1944 جىلى ىرگەسى قالانىپ, بۇگىنگە دەيىن 22 مىڭنان استام مامان دايارلاپ شىعارعان استانانىڭ گۋمانيتارلىق كوللەدجىنە بيىل 70 جىل تولىپ وتىر. مەرەيتويىن 16-17 قازان كۇندەرى حالىقارالىق دەڭگەيدە اتاپ وتكەلى وتىرعان ءبىلىم وشاعىنىڭ تىنىس-تىرشىلىگى جونىندە كوللەدج ديرەكتورى, قر ءبىلىم بەرۋ ءىسىنىڭ ۇزدىگى, ى.التىنسارين مەدالىنىڭ يەگەرى ءادىلحان جۇسىپوۆپەن اڭگىمەلەسكەن ەدىك.
تاريحى – تاعىلىم
– ءادىلحان شايماعامبەتۇلى, استانا قالاسىنىڭ گۋمانيتارلىق كوللەدجى وقىتۋ ءۇردىسى, وقىتۋشىلار قۇرامى مەن ماتەريالدىق تەحنيكالىق بازاسى ابدەن قالىپتاسىپ, كەمەلىنە جەتكەن وقۋ ورنى ەكەنىن ەل جاقسى بىلەدى. «ۇزدىك كوللەدج» اتانىپ, استانا قالاسى اكىمىنىڭ گرانتىن ۇتىپ الۋدىڭ ءوزى وقۋ ورنىنداعى ءبىلىم ساپاسى جاقسى دەڭگەيدە ەكەندىگىن كورسەتەدى. ەندى سوناۋ 1944 جىلدان بەرى مۇعالىمدەر دايارلاپ كەلە جاتقان بايىرعى وقۋ ورنىنىڭ تاريحى جونىندە ايتىپ بەرسەڭىز؟
– استانا قالاسىنىڭ گۋمانيتارلىق كوللەدجى – ارقا ءوڭىرىندەگى العاشقى وقۋ ورنى. قولىمىزداعى قۇجات بويىنشا كوللەدجىمىزدىڭ ىرگەتاسى 1944 جىلى قالاندى دەپ ءجۇرمىز. بىراق, ونىڭ تاريحي تامىرى تەرەڭدە جاتىر. بۇعان دالەل بولاتىن كونە فوتوسۋرەتتەر بار. الايدا, ناقتى ۇكىمەتتىك قۇجات قولىمىزدا جوق. سوندىقتان تسەلينوگراد وبلىستىق اتقارۋ كوميتەتىنىڭ 1944 جىلى شىعارعان اقمولادا پەدۋچيليششە قۇرۋ تۋرالى شەشىمىنە سۇيەنۋگە ءماجبۇرمىز.
– سوندا جاڭاعى ءوزىڭىز ايتقان فوتوسۋرەتتەر دەرەگى كوللەدجدىڭ قاشان قۇرىلعانىن مەڭزەپ تۇر؟
– ءبىزدىڭ شامالاۋىمىزشا, كوللەدجىمىزدىڭ ىرگەتاسى 1928 جىلى قالانعان. وعان تەك فوتوسۋرەتتەر عانا ەمەس, 1928-1944 جىلدار ارالىعىنداعى تاريحي دەرەكتەر دە ايعاق. وسى ۋاقىت ارالىعىندا وقۋ ورىندارى كوشپەلى بولعانى بەلگىلى. تاريحتى اقتارساق, 1928 جىلى حالىقتىڭ ساياسي ساناسىن وياتىپ, ساۋاتتىلىعىن اشۋ ماقساتىندا كوكشەتاۋ قالاسىنداعى پەداگوگيكالىق تەحنيكۋم اقمولاعا كوشىرىلگەن ەكەن. تەحنيكۋمنىڭ العاشقى ديرەكتورى بولىپ, س.دوبرومىسلوۆ تاعايىندالادى. ال, كەلەسى جىلى جەرگىلىكتى ۇلتتان ماماندار دايارلاۋ ءۇشىن قازاق ءبولىمى اشىلادى. 1930 جىلى العاشقى 16 تۇلەگىن قاناتتاندىرىپ, 1931 جىلى كوكشەتاۋعا قايتا كوشىرىلدى. كوپ ۇزاماي قاراعاندىدا اشىلعان ءىرى ونەركاسىپ قارقىندى دامىپ, حالىق سانى كوبەيۋىنە بايلانىستى وسىندا قونىس اۋدارادى. جەتى جىلدان كەيىن قايتادان اقمولاعا كوشىرىلگەن مۇعالىمدەر تەحنيكۋمى عيمارات جوقتىعىنا بايلانىستى 1941 جىلى ششۋچينسك قالاسىنا اۋىسىپ, وسىندا پەداگوگيكالىق ۋچيليششە بولىپ قايتا قۇرىلادى. ال 1944 جىلى اقمولا قالاسىنا قايتادان كوشىرىلگەن وقۋ ورنى وسىندا ءبىرجولا تۇراقتايدى. 1961 جىلى اقمولا اتاۋى وزگەرگەن كەزدە ءبىلىم وشاعى تسەلينوگراد پەداگوگيكالىق ۋچيليششەسى بولىپ اتالدى. العاشىندا «باستاۋىش سىنىپتارعا ءبىلىم بەرۋ» ماماندىعى بويىنشا تالاپكەرلەردى قابىلداعان ۋچيليششەدە قوسىمشا «مەكتەپكە دەيىنگى تاربيە» مەن «ءان-كۇي» ماماندىعى اشىلادى. كەيىن «قازاق ءتىلى مەن ادەبيەتى» جانە «مەملەكەتتىك تىلدە وقىمايتىن مەكتەپتەردەگى قازاق ءتىلى مەن ادەبيەتى» ماماندىقتارى قوسىلدى. قازىرگى عيماراتى كوللەدجگە 1980 جىلى بەرىلگەن.
ءار كەزەڭنىڭ ادىستەمەلىك تاقىرىبىن تاڭدادىق
– ءوزىڭىز گۋمانيتارلىق كوللەدجدى 2001 جىلدان بەرى باسقارىپ كەلەدى ەكەنسىز. ءسىز باسشى بولعالى كوللەدج قابىرعاسىندا قانداي وزگەرىستەر بولدى, قانداي جەتىستىكتەرگە جەتتىڭىزدەر؟
– مەنىڭ ازدى-كوپتى تاجىريبەمدە تۇيگەنىم, كەز كەلگەن جۇمىسىڭ العا باسىپ, ويلاعان ماقسات ورىندالۋ ءۇشىن بەلگىلى ءبىر جوسپار بولۋ قاجەت. بۇل جوسپار جاي عانا جاسالا سالماي, ناقتى ورىندالۋى كەرەك. سوندا عانا جۇمىستىڭ ناتيجەسى بولادى. مەن وسىندا باسشى بولىپ كەلگەلى كوللەدجدىڭ دامۋ باعدارىن ايقىندايتىن باعدارلاما جاساۋدى قولعا الدىق. وندا الداعى ءۇش جىلدا اتقارىلار جۇمىستاردىڭ تىزبەسى تۇگەندەلىپ, ءبىلىم ساپاسىن ارتتىرىپ, باسەكەگە قابىلەتتى ماماندار دايارلاۋعا قاجەتتى جوسپارلار قۇرىلدى. بۇعان قوسا, پەداگوگتاردىڭ بىلىكتىلىگىن ارتتىرۋ, شىعارماشىلىق ىزدەنىسىن دامىتۋ, ماتەريالدىق-تەحنيكالىق بازانى نىعايتۋ, وقۋ-ادىستەمەلىك جۇمىستاردى جەتىلدىرۋ, عىلىمي-زەرتتەۋ ەڭبەكتەردى جۇيەلەۋ, اقپاراتتىق ينفراقۇرىلىمدى كەڭەيتۋ ماسەلەلەرىن دە قامتىدىق. ءار كەزەڭنىڭ ءوز ادىستەمەلىك تاقىرىبى تاڭدالىپ, ماقساتى مەن مىندەتتەرى, باعدارلامانى جۇزەگە اسىرۋ جاعدايلارى, مازمۇنى ناقتىلاندى. باعدارلامانى نورماتيۆتىك اقپارات كوزدەرى, كوللەدجدىڭ اكىمشىلىك قىزمەتى مەن قۇرىلىمدىق بولىمشەلەرىنىڭ ەسەپتەرى مەن ۇسىنىستارىن ەسكەرە وتىرىپ جاسادىق. ەڭبەگىمىز زايا كەتكەن جوق. 2002-2004 جىلدارعا ارنالعان كوللەدجدىڭ العاشقى دامۋ باعدارلاماسىنان-اق جۇمىستىڭ وڭ ناتيجەسى كورىنە باستادى. كوللەدجدە ءبىلىم بەرۋ ءۇردىسىن اقپاراتتاندىرۋدىڭ قاناتقاقتى قادامدارى جاسالدى: 25 كومپيۋتەرلىك 2 سىنىپ اشىلدى, اعىلشىن ءتىلى كابينەتى كومپيۋتەرمەن جابدىقتالدى, ينتەرنەت جەلىسى قوسىلدى. سونداي-اق, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى, ەۋرازيا گۋمانيتارلىق ينستيتۋتى, 12 جىلدىق ءبىلىم بەرۋ عىلىمي-رەسپۋبليكالىق ورتالىعى مەن «دارىن» ورتالىعى, «تۇران» ۋنيۆەرسيتەتىمەن عىلىمي بايلانىستار ورناتىلدى. كوللەدج ىشىندە ادىستەمەلىك سالاداعى ۇلكەن جەتىستىك بولىپ تابىلاتىن, ءالى كۇنگە دەيىن جۇيەلى جالعاسىپ كەلە جاتقان «پەداگوگيكالىق جارشى» جۋرنالى تۇڭعىش رەت سول كەزدە شىعا باستاعان بولاتىن. كوللەدجگە وسى جىلدارى 55 كومپيۋتەر الىندى, 5 ينفورماتيكا كابينەتى جابدىقتالدى. باعدارلامادا ايتىلعان ءىس-شارالار نەگىزىندە 2005 جىلدىڭ قىركۇيەك ايىنان بەرى پەداگوگتاردى ەڭبەگىنە قاراي ىنتالاندىرۋ ءۇشىن ماراپاتتاۋ مەن سىياقى تاعايىندالدى. ەكى جىل ىشىندە 95 وقىتۋشى 41 نوميناتسيا بويىنشا ماراپاتتالدى. وقۋ ورنىنداعى ماماندىقتار ماسەلەسى دە نازاردان تىس قالعان جوق. سۇرانىسى جوعارى ماماندىقتارعا ءمان بەرىلدى. بىزدە بۇرىن «قازاق ءتىلى مەن ادەبيەتى» دەگەن ەكى ماماندىق بولعان. ولاردىڭ بىرەۋىن قىسقارتتىق. ەسەسىنە, ۋاقىت تالابىنا ساي «شەتەل ءتىلى», «ينفورماتيكا», «دەنە تاربيەسى» ماماندىقتارىن اشتىق.
قازىر بەسىنشى باعدارلاماعا قادام باسقان جايىمىز بار. ءار باعدارلاما اياقتالار تۇستا قانداي جۇمىستار اتقارعانىمىز تۋرالى ەسەپ جاساپ, الداعى كۇندەردىڭ جوسپارىن بەلگىلەيمىز. كەم-كەتىكتى تۇزەتىپ, جەتىستىكتەردى ەسەلەي تۇسۋگە كۇش سالامىز.
– بۇگىنگە دەيىن گۋمانيتارلىق كوللەدجدى 22 مىڭنان استام تۇلەك بىتىرگەن ەكەن. قازىر قانشا ستۋدەنت وقيدى؟ وقىتۋشىلار قۇرامى مەن ماماندىقتار سانى قانشا?
– كوللەدجدە ءبىلىم بەرەتىن 141 وقىتۋشىنىڭ 75 پايىزى – جوعارى جانە ءبىرىنشى ساناتتى ماماندار. ولاردىڭ ىشىندە ۇزاق جىلدان بەرى ەڭبەك ەتىپ كەلە جاتقان ۇستازدارىمىز دا جەتەرلىك. اتاپ ايتقاندا, قاپيا بۇرگەعۇلوۆا, شولپان جيەنباەۆا, سۆەتلانا دياديچ, نۇرگۇل قالاباەۆا, نۇرگۇل ماحمەتوۆا, جەڭىسگۇل جانتورەەۆا, ايسۇلتان الپىسباەۆ سىندى ءتاجىريبەلى وقىتۋشىلارىمىز وزگە ءىزباسارلارىنا ۇلگى. ولار شەبەرلىك ساباقتارىن وتكىزىپ, وقۋلىقتارعا اۆتور رەتىندە دە قاتىسىپ ءجۇر. ال وقيتىن جاستارعا كەلسەك, ولاردىڭ 98 پايىزى – ءوزىمىزدىڭ قاراكوزدەر. بارلىعى 2200-دەن استام ستۋدەنت 9 ماماندىق بويىنشا ءبىلىم الۋدا. جالپى, ەلىمىزدىڭ بارلىق وڭىرىندە مۇعالىمدەر دايارلايتىن كوللەدج بار ەكەنى بەلگىلى. سوعان قاراماستان جاستار ءبىزدىڭ كوللەدجدە ءبىلىم العاندى ءتاۋىر كورەدى. ونىڭ باستى سەبەبى, كوپشىلىك جاستار بولاشاعىن استانامەن بايلانىستىرعىسى كەلەدى. كوللەدجىمىزدىڭ باسقالاردان ەرەكشەلىگى دە وسى استانالىق بولۋىندا. سوڭعى جىلدارى كوللەدجىمىزگە بەرىلەتىن مەملەكەتتىك تاپسىرىس سانى ۇلعايعانىن دا اتاپ ءوتۋ قاجەت. بيىل ونىڭ سانى 405-كە جەتتى. بىلتىر بۇل كورسەتكىش 355 بولعان ەدى. مۇنىڭ ءوزى كوللەدجىمىزدىڭ ءيميدجىن كورسەتسە كەرەك.
يننوۆاتسيالىق تەحنولوگيانى مەڭگەرۋ – ۋاقىت تالابى
– ءبىلىم قىزمەتكەرلەرىنىڭ بيىلعى تامىز كەڭەسىندە استانا قالاسىنىڭ اكىمى: «ءوزءىن-ءوزى جەتىلدىرىپ وتىرۋ, وقۋ بارىسىندا يننوۆاتسيالىق تەحنولوگيالاردى پايدالانۋ, كاسىبي شەبەرلىك شەگىن كەڭەيتۋ – مۇعالىمنىڭ زاماناۋي ستاندارتتارعا ساي بولۋىنا مۇمكىندىك بەرەتىن جالعىز جول. مۇعالىم بالانى ءبىلىم الەمىنە جەتەلەۋ ءۇشىن زاماناۋي تەحنولوگيالار ءتىلىن ءتۇسىنىپ قانا قويماي, جەتىك مەڭگەرە ءبىلۋى قاجەت» دەپ اتاپ ءوتتى. وسى جاڭاشىل مىندەت-تالاپقا گۋمانيتارلىق كوللەدج ۇستازدارى قانشالىقتى لايىق؟
– ءيا, قازىر اقپاراتتىق تەحنولوگيانىڭ كۇن سايىن قارىشتاپ دامىعان زامانى. ۋاقىت تالابىنا ىلەسە الماۋ – ۇستاز اتىنا سىن. وسى تۇرعىدا, اسىرەسە, استانالىق وقىتۋشىلارعا جۇكتەلەر جاۋاپكەرشىلىك ۇلكەن. مەن وسىندا ديرەكتور بولىپ كەلگەندە اتى دارداي ۇستازداردىڭ ساباعىنا قاتىسىپ ءجۇردىم. قازىر دە قاتىسامىن. بىراق سول كەزدە كوپتەگەن ءتاجىريبەلى ۇستازدار وقىتۋ ءۇردىسىندە باياعى قاتىپ قالعان قاعيدانى ۇستاناتىنىن بايقادىم. ارينە, كەزىندە ولاردىڭ وقىتۋ ءادىس-ءتاسىلدەرى ءوز زامانىنداعى ۇزدىگى بولعان. ال جاڭا داۋىردە جاڭا تالاپ كەرەكتىگىن بىلەمىز. ۇستاز دەر كەزىندە سەزىنىپ, زامانعا بەيىمدەلە ءبىلۋى كەرەك. ولاردى قولىمىزدان كەلگەنشە جاڭاشىلدىققا بەيىمدەدىك. ال قازىر ءبىزدىڭ وقىتۋشىلار قۇرامىن جۇمىس ىستەۋگە قابىلەتى مول, جاڭاشىلدىققا بەيىم ورتا جاستاعىلار قۇرايدى. ال كوللەدجىمىزدە جۇمىس ىستەگىسى كەلەتىندەرگە قويىلاتىن تالاپ جوعارى. ولارمەن ءبىر جىلعا كەلىسىم-شارتقا وتىرامىز. وسى مەرزىم اياقتالعاننان كەيىن الگى ماماننىڭ ءبىر جىلدىڭ ىشىندە قانداي جۇمىستار اتقارعانى, وقۋ ۇدەرىسىندە قانداي ادىستەر قولدانعانى تالقىعا سالىنادى. ەگەر ول كوللەدج قويىپ وتىرعان تالاپ ۇدەسىنەن شىقپاسا, كەلىسىم-شارتتى ءارى قاراي ۇزارتپايمىز. وزىندىك پىكىرى بار, ماقساتىن الدىن الا جوسپارلاي بىلەتىن جاڭاشىل ۇستاز عانا جۇمىسىن ءارى قاراي جالعاستىرادى. سەبەبى, قازىرگى زامانعى بالانى وقىتۋ وڭاي ەمەس. اسىرەسە, وقۋعا تالپىنىپ تۇرعان وقۋشىنى وقىتۋ تىپتەن كۇردەلى. ول ءۇشىن وقىتۋشى ءبىلىم دەڭگەيى جاعىنان عانا ەمەس, يننوۆاتسيالىق تەحنولوگيالاردى مەڭگەرۋ تۇرعىسىنان دا وقۋشىنىڭ الدىندا بولۋى كەرەك. سوندا عانا ول ناعىز ۇستاز بولماق.
– ەلىمىزدىڭ بولاشاعىن ءتاربيەلەيتىن مۇعالىمدەر زاماناۋي تالاپتارعا ساي بولۋ ءۇشىن وعان قاجەتتى مۇمكىندىكتەر دە بولۋى كەرەك. وسى تۇرعىدان كوللەدجدە قانداي جاعدايلار جاسالعان؟
– گۋمانيتارلىق كوللەدجدە ءبىلىم بەرۋ ۇردىسىنە قاجەتتى اقپاراتتىق-تەحنيكالىق قۇرالداردىڭ بارلىعى دەرلىك بار: 328 بىرلىك كومپيۋتەرلىك تەحنيكا, 22 ينتەراكتيۆتىك تاقتا. ينتەراكتيۆتىك جابدىقتار 8 كابينەتتە ورناتىلعان, 54 پروەكتور بار. 9 كومپيۋتەرلىك سىنىبى, 7 مۋلتيمەديالىق كابينەتى, 2 موبيلدىك سىنىبى جابدىقتالعان. بارلىق قۇرىلىمدىق بولىمشەلەر جەتكىلىكتى دارەجەدە كومپيۋتەر, ورگتەحنيكالارمەن قامتاماسىز ەتىلگەن, ينتەرنەت جەلىسىنە قوسىلعان. 2011 جىلدان باستاپ كوللەدج پيلوتتىق جۇيە بويىنشا «E-learning» ەلەكتروندىق وقىتۋعا» كوشتى. وسى ورايدا, استانانىڭ گۋمانيتارلىق كوللەدجى ەكى جىلدان بەرى رەسپۋبليكا كولەمىندە ونلاين رەجيمىندە وتىز بەس ساباق وتكىزگەنىن دە اتاپ وتكىم كەلەدى. ونى تىڭداۋشىلاردىڭ سانى دا كوبەيە تۇسكەن. كەلەشەكتە جوعارى دەڭگەيلى ونلاين ساباقتاردىڭ سانىن كوبەيتۋدى جوسپارلاپ وتىرمىز.
«تۇلەكتەرىمىزگە سۇرانىس جوعارى»
– گۋمانيتارلىق كوللەدجدى بىتىرگەن تۇلەكتەردى جۇمىسقا ورنالاستىرۋ ماسەلەسى قانشالىقتى شەشىلگەن؟
– كوللەدج تۇلەكتەرىن جۇمىسپەن قامتۋ ماقساتىندا ءبىز كوپتەگەن شارالاردى قولعا الىپ وتىرمىز. بىزدەگى وقۋدىڭ 40 پايىزى پراكتيكاعا ارنالعان. ستۋدەنتتەر العاشقى كۋرستىڭ ەكىنشى سەمەسترىندە-اق مەكتەپتەرگە, بالاباقشالارعا بارىپ, پراكتيكادان وتەدى. ونىڭ العاشقى ساتىسى تانىسۋدان, قاجەتتى قۇجاتتاردى يگەرۋدەن باستالادى. جاستار ءۇشىن پراكتيكادان ءوتۋ – وتە ماڭىزدى. سەبەبى, ول وقىپ ۇلگەرمەي جاتىپ, مۇعالىمدىك ماماندىقتىڭ قىر-سىرىنا قانىعا باستايدى. بۇل وقۋشى جاستاردىڭ ساناسىندا مامان بولۋدىڭ العى شارتتارىن قالىپتاستىرادى, پسيحولوگياسىن بەيىمدەيدى. ءارى ءبىز ءبىر ستۋدەنتتى ءۇش-ءتورت جىل قاتارىنان تەك ءبىر مەكەمەدەن پراكتيكادان وتۋىنە ءمان بەرىپ وتىرمىز. سەبەبى, وسى ۋاقىت ىشىندە بولاشاق مامان سول ۇيىمنىڭ ىشكى-سىرتقى جاعدايىنا بەيىمدەلىپ, سول ورتاعا سىڭىسە تۇسەدى. سول ۇجىم دا قايتا-قايتا پراكتيكادان وتكەن مامانعا باۋىر باسىپ,
ەرتەڭ جۇمىسقا الۋعا ىقىلاس تانىتادى. جاستاردى جۇمىسقا ورنالاستىرۋدىڭ ءبىر جولى – وسى. ەكىنشى, كوللەدجىمىزدىڭ قابىرعاسىندا جىل سايىن ناۋرىزدىڭ اياعى مەن ءساۋىردىڭ باسىندا بوس ورىندار ءجارمەڭكەسى وتەدى. وندا ستۋدەنتتەر ءوزى قالاعان مەكەمەدەگى جۇمىستاردى تاڭداۋعا قۇقىعى بار. جالپى, ءبىزدىڭ تۇلەكتەرگە سۇرانىس جوعارى. اسىرەسە, بالاباقشا ءتاربيەشىلەرىنىڭ اياعى جەرگە تيمەي تۇر. وسى ماماندىققا مەملەكەتتىك تاپسىرىستىڭ كوبەيۋى دە سونىڭ دالەلى.
مەرەكەگە دايىندىق «نيەت وتىنان» باستالدى
– بۇگىن-ەرتەڭ گۋمانيتارلىق كوللەدج 70 جىلدىق مەرەيتويىن اتاپ وتكەلى وتىر. ءوزدەرىڭىزگە ۇلكەن جاۋاپكەرشىلىك جۇكتەيتىن ماڭىزدى شاراعا دايىندىقتارىڭىز قالاي?
– بيىلعى مەرەيتويعا دايىندىقتى ءبىز «نيەت وتى» ۇرانىمەن بىلتىر قازان ايىندا باستاپ كەتتىك. مەرەيتويعا بايلانىستى وتەتىن شارالاردىڭ سالتاناتتى اشىلۋىنا رەسپۋبليكانىڭ تۇكپىر-تۇكپىرىنەن قوناقتار شاقىرىلدى. شارا بارىسىندا بىزگە كەلگەن مەيماندار, اتا-انالار, ارداگەرلەر, وقىتۋشىلار, الەۋمەتتىك سەرىكتەستەر 70 جىلدىقتىڭ سيمۆولى – 7 شىراقتى كەزەكپەن جاقتى. مەرەكە قارساڭىندا بۇگىنگە دەيىن «قالدىرعان ءىزىڭ ءماڭگىلىك…» تاقىرىبىنداعى دوڭگەلەك ۇستەل, «جەتىستىككە جەتەر جول» تاقىرىبىندا ءار جىلعى ءبىتىرۋشى تۇلەكتەرمەن كەزدەسۋ, «شەبەردىڭ قولى ورتاق» تاقىرىبىمەن ستۋدەنتتەردىڭ شەبەر قولدارىنان شىققان ونەر تۋىندىلارىنىڭ كورمەسى, «اعارتۋ كۋبوگى» اتتى دەباتتان حالىقارالىق تۋرنير, «مەكتەپكە دەيىنگى مەكەمەلەردىڭ يننوۆاتسيالىق كەڭىستىگىندەگى بولاشاق ماماننىڭ كاسىبي قۇزىرەتتىلىگى: تاجىريبە, ىزدەنىستەر» تاقىرىبىنداعى جيىن, ستۋدەنتتەردىڭ جوبالارى كونكۋرسى, ءارتۇرلى سپورتتىق شارالار وتكىزىلدى.
ەندى تۋرا مەرەيتوي كۇنى – 16 قازاندا, ياعني, بۇگىن م.وتەمىسۇلى اتىنداعى وقۋشىلار سارايىندا حالىقارالىق عىلىمي-تاجىريبەلىك كونفەرەنتسيا وتەتىن بولادى. ال
17 قازان كۇنى جاستار سارايىندا سالتاناتتى جيىن ۇيىمداستىرماقشىمىز. مەرەيتويىمىزعا ارنايى شاقىرىلعانداردىڭ ىشىندە كوللەدجىمىزدى 1944-1959 جىلى باسقارعان حاميدۋللا نۇرتاەۆ پەن ماعان دەيىن 29 جىل بويى ديرەكتور بولعان وتىزباي سۇيىندىكوۆ اعامىز دا بار. ەكەۋى دە قازىر استانادا تۇرادى. بۇل – ءبىز ءۇشىن ۇلكەن قۋانىش.
– اڭگىمەڭىزگە راحمەت. گۋمانيتارلىق كوللەدج ۇجىمىن 70 جىلدىق مەرەيتويىمەن قۇتتىقتايمىز!
قىمبات توقتامۇرات
