ەلدى ەلەڭ ەتكىزگەن
سۋ تاسقىنىنان 1400 ادام قازا تاپتى
ءۇندىستاندا تولاسسىز جاڭبىر ماۋسىمى باستالعالى بەرى تاسقىن سالدارىنان 14 ۋەزدە 5 ملن 411 مىڭ ادام زارداپ شەگىپ, قايتىس بولعاندار سانى 1400-دەن استى.
تابيعي اپاتتان ءبىر عانا كەرالا شتاتىنىڭ وزىندە 488 ادام مەرت بولعان. تابيعي اپات زاردابىن جويۋعا كومەكتەسەتىن لاگەرلەردىڭ ورتالىقتارى دا سۋعا لىق تولعان. سۋ تاسقىنىنان ۋتتار-پرادەش جانە باتىس بەنگاليا شتاتتارىنا دا ايتارلىقتاي زاقىم كەلگەن. 57 مىڭ گەكتار اۋىلشارۋاشىلىق داقىلدارى جويىلىپ, 100 مىڭ گەكتار ەگىستىك جارامسىز بولىپ قالعان.
برازيليانىڭ تاريحي مۇراجايى وتقا وراندى
ريو-دە-جانەيرودا ورنالاسقان برازيليانىڭ ەڭ كونە عىلىمي ورتالىقتارىنىڭ ءبىرى بولعان, 200 جىلدىق تاريحى بار ۇلتتىق مۇراجايدى ءورت جالماعان.
ءورت سوندىرۋشىلەردىڭ ارەكەتىنە قاراماستان, ءتىلسىز جاۋ مۋزەيدىڭ 20 ملن ەكسپوناتتان تۇراتىن توپتاماسىن, سونداي-اق كىتاپحانانىڭ اۋقىمدى بولىگىن جويىپ جىبەرگەن. جانىپ جاتقان عيماراتقا سۋدى جەتكىزۋ قيىنعا سوققان. ونىڭ ۇستىنە, ەكسپوناتتاردى ساقتاۋ ءۇشىن تەز تۇتاناتىن حيميكاتتار پايدالانىلىپ كەلگەن. وقيعانىڭ ءمان-جايى مەن كەلگەن شىعىن كولەمى انىقتالۋدا. قۇرباندار مەن زارداپ شەككەندەر جوق. ەل پرەزيدەنتى ميشەل تەمەر بۇل بارشا برازيالىقتار ءۇشىن قايعىلى وقيعا ەكەنىن ايتتى. ريو-دە-جانەيرونىڭ سولتۇستىك بولىگىندەگى كينتا-دا-بوا-ۆيستا ساياباعىندا ورنالاسقان ۇلتتىق مۇراجايدىڭ نەگىزىن 1818 جىلى پورتۋگاليا كورولى جاۋن VI قالاعان ەكەن.
اين-زارا تۇرمەسىنەن 400 ادام قاشىپ كەتتى
ليۆيا استاناسى تريپوليدە ۇكىمەت اسكەرلەرى مەن قارۋلى جاساق اراسىنداعى قاقتىعىستىڭ ءورشۋى كەزىندە اين-زارا تۇرمەسىنەن 400 سوتتالۋشى قاشىپ كەتكەن.
اين-زارا تۇرمەسىنىڭ ا سەكتورىندا قارۋدىڭ بىرنەشە رەت اتىلعان داۋىسى ەستىلگەننەن كەيىن تۇتقىندار باس كوتەرگەن. تۇرمە قىزمەتكەرلەرىن قورقىتىپ-
ۇركىتىپ, وزدەرىن بوساتۋدى ءماجبۇر ەتكەن. قازىرگى كەزدە قاشقىنداردى ىزدەستىرۋ جۇمىستارى جۇرگىزىلۋدە. ايتا كەتۋ كەرەك, وندا وتكەن دۇيسەنبىدەن بەرى ۇكىمەت اسكەرلەرى مەن كورشى تارنۋحا قالاسىنان شىققان «جەتىنشى بريگادا» دەپ اتالاتىن قارۋلى جاساق اراسىندا قاقتىعىستار ورىن الۋدا. قاقتىعىس سالدارىنان 41 ادام قازا تاۋىپ, 123 ادام جارالانعان.