استانا قالاسى ءبىلىم باسقارماسىنا قاراستى ادىستەمەلىك ورتالىعى مەن جامبىل جاباەۆ اتىنداعى №4 مەكتەپ-گيمنازيا «اكە – وتباسىنىڭ تىرەگى» اتتى قالالىق بايقاۋ وتكىزدى.
بايقاۋ «جەتى اتاسىن بىلمەگەن…», «اكە كورگەن وق جونار», «ەر قاناتى – ات» جانە «اسىق اتۋ ويىنى» اتتى ءتورت كەزەڭگە ءبولىندى. العاشقى كەزەڭدە قاتىسۋشىلار ءار قازاق بالاسى ءبىلۋى ءتيىس جەتى اتاسىن تاراتىپ, اۋلەت شەجىرەسىنە توقتالدى. ال ەكىنشى كەزەڭ اكە مەن بالا اراسىنداعى تۇسىنىستىك پەن ساباقتاستىققا, اكەنىڭ بالاعا كورسەتەر ۇلگىسىنە نەگىزدەلدى.
اسىرەسە, ءتورتىنشى كەزەڭ اسا تارتىستى ءوتتى. وعان قازاقستان رەسپۋبليكاسى اسىق اتۋ فەدەراتسياسىنىڭ باس حاتشىسى, «سپورت جۇلدىزدارى» رەسپۋبليكالىق جۋرنالىنىڭ باس رەداكتورى مۇساعالي تاسقاليەۆ ءوز شاكىرتتەرىمەن قاتىسىپ, ويىن بارىسىن قاداعالاپ وتىردى. وسى كەزەڭ قورىتىندىسىندا ءبىرىنشى ورىندى احمەت بايتۇرسىنۇلى اتىنداعى №48 مەكتەپ-ليتسەي, ەكىنشى ورىندى قايىم مۇحامەدحانوۆ اتىنداعى №90 گيمنازيا, ءۇشىنشى ورىندى اباي قۇنانبايۇلى اتىنداعى №87 مەكتەپ-گيمنازيا يەلەندى.
«اكەلەر وداعى» قوعامدىق بىرلەستىگىنىڭ توراعاسى بەكدايىر كۇزەمباي, ۇلاعاتتى ۇستاز وسپان سۇلەيمەنۇلى, تانىمال ءانشى دوسىمجان تاڭاتاروۆ, استانا قالاسى ادىستەمەلىك ورتالىعى ديرەكتورىنىڭ ورىنباسارى جانگەلدى قۋاندىقۇلى, وسى ورتالىق ادىسكەرى ەرعازى ماناپۇلى, «رۋحانيات» مەملەكەتتىك مەكەمەسىنىڭ باسشىسى ءادىل ورىنباسارۇلى, جاقىندا عانا بارلىبەك سىرتتانۇلىنىڭ اتى بەرىلگەن №34 ورتا مەكتەپتىڭ ديرەكتورى مۇرات احمەتوۆ قاتىسۋشىلاردىڭ ءتىل تازالىعىنا, سويلەگەن سوزدەرىنىڭ ءمانى مەن ماعىناسىنا, سويلەۋ مانەرىنە, ۇلتتىق كيىمدەرىنە, ساحنا مادەنيەتىنە قاراپ, بايقاۋدىڭ جالپى قورىتىندىسىن شىعاردى.
باس جۇلدە – دۋلات باباتايۇلى اتىنداعى № 89 مەكتەپ-ليتسەيگە (اكە نۇركەلدى بايكىسى, بالا رامازان نۇركەلدىۇلى). ەكى ءبىرىنشى ورىن – احمەت بايتۇرسىنۇلى اتىنداعى № 48 مەكتەپ-ليتسەيگە (نۇرلىبەك سامەك, يمانعالي نۇرلىبەكۇلى) جانە قايىم مۇحامەدحانوۆ اتىنداعى № 90 مەكتەپ-گيمنازيا (ازامات ءمالجانباي, ابايسۇلتان ازاماتۇلى). ەكى ەكىنشى ورىن – №8 مەكتەپ-ليتسەيگە (بولاتبەك دوكتورحان, الماسحان جاقسىبەك) جانە اباي قۇنانبايۇلى اتىنداعى №87 مەكتەپ-گيمنازياعا (اكبار جورىقباەۆ بالاسى ءنۇراسىلىم اكبارۇلى). ال ءۇشىنشى ورىن مۇحتار اۋەزوۆ اتىنداعى №86 مەكتەپ-گيمنازياعا (تالعات جامانباەۆ, رۋسلان سەيداليەۆ) بەرىلدى.
