استانا قالاسىنىڭ قوعامدىق كەڭەسىنىڭ وتىرىسىندا ەلوردانىڭ 2017-2019 جىلدارعا ارنالعان بيۋدجەتىنىڭ جوباسى ماقۇلداندى. ەلوردانىڭ باستى قارجى قۇجاتىنىڭ جوباسىن اكىمنىڭ ورىنباسارى اندرەي لۋكين تانىستىردى, دەپ حابارلايدى ەلوردا اكىمدىگىنىڭ ءباسپاسوز قىزمەتى.
استانانىڭ الداعى 2 جىلعا ارنالعان جەرگىلىكتى بيۋدجەتىنىڭ جالپى كولەمى 660,5 ملرد تەڭگە سوماسىندا بەكىتىلدى. سونىڭ 219 ملرد تەڭگەسى كەلەسى جىلعا ارنالعان. قالا قازىناسىنىڭ نەگىزگى بابى الەۋمەتتىك سالا بولىپ تابىلادى.
جيىن بارىسىندا اندرەي لۋكين الداعى جىلى استانانىڭ رەسپۋبليكالىق بيۋدجەتتى قالىپتاستىرۋعا قانداي كولەمدە ۇلەس قوساتىنىن حابارلادى.
– قالانىڭ بيۋدجەتى الەۋمەتتىك باعدارلانعان بولىپ قالدى. الداعى جىلى الەۋمەتتىك سالانىڭ وزىنە عانا 90 ملرد تەڭگە شىعىن نەمەسە جالپى بيۋدجەتتىڭ 41,3% كولەمىندە جوسپارلانعان, – دەپ اتاپ كورسەتتى اكىمنىڭ ورىنباسارى. جالپى سيپاتتاعى ترانسفەرتتەردىڭ كولەمدەرى تۋرالى زاڭعا سايكەس, كەلەسى جىلعا ارنالعان بيۋدجەتتىڭ جوباسىندا بيۋدجەتتىڭ الۋلارى شامامەن 20,5 ملرد تەڭگە, ياعني بۇكىل ەل بولىپ ەلوردانى سالسا, ەندى ەلوردا دونور بولا وتىرىپ, رەسپۋبليكالىق بيۋدجەتكە قارجى قۇيادى, – دەدى قالا باسشىسىنىڭ ورىنباسارى.
سونداي-اق, ول كەلەسى جىلى جەرگىلىكتى بيۋدجەت قانداي كولەمدە كىرىس الۋدى جوسپارلاپ وتىرعانىن حابارلاپ, ەلوردانىڭ جەكە كىرىستەرىنىڭ باستى كوزى ەڭبەكاقى تولەۋ قورىنىڭ سالىقتىق تۇسىمدەرى ەكەنىن اتاپ كورسەتتى.
اكىم ورىنباسارىنىڭ ايتۋىنشا, 2017 جىلعا تۇسىمدەر بويىنشا بيۋدجەتتىڭ جوباسى جەكە كىرىستەر بويىنشا 212 ملرد 550 ملن تەڭگە كولەمىندە بەكىتىلدى. بيىلعا جوسپارلانعان بيۋدجەتكە قاتىستى ءوسىم – 32,5 ملرد تەڭگە نەمەسە 18%. اتاپ وتەرلىگى, جەرگىلىكتى بيۋدجەتتىڭ كىرىستەرىندە سالىق تۇسىمدەرىنىڭ ۇلەس سالماعى باسىم: 90-نان 97%-عا دەيىن. سونىڭ ىشىندە ەلەۋلى ۇلەس ەڭبەكاقى تولەۋ قورىنىڭ سالىقتارىنا كەلەدى: تولەم كوزىنەن الىناتىن كىرىستەرگە جەكە كىرىس سالىعى – 43% جانە الەۋمەتتىك سالىق – 36%.
