى اقتادى؟ ساپانى جاقسارتۋعا ۇلەسىن قوسا الدى ما؟
– بىرىڭعاي ەسەپتەۋ ورتالىعىنىڭ باستى ماقساتى – بىرىڭعاي ابونەنتتىك جانە باقىلاۋ قىزمەتىن ورناتۋ, كوممۋنالدىق قىزمەتتەردىڭ بارلىعىن ءبىر تۇبىرتىككە ەنگىزۋ ارقىلى تۇرعىندارعا ىڭعايلى جاعداي جاساۋ. ورتالىق بەس جىل ىشىندە اجەپتاۋىر تاجىريبە جيناقتاپ ۇلگەردى. بۇگىندە ەلىمىزدىڭ وزگە وڭىرلەرىنەن ارنايى ات ءىزىن سالىپ, ورتالىقتىڭ جۇمىسىمەن تانىسقىسى كەلەتىندەر كوپ. مۇنىڭ ءوزى قىزمەتىمىزدىڭ حالىققا ءتيىمدى ەكەندىگىن اڭعارتسا كەرەك. راسىمەن دە كوممۋنالدىق قىزمەتتەر ءۇشىن تولەنەتىن تولەمدەردىڭ بارلىعى ءبىر تۇبىرتەككە جيناقتالۋى – تۇرعىندارعا وتە ءتيىمدى. ولار ۋاقىتىن عانا ەمەس, قارجىسىن دا ۇنەمدەيدى, ياعني, بانككە ءبىر تۇبىرتەككە عانا كوميسسيا تولەيدى. ال, ەگەر بىرىڭعاي ەسەپتەۋ ورتالىعى بولماعان جاعدايدا ءاربىر كوممۋنالدىق كاسىپورىن ءوزىنىڭ جەكە تۇبىرتەگىن باسىپ شىعارۋعا, ونى تۇتىنۋشىلارعا جەتكىزۋگە, سودان كەيىن وڭدەۋگە ءماجبۇر بولادى. قوسىمشا شىعىندى تالاپ ەتەتىن بۇل قىزمەتتەر تۇرعىنداردىڭ دا قالتاسىنا سالماق تۇسىرگەن بولار ەدى. ال قازىر جەكە شوتتار جۇرگىزۋ, شوت-تۇبىرتەكتەردى قالىپتاستىرۋ, باسىپ شىعارۋ جانە جەتكىزۋ, تولەمدەردى وڭدەۋ, ەكىنشى دەڭگەيدەگى بانكتەر ارقىلى تولەمدەر قابىلداۋدى قامتاماسىز ەتۋ, تۇتىنۋشىلاردىڭ ەسەپتەۋلەرى, تولەمدەرى, بەرەشەكتەرى تۋرالى شۇعىل مالىمەتتەردى ۇسىنۋ, جابدىقتاۋشىلار مەن تۇتىنۋشىلار اراسىنداعى ابونەنتتىك قىزمەتتى ۇيىمداستىرۋ سىندى شارۋالار – ءبىزدىڭ موينىمىزدا.
العاشىندا تۇبىرتەگىمىزدە كوممۋنالدىق قىزمەتتىڭ بىرنەشە ءتۇرى عانا بولسا, قازىر وعان تەلەفون, سپۋتنيكتىك تەلەۆيدەنيە, ينتەرنەت, سۋ, كارىز, قوقىس شىعارۋ, پيك تولەمدەرى قوسىلدى. بىرىڭعاي تۇبىرتەك ارقىلى جىل سايىن سالىق تولەۋگە دە مۇمكىندىك بار. بۇگىندە ءبىز 180-نەن استام دەربەس شوتپەن جانە 150-گە جۋىق كوممۋنالدىق قىزمەتتى جەتكىزۋشى كومپانيالارمەن جۇمىس ىستەيمىز. ورتالىعىمىزدا 230 ادام قىزمەت كورسەتەدى.
كەلىسىمگە كەلۋ كەرەك
–ال بىرىڭعاي ەسەپتەۋ ورتالىعىنىڭ تۇبىرتەگىنە «استاناەنەرگوسبىت» تولەمدەرى مەن ورتالىق گازبەن جابدىقتاۋ قىزمەتى قاشان كىرەدى؟
ء–يا, بۇل ماسەلەمەن تۇرعىندار بىزگە ءجيى حابارلاسادى. بىلتىر «بىرىڭعاي ەسەپتەۋ ورتالىعى» جشس مەن «استاناەنەرگوسبىت» جشس ءوزارا بىرلەسىپ, جارىق پەن جىلۋدىڭ تولەمدەرىن بىرىڭعاي تۇبىرتىككە ەنگىزۋگە بايلانىستى پيلوتتىق جوبانى جۇزەگە اسىردى. قالاداعى 8 مىڭعا جۋىق پاتەردى تاجىريبە رەتىندە الدىق. تۇرعىندار بارلىق كوممۋنالدىق قىزمەتتەردى, ونىڭ ىشىندە جارىق پەن جىلۋدى ءبىر تۇبىرتەكپەن تولەپ, ونىڭ پايداسىن جارتى جىل بويى كوردى. بەلگىلەنگەن مەرزىم وتكەندە جوبا قاي جاعىنان دا ءتيىمدى ءتاسىل ەكەندىگىن تانىتتى. ءبىز ءوز تاراپىمىزدان جوبانى ءارى قاراي جالعاستىرىپ, جىلۋ مەن جارىقتى ءبىر تۇبىرتەككە ەنگىزۋگە دايىنبىز. «استاناەنەرگوسبىت» جشس دا تۇرعىنداردىڭ ءوتىنىشىن ەسكەرۋسىز قالدىرمايتىنىنا سەنەمىز. ال ورتالىق گازبەن جابدىقتاۋ كاسىپورنى كەلىسسوزدەر جۇرگىزىلىپ جاتىر. ءارى قاراي قالاي شەشىلەتىنىن ۋاقىت كورسەتەدى.
ايىنا – 50 مىڭ تەلەفون قوڭىراۋى
–كەيدە ىستىق جانە سۋىق سۋدىڭ كورسەتكىشتەرىن بەرۋگە «استانا-بىرىڭعاي ورتالىعىنا» حابارلاسىپ, تەلەفوندى الدىرا المايتىن كەزدەرىمىز بولادى…
–مۇنداي جاعدايلار كەزدەسەتىنى راس. بۇرىن بىزدە جالعىز call-ورتالىق بولدى. تەلەفونى: 707-444. بۇل ورتالىق تاڭعى ساعات 9.00-دەن كەشكى ساعات 21.00-گە دەيىن ءۇزىلىسسىز جانە دەمالىسسىز جۇمىس ىستەيدى. وسىندا اۋىسىممەن جۇمىس ىستەيتىن 24 وپەراتوردىڭ ءوزى جەتكىلىكسىز بولعان سوڭ, بيىل اقپان ايىنان باستاپ, تاعى ءبىر call-ورتالىقتى ىسكە قوستىق. تەلەفونى: 999-633.
وسى ورتالىقتاردىڭ ارقايسىسى ايىنا 50 مىڭنان استام تەلەفون قوڭىراۋىن قابىلدايدى. ال شتاتتاعى 90 باقىلاۋشىنىڭ ارقايسىسى كۇنىنە 3 مىڭعا جۋىق پاتەرگە كورسەتكىشتەردى الۋعا بارادى. بۇعان قوسا, تۇتىنۋشىلاردىڭ وتىنىشتەرىن قابىلدايتىن ەلەكتروندى پوشتالارىمىز دا بار. مىسالى, kontroler@aerc.kz مەكەن-جايىنا حابارلاما قالدىرۋ ارقىلى باقىلاۋشىنى ۇيگە شاقىرۋعا بولادى, pokazanie@aerc.kz ەلەكتروندى پوشتاسىنا سۋ ەسەپتەگىش قوندىرعىسىنىڭ كورسەتكىشتەرىن جىبەرۋگە مۇمكىندىك بار. ول ءۇشىن اتى-ءجونىڭىزدى, تەلەفون ءنومىرىڭىزدى, دەربەس شوتىڭىز بەن مەكەن-جايىڭىزدى انىق كورسەتۋىڭىز كەرەك. ال ەسەپتەۋ قۇرىلعىسىنا پلومبا قويعىزۋ ءۇشىن vodomer@aerc.kz پوشتاسىنا حابارلاما قالدىرساڭىز جەتكىلىكتى.
جالپى, سۋىق جانە ىستىق سۋدىڭ كورسەتكىشتەرىن ءار ايدىڭ 10-نان 31-نە دەيىن قابىلدايتىنىمىزدى ەستەرىڭىزگە سالعىم كەلەدى.
ءۇش جىل ساقتاۋ كەرەك
– بىرىڭعاي ەسەپتەۋ ورتالىعىنىڭ قانشا ابونەنتتىك بولىمشەلەرى بار؟ بولاشاقتا ولاردىڭ سانىن كوبەيتۋ جوسپاردا بار ما؟
– بۇگىندە وتىرار, 5, بوگەنباي, 50(بۇرىن – 20), 2-شاعىن اۋدانى, 6-ءۇي, 13-ماگيسترالداعى «راحمەت» ساۋدا ءۇيى مەكەن-جايلارىندا ابونەنتتىك بولىمشەلەرىمىز جۇمىس ىستەيدى. جاقىندا ەسىلدىڭ سول جاعالاۋىنان ساۋران 7ب مەكەن-جايىندا تاعى ءبىر بولىمشە اشتىق. بولاشاقتا «كوكتال – 1», «كوكتال – 2» تۇرعىن الاپتارىندا ابونەنتتىك ۋچاسكە اشۋدى جوسپارلاپ وتىرمىز.
– كوممۋنالدىق تولەمدەرگە قاتىستى داۋلى ماسەلەلەر تۋىنداماي تۇرمايدى. ونداي كەزدە ماسەلەنىڭ اق-قاراسىن انىقتاۋ ءۇشىن تۇبىرتەگىمىزدى الىپ جەتەمىز. وسىنى ەسكەرگەن كەيبىر تۇرعىندار تۇبىرتەكتەرىن قاتتاپ جيناپ قويادى. جالپى تۇبىرتەكتى قانشا ۋاقىتقا دەيىن ساقتاعان دۇرىس؟
– نەگىزى, كوممۋنالدىق تولەمدەر تۇبىرتەگىن بىردەن لاقتىرا سالۋعا بولمايدى. ءوزىڭىز ايتقانداي, قانداي دا ءبىر داۋلى ماسەلەلەر تۋىنداعاندا بۇل دايەكتى قۇجات بولىپ تابىلادى. ەلىمىزدىڭ «ازاماتتىق كودەكسى» بويىنشا, ادام قۇقىنىڭ بۇزىلۋىنان تۋىندايتىن تالاپتىڭ قاناعاتتاندىرىلۋ مەرزىمى دەگەن بار. ونىڭ ۋاقىتى – 3 جىل. دەمەك, تۇبىرتەكتى دە مۇمكىندىگىنشە 3 جىلعا دەيىن ساقتاپ قويعان ابزال.
قىمبات توقتامۇرات
