بيىل استانادا اپاتتى ۇيلەردە تۇراتىن 400-دەن اسا وتباسى جاڭا قونىسقا كوشىرىلەدى
استانا قالالىق ءماسليحاتىندا وتكەن تۇراقتى كوميسسيانىڭ جينالىسىندا «جىل اياعىنا دەيىن 31 اپاتتى ءۇيدى ىسىرىپ تاستاۋ جوسپارلانىپ وتىر. وندا ۇزىن-ىرعاسى 463 وتباسى تۇرادى. ولارعا سىعاناق كوشەسىندەگى ۇيلەردەن جاڭا باسپانا بەرىلەدى» دەگەن مالىمەت ايتىلدى.
جالپى, قالادا 2017 جىلعا دەيىن توزىعى جەتىپ, قۇلاعالى تۇرعان 228 ءۇيدى ىسىرىپ تاستاۋ جوسپارلانعان ەدى. تۇرعىن ءۇي باسقارماسىنان حابارلاعانىنداي, اۋداندىق اكىمدىكتەر تۇرعىن ءۇي قورىنا تالداۋ جاساپ, 1940-1970 جىلدار ارالىعىندا سالىنعان, قۇرىلىس كونسترۋكتسيالارى مەن ينجەنەرلىك جەلىلەرى ابدەن ەسكىرگەن 228 ءۇيدى انىقتاعان ەدى.
قازىرگى كەزدە مامانداندىرىلعان مەكەمەلەر اتالمىش ۇيلەرگە تەحنيكالىق تەكسەرۋ جۇرگىزىپ جاتىر. تەحنيكالىق قورىتىندى ءناتيجەسىندە نىسانداعى جاعداي سارالانىپ, عيماراتتى ىسىرىپ تاستاۋ جونىندە ءتيىستى شەشىم قابىلدانادى. ال, اپاتتى جاعدايداعى ءۇي يەلەرى قولدانىستاعى زاڭعا سايكەس جاڭادان سالىنعان تۇرعىن ءۇي كەشەندەرىنە كوشىرىلەدى. الايدا, بەرىلەتىن پاتەرلەردىڭ اۋماعى بۇزىلاتىن ءۇيدىڭ اۋماعىمەن تەڭ بولادى. ياعني, «شارشى مەترگە – شارشى مەتر».
ەستەرىڭىزگە سالا كەتەيىك, استانادا اپاتتى جاعدايداعى ۇيلەردى ىسىرۋ جونىندەگى قاناتقاقتى جوبا «قولجەتىمدى تۇرعىن ءۇي – 2020» باعدارلاماسىنىڭ ءبىر تارماعى رەتىندە ەنگىزىلگەن بولاتىن. وتكەن جىلى ءدال وسى باعدارلاما اياسىندا 11 ەسكى ءۇي بۇزىلىپ, 178 وتباسى سىڭعىراعان جاڭا پاتەردە قونىس تويىن تويلاعان.
ەسكى ورامداردى جاڭعىرتۋ مەحانيزمى مەملەكەتتەن تۇرعىن ءۇي قۇرىلىسىنا بولىنگەن قارجىنى قايتارۋعا, قۇرىلىس يندۋسترياسىن دامىتۋعا مۇمكىندىك بەرەدى.
