قازاقتىڭ كۇي ونەرى توكپە جانە شەرتپە سىندى ەكى ۇلكەن باعىتقا بولىنەتىنى بەلگىلى. بۇل ونەر ءتۇرى ايماقتىق ەرەكشەلىكتەرىنە قاراي بىرنەشە مەكتەپكە تارماقتالاتىنى دا ايان. وسىنىڭ ىشىندە كۇيشىلەردىڭ ورىنداۋشىلىق مانەرىنە ءمان بەرە بەرمەيدى ەكەنبىز.
ماسەلەن, قۇرمانعازى مەن دينانى الايىق. دينا كۇي اتاسىنىڭ شاكىرتى بولىپ سانالعانىمەن, كۇيدى بولەكشە تارتاتىن. تاتتىمبەتتىڭ كۇيلەرىن ابىكەن حاسەنوۆ جەتكىزسە, ابىكەننىڭ دە وزىندىك مانەرى بولدى. ارعى زامانداردى ايتپاعاندا, بەرتىندە ءۋالي بەكەنوۆ, قالي جانتىلەۋوۆ, تاعى باسقا وسى قاتارعا كىرەتىن اسقان كۇيشىلەر وزدەرىنىڭ ورىنداۋشىلىق داستۇرلەرىن قالىپتاستىردى. قازىر ارامىزدا سول ءداستۇردى ۇستاپ قالعان كۇيشىلەر بار. الايدا سونداي ادامدار از.
جۋىردا وسىنداي اڭگىمەنى №3 مۋزىكالىق مەكتەپتە شەبەرلىك ساباعىن وتكىزگەن كۇيشى, كومپوزيتور, ديريجەر, قازاقستاننىڭ ەڭبەك سىڭىرگەن قايراتكەرى ايتقالي جايىموۆتىڭ اۋزىنان ەستىدىك. ءىس-شارانى «قازاق كۇيشىلەرى» قوعامدىق قورى ۇيىمداستىردى.
مايتالمان مۋزىكانتتىڭ پىكىرىنشە, كۇيشىنىڭ ورىنداۋشىلىق مانەرىن ونىڭ ءستيلى دەپ اتاساق, قازىرگى دومبىراشىلاردا سول ءستيلدى ساقتاۋ جوعالىپ بارادى. بۇگىنگى ورىنداۋشىلار «ادايدى» نەمەسە باسقا بەلگىلى ءبىر كۇيلەردى تارتقاندا ارتىق يىرىمدەردى كوپ قوسادى. بايسالدى, بىرقالىپتى تارتۋ جوق, تىم جىلدامداتىپ جىبەرەدى. اقىرى كۇي نە اندا, نە مىندا ەمەس باستاپقى قالپىنان اجىراعان بولىپ شىعادى.
شەبەرلىك ساباعىندا ول كۇي ورىنداۋعا بايلانىستى ءبىراز پايدالى كەڭەستەردى بەرىپ, قاتىسۋشىلاردىڭ سۇراقتارىنا جاۋاپ بەردى.
