جاقىندا قر ۇلتتىق مۋزەيىندە قازاقستان حالقى اسسامبلەياسىنىڭ 20 جىلدىعى مەن ۇلى جەڭىستىڭ 70 جىلدىعىنا وراي «عاسىرلار قويناۋىنان سىر شەرتكەن قازاقستان» جوباسى اياسىندا تانىمال فوتوسۋرەتشى, قازاقستان رەسپۋبليكاسى جۋرناليستەر وداعىنىڭ مۇشەسى, سلاۆيان مادەني ورتالىعى باسقارماسىنىڭ مۇشەسى الەكساندر پارحومەنكونىڭ «مەنىڭ وتانىم – قازاقستان» اتتى جەكە كورمەسى ءوتتى.
مۋزەيگە قىلقالام شەبەرىنىڭ قازاقستاندى مەكەن ەتكەن ۇلت وكىلدەرىنىڭ وزىنە ءتان ەرەكشەلىگىن, ۇلتتىق مادەنيەتتەردىڭ سان الۋاندىعىن, حالىق شىعارماشىلىعىن, مەرەكەلەرى مەن سالت-داستۇرلەرىن بەينەلەيتىن 100-دەن استام ەڭبەگى قويىلدى.
«بۇل كورمەنىڭ تاريحي ماڭىزى زور. سەبەبى, ول قازاقستانداعى اسسامبلەيا جىلىندا وتكىزىلىپ وتىرعاندىعىمەن جانە حالىقتار دوستىعىن, ولاردىڭ مادەنيەتى مەن سالت-داستۇرلەرىن, بەرەكە-ءبىرلىگىن ناسيحاتتايتىندىعىمەن ەرەكشەلەنەدى» دەدى كورمەنىڭ اشىلۋىندا قازاقستان رەسپۋبليكاسى پارلامەنت سەناتىنىڭ دەپۋتاتى اناتولي باشماكوۆ.
ا.پارحومەنكو ءوز تۋىندىلارىن فوتوسۋرەتتەردى كەنەپكە باسىپ شىعارۋ جولىمەن جاساپ, ونداعى ءار بەينەنى جانداندىرۋ ءۇشىن قىلقالامنىڭ كومەگىنە جۇگىنىپ, ءتۇرلى-ءتۇستى بوياۋدى اسقان شەبەرلىكپەن پايدالانعان. سونىمەن قاتار, سۋرەتشى پەيزاج, ناتيۋرمورت, پورترەت, ت.ب. كوركەمسۋرەت ونەرىن گرافيكا, كەسكىندەمە سىندى الۋان ءتۇرلى جانرمەن ۇشتاستىرىپ, گولوگرافيا ءتاسىلىن قولدانۋ ارقىلى فوتوسۋرەتتىڭ كەرەمەت مۇمكىندىكتەرىن اشۋعا تالپىنادى.
– كورمەگە قويىلعان سۋرەتتەردە ادامداردىڭ كوڭىل-كۇيى مەن مىنەز-قۇلقى كورىنىس تاپقان. بۇل – كورمە يەسىنىڭ شەبەرلىگىنىڭ بەلگىسى, – دەدى ۇلتتىق مۋزەيدىڭ ديرەكتورى دارحان مىڭباي.
«بۇل – مەنىڭ استانا قالاسىندا ءوتىپ جاتقان ءۇشىنشى كورمەم. ءبىرىنشىسى – رەسەيدىڭ عىلىم جانە مادەنيەت ورتالىعىندا, ەكىنشىسى, بەيبىتشىلىك جانە كەلىسىم سارايىندا وتكەن. ەندى, مىنە, ۇلتتىق مۋزەيدە ۇيىمداستىرىلىپ وتىر. ءار كورمەنىڭ وزىندىك تاقىرىبى بار. بۇگىنگى كورمە ەلىمىزدىڭ ەكى بىردەي ايتۋلى مەرەكەسىنە – قازاقستان حالقى اسسامبلەياسىنىڭ 20 جىلدىعى مەن ۇلى جەڭىستىڭ 70 جىلدىق مەرەيتويىنا ارنالىپ وتىر. ەكەۋىنىڭ دە حالقىمىز ءۇشىن ماڭىزى ەرەكشە. ءوز سۋرەتتەرىمدە سوناۋ قيىن-قىستاۋ جىلدارداعى اتالارىمىزدىڭ ەرلىگىن, بيىك رۋحىن بۇگىنگى ۇرپاعىنا جەتكىزگىم كەلدى», – دەيدى سۋرەتشى.
ايتپاقشى, كورمە مامىردىڭ 14-ىنە دەيىن وتەدى.
كۇنايىم ساكەن
