ەلدىڭ بىرلىگىنىڭ تاعى دا ءبىر دالەلى

كەشە اقوردادا پرەزيدەنت نۇرسۇلتان نازارباەۆ ەلىمىزدە وتكەن پرەزيدەنت سايلاۋىنىڭ قورىتىندىسىنا بايلانىستى وتاندىق جانە شەتەلدىك اقپارات قۇرالدارى وكىلدەرىمەن ءباسپاسوز ءماسليحاتىن وتكىزدى.

البەتتە, جۋرناليستەر كەزەكتەن تىس وتكەن پرەزيدەنت سايلاۋى تۋرالى ەلباسىنىڭ پىكىرىن بىلۋگە قۇمارتتى. ن.نازارباەۆ قازاقستان حالقى اسسامبلەياسىنىڭ ۇسىنىسىمەن باستالعان وسى سايلاۋ تاعى ءبىر مارتە قازاقستاندىقتاردىڭ بىرلىگىن دالەلدەپ بەرگەنىن اتاپ ءوتتى.
– تاڭ اتىسىمەن حالىق بالا-شاعاسىمەن بىرگە داۋىس بەرۋ ءۇشىن كەزەكتە تۇردى. سايلاۋ كۇنى تۋرا مەرەكە سياقتى ءوتتى. بۇل – ەلدە جۇرگىزىلىپ وتىرعان ساياساتتى حالىقتىڭ قول­دايتىنىنىڭ, ەل بىرلىگىنىڭ دالەلى. بىزگە ءبولىنۋ ەمەس, بىرىگۋ قاجەت ەكەنىن جۇرتشىلىق ءتۇسىندى. قازاق ەجەلدەن-اق بىرىگۋ ءۇشىن كۇرەسىپ كەلەدى. ءبىزدىڭ ۇدايى ۇستاناتىن ساياساتىمىز دا – تۇراقتىلىقتى ساقتاي وتىرىپ, بولاشاققا قادام باسۋ. سايلاۋدان كەيىن دە ىشكى-سىرتقى ساياساتىمىز وزگەرمەيدى. سەبەبى, حالىقتىڭ ءوزى وسى جولدى قولداپ وتىر, – دەدى پرەزيدەنت.
قالىڭ كوپشىلىك سايلاۋدان كەيىن ۇلكەن وزگەرىستەر بولاتىنداي كۇتىپ ءجۇر. اسىرەسە, تەڭگە قۇنسىزدانادى دەگەن قاۋەسەت تاراعالى قاشان. ەلباسى بۇل ماسەلەگە دە نۇكتە قويدى.
– تەڭگە دەۆالۆاتسياعا ۇشى­راي­تىنداي ەشقانداي دا العى­شارت­تاردى كورىپ تۇرعان جوقپىن. بۇعان دەيىن رەسەي رۋبلىنە قاتىستى تەڭگە باعامىندا دا ءبىرشاما قۇبىلۋلار بولعانى راس. سەبەبى, كورشى ەلمەن تاۋار اينالىمى, ساۋدا-ساتتىق جاعىنان بولسىن, تىعىز بايلانىستامىز. سوندىقتان, ءرۋبلدىڭ اسەر ەتپەۋى مۇمكىن ەمەس. ال قازىر تەڭگە تۇراقتى. بۇگىندە تەڭگەنى ەركىن اينالىمعا جىبەرۋ ماسەلەسىمەن اينالىسىپ جاتىرمىز. بۇل – كۇردەلى ماسەلە. ول ءۇشىن ەلىمىزدىڭ قارجىلىق جۇيەسى دامۋى كەرەك. حالىقارالىق ۆاليۋتا قورىمەن بىرلەسىپ اتقاراتىن جۇمىستار دا بارشىلىق. بۇعان كەمى بەس جىلداي ۋاقىت كەرەك. سوندىقتان, حالىقتىڭ تەڭگەگە قاتىستى الاڭداماۋىنا بولادى, – دەدى ەلباسى.
مەملەكەت باسشىسى سايلاۋدان كەيىن ەشقانداي دا كۇرت وزگەرىستەر بولمايتىنىن ايتتى. «ەگەر ەلدىڭ جاعدايىنا قاتىستى قانداي دا ءبىر كۇردەلى وزگەرىستەر ەنگىزىلەتىن بولسا, ول تۋرالى الدىمەن ءوزىم ايتاتىنىمدى ەسكەرتكىم كەلەدى. سوندىقتان, كوڭىلدەگى كۇدىكتى سەيىلتىپ, ادەتتەگىدەي جۇمىسىمىزدى جۇرگىزە بەرۋىمىز كەرەك» دەدى ول.
مەملەكەت باسشىسى ەلىمىزدە قولعا الىنعان الەۋمەتتىك باعدار­لاما­لار­دىڭ, ەل ەكونوميكاسىن دامىتۋعا باعىتتالعان كەشەندى جۇمىستاردىڭ ءبارى جالعاسىن تاباتىنىن جەتكىزدى.
«ەكسپو» حالىقارالىق كورمەسى تۋرالى ساۋال تاستاعان جۋرناليستكە جاۋاپ رەتىندە ەلباسى وسىناۋ ماڭىزدى شاراعا بايلانىستى جۇمىستاردىڭ بارلىعى كەستە بويىنشا جۇرگىزىلىپ جاتقانىن, ونىڭ ءبارى تىكەلەي ءوزىنىڭ قاداعالاۋىندا ەكەنىن ايتتى.
بۇيىرتسا, 2016 جىلدىڭ كۇزىندە «ەكسپو-2017» كورمەسىنىڭ بار­لىق نىساندارىنىڭ قۇرىلىسى اياقتالماقشى.

* * *

كەشە استاناداعى «سارىارقا» ۆەلوترەگىندە ەلوردالىق سايلاۋ­شى­لاردىڭ «جەڭىمپازدار فورۋمى» اتتى شاراسى ءوتتى. بۇل شارا بارىسىندا 8 مىڭ استانالىقتار نۇرسۇلتان نازارباەۆقا قوشەمەت ءبىلدىردى.

قىمبات نۇرعالي