«نۇر وتان» پارتياسى سايلاۋالدى باعدارلاماسىنىڭ «جوعارعى تەحنولوگيالاردى دامىتۋ» باعىتى بويىنشا ساراپتامالىق توپ مۇشەلەرى استانا قالاسىنداعى ەكولوگيالىق ماسەلەلەردىڭ شەشىلۋى مەن جاسىل تەحنولوگيالاردىڭ دامۋى جونىندە وتىرىس وتكىزدى.
«ەحرو 2017» حالىقارالىق كورمەسى قارساڭىندا ەلوردادا جاسىل تەحنولوگيالاردى دامىتۋ ماسەلەسى كۇن تارتىبىنەن تۇسپەي كەلەدى. جاز باسىندا اتالمىش ماسەلە «Astana solar» جشس-ىندە وتكەن وتىرىستا جان-جاقتى تالقىلانىپ, وندا انىقتاۋدى قاجەت ەتەتىن سۇراقتار بەلگىلەندى. وسىنى ايتقان استانا قالاسى ءماسليحاتىنىڭ دەپۋتاتى, «جوعارعى تەحنولوگيالاردى دامىتۋ» باعىتىنىڭ ساراپتامالىق توبىنىڭ توراعاسى يليا مەششەرياكوۆ وسى وتىرىستا سول ماسەلەلەردى شەشەتىن ۋاقىت كەلگەنىن جەتكىزدى.
Virgin Energy Management (VEM) Development – تازا ەنەرگيا جوبالىق توبىنىڭ جەتەكشىسى رومان كوۆالسكيدىڭ ايتۋىنشا, استانادا اۋانىڭ لاستانۋىنا اۆتوكولىكتەردەن شىققان گاز بەن ستاتسيونارلىق كوزدەر سىندى ەكى فاكتور اسەر ەتۋدە. العاشقىسىنىڭ اۋانى لاستاۋ دەڭگەيى 57 پايىزعا جەتىپ وتىر. سونىڭ 13 پايىزى قوعامدىق كولىككە تيەسىلى. ال, قالعانى ەلوردادا جىل سايىن 25 مىڭعا كوبەيەتىن جەكە كولىكتىڭ ۇلەسىندە. سول كولىكتەردىڭ 70 پايىزىنىڭ قولدانۋ مەرزىمى دە 10 جىلدان اسىپ كەتكەن. ستاتسيونارلىق كوزدەردىڭ دە اتموسفەرانى ءبۇلدىرۋ دەڭگەيى از ەمەس – 43 پايىز. سونداي-اق, ەلوردا حالقىنىڭ جىل سايىن 30 مىڭ ادامعا ارتۋى دا اۋاعا كەرى اسەرىن تيگىزۋدە. قۇرىلىستىڭ ساپاسىز جۇرگىزىلۋى, مەردىگەرلەردىڭ بۇل جۇمىستى ۇيىمداستىرۋ بارىسىندا جىبەرگەن قاتەلىكتەرى دە كورسەتكىشتى تومەندەتۋدە.
ر. كوۆالسكي بۇل ماسەلەلەردىڭ شەشۋ ءۇشىن ەنەرگيا كوزىن 80 پايىزعا ۇنەمدەيتىن, زياندى قالدىقتاردىڭ اۋاعا تارالۋىن 95 پايىزعا ازايتاتىن ەكوگيبريد قاجەت دەپ ەسەپتەيدى. ونىڭ سوزىنشە, قالادا ەلەكترواۆتوبۋس پەن ەلەكتروموبيلدەردىڭ ەنگىزىلۋى ەكولوگيالىق ماسەلەلەردىڭ شەشىلۋىنە وڭ ىقپال ەتپەك. سونداي-اق, ول قۇرىلىسقا قويىلاتىن تالاپتار مەن ناتيجەلەردى جاقسارتۋ ءۇشىن جاڭا تەحنولوگيالاردى زەرتتەۋدى, «Solar City» ەكوجۇيەسىمەن قامتىلعان تۇڭعىش ەنەرگوتيىمدى 460 ۇيدەن تۇراتىن كوتتەدج قالاشىعىنىڭ جوباسىن ۇسىندى.
جالعىز وتاندىق فوتوەلەكترلىك مودۋلدەردى (كۇن باتارەيالارى) ءوندىرۋشى «Astana Solar» جشس باسشىسىنىڭ كەڭەسشىسى اناتولي بوندار كاسىپورىننىڭ وندىرىستىك مۇمكىندىكتەرى تۋرالى, جوبالاردى ىسكە اسىرۋ بارىسىندا تۋىنداپ وتىرعان ماسەلەلەر جانە ءوندىرىستى دامىتۋ جونىندە اقپارات بەردى.
«زاۋىت قازىرگى ۋاقىتتا استانا جانە رەسپۋبليكانىڭ باسقا ايماقتارىندا جوبالاردى جۇزەگە اسىراتىن سەرىكتەستەردى ىزدەستىرۋدە. قالانىڭ ۇلكەن عيماراتتارىندا كۇن ەلەكتروستانسالارىن ورناتۋ بويىنشا دايىندىق جۇمىستارى قولعا الىندى. «ەحرو 2017» كورمەسىندەگى ۇلتتىق پاۆيلون اۋماعىندا دا ءبىزدىڭ ءونىمدى پايدالانۋ جوسپارلانۋدا. ول جەرگە قۋاتى 200 كۆت كۇن ەلەكتروستانساسى ورناتىلماق» دەدى ا.بوندار.
