حوككەي جاس تاڭدامايدى
استانادا شايبالى حوككەيدەن وتكەن III قىسقى جاستار ويىندارى مارەسىنە جەتتى.
بيىل ءتورت جىلدا ءبىر رەت وتەتىن 2004-2005 جىلدارى تۋعان جاسوسپىرىمدەر باق سىناعان تارتىستى دوداعا شىعىس قازاقستان, قاراعاندى, قوستاناي, الماتى جانە اقمولا وبلىستارىنان جانە استانا, الماتى مەن اقتوبە قالالارىنان 8 كوماندا قاتىستى.
ەلوردانىڭ نامىسىن №10 سپورت مەكتەبىنىڭ حوككەيشىلەرى قورعادى. ناتيجەسىندە «استانا» كومانداسى جارىستا ۇزدىك ناتيجەگە قول جەتكىزىپ, جاستار ويىندارىنىڭ التىن جۇلدەسىن يەلەندى. تۋرنير يەلەرى ەشكىمگە ەسە جىبەرمەي, 21 ۇپاي جينادى.
– قارسىلاستاردىڭ ەشقايسىسى وسال ەمەس, سوندىقتان باسەكە وتە تارتىستى بولدى. ارينە, ءبىز تەك جەڭىسكە جەتۋدى كوزدەدىك. قىسقى جاستار ويىندارىندا ءبىرىنشى ورىن الۋ مەن ءۇشىن دە, كوماندا ءۇشىن دە, ءبىزدىڭ مەكتەبىمىز ءۇشىن دە اسا ماڭىزدى. ءتورت جىلدا ءبىر رەت وتەتىن جارىستا بوي كورسەتۋدىڭ ءوزى – ءبىر عانيبەت, ال تۇعىرعا ءبىرىنشى بوپ كوتەرىلۋدىڭ قۋانىشىن ايتىپ جەتكىزە الماسپىن, – دەدى «استانا» كومانداسىنىڭ شابۋىلشىسى بوگدان پەتروچەنكو.
سونىمەن قاتار, ءىىى قىسقى جاستار ويىندارىنىڭ قورىتىندىسى بويىنشا شىعىس قازاقستان وبلىسىنىڭ كومانداسى ەكىنشى ورىن السا, قاراعاندى وبلىسىنىڭ حوككەيشىلەرى قولا جۇلدەنى قاناعات تۇتتى.