ازيا ەلدەرى اقىن-جازۋشىلارىنىڭ I فورۋمى اياسىندا ەلورداداعى اباي كوشەسىنىڭ بويىنان قالامگەرلەر اللەياسى اشىلدى.
مادەني شاراعا قالا اكىمىنىڭ ورىنباسارى باقتيار ماكەن, قازاقستان جازۋشىلار وداعى باسقارماسىنىڭ توراعاسى ۇلىقبەك ەسداۋلەت, قازاقستاننىڭ ەڭبەك ەرى ولجاس سۇلەيمەنوۆ جانە فورۋمعا كەلگەن قوناقتار قاتىستى.
اللەيانىڭ اشىلۋىندا ەلوردا باسشىسىنىڭ ورىنباسارى باقتيار ماكەن قالامگەرلەردى ەلىمىزدە العاش ءوتىپ وتىرعان ايتۋلى فورۋممەن قۇتتىقتاپ, باس قالانىڭ دامۋى مەن الداعى جوسپارى جايىندا ءسوز قوزعادى. قازاقستان جازۋشىلار وداعى باسقارماسىنىڭ توراعاسى, كورنەكتى اقىن ۇلىقبەك ەسداۋلەت قالامگەرلەر اللەياسىنىڭ اباي اتامىزدىڭ كوشەسىنىڭ بويىندا ورنالاسۋى دا تەگىن ەمەس ەكەنىن ايتتى.
«بۇل كوشەنىڭ بويىنداعى قالامگەرلەر اللەياسىندا كەلە جاتقان اقىننىڭ شابىتى تاسىپ, كومەيىنەن ولەڭ توگىلەرى حاق. اللەيا نۇر-سۇلتان قالاسىنا نۇر قوسىپ, تۇرعىنداردىڭ جۇرەگىنە جىر قوسا بەرسىن» دەدى ۇلىقبەك ەسداۋلەت.
اباي كوشەسىندە ورنالاسقان قالامگەرلەر اللەياسى «ەگەمەن قازاقستان» گازەتى كوشەسىنە دەيىن سوزىلىپ جاتىر. اللەيا اۋماعى 1,2 گەكتاردى قامتيدى. ونىڭ 5,7 مىڭ شارشى مەترىنە تاس توسەلسە, 4,2 مىڭ شارشى مەترى اباتتاندىرىلعان. سونىمەن بىرگە 50 شىرشا ەگىلىپ, 428 جارىقشام ورناتىلعان. اللەياعا اباي اتامىزدىڭ ءسوزى جازىلعان ءمارماردان جاسالعان كىتاپ قويىلعان.
