«يگى ىستەر» مارافونى اياسىندا ەلوردالىق ستۋدەنتتەر قالاداعى جالعىز تۇراتىن زەينەتكەرلەردىڭ اۋلاسىن قاردان تازارتىپ, قايىرىمدىلىق اكتسياسىن جالعاستىرۋدا.
سوڭعى كۇندەرى قالادا قار كوپ جاۋدى, كوممۋنالدىق قىزمەتتەر كۇشەيتىلگەن رەجيمدە جۇمىس ىستەۋدە. ال اۋلاسىن ءوز بەتىنشە تازالاي المايتىن قارتتار مەن جالعىزىلىكتى ادامدارعا ەلوردالىق ەرىكتىلەر كومەككە كەلدى.
– اتا-اجەلەرىمىزگە كوبىرەك كوڭىل مەن قامقورلىق قاجەت. ەرىكتىلەر وزدەرىنىڭ يگى ىستەرىنىڭ ارقاسىندا ۇلكەندەردىڭ باتاسىن الادى. ءبىزدىڭ مىندەتىمىز – مۇقتاج ادامدارعا كومەكتەسۋ جانە قولداۋ. وسى رەتتە قوعامنىڭ, اسىرەسە جاستاردىڭ سانالى ويلاۋىن قالىپتاستىرۋعا, سونداي-اق ەرىكتى قىزمەتتى دامىتۋعا ىقپال ەتۋدەمىز. ءبىزدىڭ كۇشىمىز – بىرلىكتە, – دەدى رەسپۋبليكالىق ستۋدەنتتەر قوزعالىسىنىڭ جەتەكشىسى ۇلان ناۋكەن.
قازاقستان جاستار كونگرەسىنىڭ اتقارۋشى ديرەكتورى باقداۋلەت ءجاندىلداەۆتىڭ ايتۋىنشا, بۇل اكتسيا كۇندىز-ءتۇنى قالانى قاردان تازارتاتىن كوممۋنالدىق قىزمەتتەرگە كومەكتەسە وتىرىپ, جالعىزىلىكتى قارت ادامدارعا كوكتەمگى سۋ تاسقىنىنان تۇرعىن ءۇيدى قورعاۋعا اتسالىسادى. وسىعان بايلانىستى ەلوردا ەرىكتىلەرى «ءوندىرىس» تۇرعىن الابىندا قار تازالاۋعا ءوز ۇلەسىن قوسىپ, كومەكتەسۋگە شەشىم قابىلدادى. قامقورلىققا بولەنگەن قارتتار ەرىكتىلەرگە العىسىن جەتكىزدى.
– بۇگىن مەن كوڭىلدى جانە تاپقىرلار «جايدارمان» كلۋبىنىڭ باسقا ويىنشىلارىمەن بىرگە ەرىكتىلەرگە قوسىلىپ, جالعىزىلىكتى جاندارعا كومەكتەسۋگە بەل بۋدىم. قازىرگى ۋاقىتتا كومەك پەن قامقورلىققا مۇقتاج ادامدارعا رياسىز كومەكتەسەتىندەر بار ەكەنىن ءتۇسىنۋ كەرەمەت! ولار, شىنىمەن دە, يگى ءىس جاساپ ءجۇر. مەن ماماندىعىم بويىنشا ءورت ءسوندىرۋشىمىن, بىراق وسىنداي ءىس-شاراعا قاتىسقانىما قۋانىشتىمىن. قالامىزدىڭ باسقا دا ازاماتتارىن وسىنداي قامقورلىققا ءزارۋ جانداردى قۇتقارۋعا جانە ولاردى قورعاۋعا شاقىرامىن, – دەدى اكتسياعا قاتىسۋشى زاڭعار بالتاباي.
بۇل كۇنى ەرىكتىلەر قالانىڭ تۇرعىن الاپتارىندا تۇراتىن 50 زەينەتكەرگە كومەك كورسەتتى. بەلسەندىلەر قاجەتتى قۇرال-جابدىقتارمەن قامتاماسىز ەتىلدى, قار شىعارۋ ءۇشىن ارنايى تەحنيكا جۇمىلدىرىلدى.
ايتا كەتەيىك, ەلوردانىڭ كەز كەلگەن تۇرعىنى ەرىكتىلەرگە قوسىلا الادى. ول ءۇشىن «استانا جاستارى» جاستار رەسۋرستىق ورتالىعىنىڭ @Astana_jastary Instagram اككاۋنتىنا حابارلاما جازۋعا بولادى.
