ەلوردانىڭ سول جاعالاۋىنداعى تۇڭعىش پرەزيدەنت – ەلباسى مۋزەيى ءۇش قاباتتان تۇرادى.
ەلباسىنىڭ بالالىق شاعىنان باستاۋ الىپ, ەڭبەك جولىنان سىر شەرتەتىن بولىمدەر «قازاقستان ماقتانىشى» زالىنداعى سپورت ساڭلاقتارىنىڭ داڭقتى ساتتەرىمەن جالعاسادى. بۇل زالدىڭ ەرەكشەلىگى – مۇندا كەز كەلگەن ادام ينتەراكتيۆتى الاڭدا حوككەي, بوكس, ۆەلوسپورت جانە اۋىر اتلەتيكادان جارىستارعا قاتىسىپ, وزدەرىن جەڭىمپاز رەتىندە سەزىنە الادى. وعان قوسا سپورت سايىستارىنان جەڭىمپاز اتانعان جان سول ءساتىن سۋرەتكە ءتۇسىرىپ جانە ونى ەلەكتروندى پوشتاسىنا جولداي الادى.
مۋزەيدىڭ ماكەتىن بۇگە-شىگەسىنە دەيىن ويلاستىرعان وتاندىق ماماندار وزىق تەحنولوگيالاردى پايدالانعان. مىسالى, پلانشەتتى جادىگەرگە تاقاساڭىز بولدى, تەڭگەنىڭ بەدەرىندە بەينەلەنگەن ۇلتتىق تاڭبالار «ءتىرىلىپ» كەتكەندەي كورىنەدى. ەلباسىنىڭ سىرت ەلدەرگە ساپارى, الەم مىنبەرلەرىنەن ايتقان مالىمدەمەلەرىن دە وسىندا تىڭداۋعا مۇمكىندىك بار. مارتەبەلى ماراپاتتار, اۋەلى ارىپتەس, سوسىن دوس اتانعان ساياساتتاعى ساڭلاقتاردىڭ سىيلىقتارى. تۇتاس ءبىر قابىرعا – قىنابى قالىڭ قىلىشتار. ەلباسى قولى قالت ەتسە قازاقتىڭ قارا دومبىراسىن كۇمبىرلەتەتىنى بار, دومبىرا ءۇنى مۇندا دا ۇزىلمەيدى. مۋزەيدىڭ ەلەكتروندى كىتابى بار. ياعني وعان كەلۋشىلەردىڭ جىلى لەبىزدەرى مەن وتىنىشتەرى قاعاز بەتىنە ەمەس, كومپيۋتەرگە تۋرا تۇسەدى.
مۋزەيدىڭ جاڭا عيماراتىنداعى ەكسكۋرسيالار ون ادامنان اسپايتىن قوناقتار سانىنا 15 مينۋت سايىن ءجۇرىپ وتىرادى. كەلۋشىلەرگە بەتپەردە تاعۋ مىندەتتى.
