فرانتسياداعى قاندى شابۋىل
فرانتسيادا قاندى شابۋىل بولدى. ستراسبۋرگ قالاسىندا بەلگىسىز بىرەۋدىڭ ارەكەتىنەن ءۇش ادام قازا بولىپ, 13 تۇرعىن جاراقات الدى.
BBC باسىلىمى بويىنشا, وقيعا كلەبەر الاڭىنداعى مەرەكەلىك جارمەڭكەدە بولعان. بەلگىسىز بىرەۋ جازىقسىز جۇرتقا وق جاۋدىرىپ, ارتىنشا ءتارتىپ ساقشىلارىمەن اتىسقان. وق اتۋشى وقيعا ورنىنان ءىزىن سۋىتىپ ۇلگەرىپتى. قازىر ونى ىزدەۋگە جۇزدەگەن پوليتسەي جۇمىلدىرىلدى. كۇدىكتىنىڭ وسىعان دەيىن دە ءىستى بولعانى بەلگىلى بولدى.
ستراسبۋرگ – فرانتسيانىڭ شىعىسىنداعى ەۋروپارلامەنت, ەۋروپا كەڭەسى, سونداي-اق ەۋروپا وداعىنىڭ مەكەمەلەرى مەن ورگاندارى ورنالاسقان قالا. ءدال وسى كۇندەرى مۇندا ەۋروپارلامەنتتىڭ كەزەكتەن تىس سەسسياسى ءوتىپ جاتقان ەدى.
فرانتسيا بيلىگى 12 جەلتوقساندى ازا تۇتۋ كۇنى ەتىپ جاريالادى.
بەلگيا ۇكىمەتىندە داعدارىس
بۇۇ-نىڭ كوشى-قون بويىنشا حالىقارالىق كەلىسىمىن قۇپتاي الماعان بەلگيانىڭ بىرنەشە ءمينيسترى وتستاۆكاعا كەتتى. بۇل تۋرالى The Associated Press جازادى.
بۇل قۇجاتتا زاڭسىز ميگراتسيا سانى قىسقارىپ, بوسقىنداردىڭ بارعان ەلىندە ينتەگراتسيالانۋىنا, سونداي-اق تۋعان ەلىنە قايتا ورالۋىنا كومەك بەرۋى كورسەتىلگەن. ونى بەلگيانىڭ ۇكىمەت باسشىسى شارل ميشەل قولدايتىنىن ءمالىم ەتكەن. الايدا مۇنداي شەشىم ەلدەگى بىرقاتار مينيستردىڭ نارازىلىعىن تۋدىرعان.
ال قىزمەتتەن ىشكى ىستەر ءمينيسترى يان يامبون, قورعانىس ءمينيسترى ساندەر لونەس, قارجى ءمينيسترى يوحان ۆان وۆەرتۆەلدتي, سونداي-اق مەملەكەتتىك كوشى-قون حاتشىسى تەو فرانكەن كەتتى.
يەمەندە كومەككە مۇقتاجدار كوبەيدى
يەمەندەگى گۋمانيتارلىق جاعداي جىلدان- جىلعا ناشارلاپ بارادى. قازىر حالىقتىڭ 70 پايىزى, ياعني 20 ملن ادام كومەككە مۇقتاج.
بۇۇ-نىڭ گۋمانيتارلىق ماسەلەلەرىمەن اينالىساتىن مارك لوۋكوكتىڭ مالىمەتى بويىنشا, بۇل وتكەن جىلعى كورسەتكىشتەن ەكى ەسە كوپ. ول ءوز سوزىندە بۇل كورسەتكىش ەلدىڭ 330 اۋدانىن قامتىعانىن ءمالىم ەتتى. قازىرگى ۋاقىتتا يەمەنگە 152 مەملەكەت كومەك كورسەتىپ وتىرعان كورىنەدى.
ريا «نوۆوستي» باسىلىمى كەلەر جىلى يەمەندىكتەرگە كومەك ءۇشىن 4 ملرد دوللار قاجەت ەكەنىن حابارلادى.
