تۇرىكشە «شاكارىم» تۇساۋكەسەرى
انكارا قالاسىنداعى «Bengu» (ماڭگى) باسپاسىنان ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, قر ۇعا كوررەسپوندەنت-مۇشەسى, تاريح عىلىمدارىنىڭ دوكتورى ەرلان سىدىقوۆتىڭ «شاكارىم» اتتى تانىمدىق-عۇمىرباياندىق كىتابى تۇرىك تىلىندە جارىق كوردى. سەيسەنبى كۇنى بەيبىتشىلىك جانە كەلىسىم سارايىندا وسى كىتاپتىڭ تانىستىرىلىمى ءوتتى.
ەلىمىزگە بەلگىلى عالىم, جازۋشىلار مەن تۇركيانىڭ كورنەكتى وكىلدەرى قاتىسقان جيىندى حالىقارالىق تۇركى اكادەمياسىنىڭ پرەزيدەنتى دارحان قىدىرالى اشتى.
– تۇركى اكادەمياسىنىڭ قولداۋىمەن جارىق كورىپ وتىرعان شاكارىم تۋرالى ەڭبەك تۇرىك وقىرماندارىمەن تۇڭعىش رەت قاۋىشىپ وتىر. ەلىمىزدىڭ رۋحاني الەمىندە وزىندىك ورنى بار تۇلعا ابايدان كوپ ءتالىم العانى بەلگىلى. كەزىندە ۇلى اقىنىمىز «تۇركياداعى جاڭاشىلدىق قازاققا قاشان كەلەدى؟» دەپ ارمانداعانى بەلگىلى. ابايدىڭ وسى ارمانىن شاكارىم قاجى ورىنداپ, ستامبۋلدا كوپتەگەن زەرتتەۋلەر جۇرگىزگەنى بەلگىلى. ەندى, مىنە, سول رۋحاني دانەكەرلىكتىڭ جالعاسىنداي بولىپ, شاكارىم تۋرالى كىتاپ جارىق كوردى. وسىنداي تاماشا كىتابى ءۇشىن اۆتور ەرلان ءباتتاشۇلىنا العىسىمىز شەكسىز, – دەدى دارحان قۋاندىقۇلى.
شاكارىم تۋرالى كىتاپتىڭ تۇركياداعى العاشقى تارالىمى 5 مىڭعا جەتىپتى. ەكى ەلدىڭ بەلگىلى تۇلعالارى «قازاق-تۇرىك مادەنيەتىندەگى ۇلكەن ولجا» دەپ باعالاپ وتىرعان كىتاپتىڭ شىعۋىنا ەسكىشەھير قالاسىنىڭ اكىمى گيۋنگەر ازيم تۋنا ەرەكشە قامقورلىق كورسەتكەن ەكەن. جيىنعا ول دا قاتىسىپ, كىتاپ تۋرالى وزىندىك پىكىرىن ءبىلدىردى. «ەسكىشەھير بىلتىر تۇركى الەمىنىڭ مادەني استاناسى بولىپ بەلگىلەنگەن ەدى. ءبىز وسى جىلى تۇركى الەمىنىڭ مادەني قۇندىلىقتارىن ناسيحاتتايتىن كوپتەگەن شارالار ۇيىمداستىردىق. سونىڭ ىشىندە قازاقستان مەن ءتۇركيانىڭ ىنتىماقتاستىعىن ارتتىرا تۇسەتىن بىرلەسكەن عىلىمي جوبالار مەن ىرگەلى ىستەر دە بارشىلىق. مۇنداي جۇمىستار الداعى ۋاقىتتا دا جالعاسىن تاپپاق. سونىڭ ءبىر كۋاسى – وسى شاكارىم تۋرالى ەڭبەك» دەيدى گيۋنگەر ازيم مىرزا.
كىتاپتىڭ تانىستىرىلىمىنا قازاقستان رەسپۋبليكاسىنىڭ انكاراداعى ەلشىلىگىنىڭ كەڭەسشىسى زافەر كەبار مىرزا دا ارنايى كەلىپتى. حالىقارالىق تۇركى اكادەمياسىنىڭ پرەزيدەنتى دارحان قىدىرالى بۇل ازاماتتىڭ ابايدى, مۇقاعاليدى قازاقشادان تۇرىك تىلىنە اۋدارىپ, ەلىمىزدىڭ الەمگە تانىلۋىنا ىقپال ەتىپ جۇرگەنىن اتاپ ءوتتى.
شاكارىمنىڭ عۇمىرى مەن قازاق رۋحانياتىنا سىڭىرگەن ولشەۋسىز ەڭبەگى جاڭاشا قىرىمەن باياندالعان كىتاپتى تۇرىك تىلىنە بەلگىلى ءتىل مامانى, عالىم ءلاززات وراقوۆا اۋدارعان. جيىندا ءسوز سويلەگەن ەۋرازيا جازۋشىلار وداعىنىڭ توراعاسى ياكۋپ ومەروعلى وزدەرىنىڭ ايگىلى اقىنى يۋنۋس ەمرە مەن شاكارىم پوەزياسىنىڭ اراسىندا بىرقاتار ساقباقتاستىقتار بارىن اتاپ ءوتتى.
قىمبات نۇرعالي