ەلباسىنىڭ «بولاشاققا باعدار: رۋحاني جاڭعىرۋ» مەن «ۇلى دالانىڭ جەتى قىرى» اتتى ماقالاسىندا ايتىلعان مىندەتتەردى ىسكە اسىرۋ ماقساتىندا «Qazaq Epos» اعارتۋ جوباسى «تۇلپار ءمىنىپ, تۋ العان!» دەگەن بايقاۋ جاريالادى.
بۇل بايقاۋ رەسپۋبليكا بويىنشا 6-10-سىنىپ وقۋشىلارى اراسىندا ۇيىمداستىرىلىپ وتىر. شارا اياسىندا قاتىسۋشىلار تاريحىمىزداعى ەڭ كونە ەپوستاردىڭ ءبىرى «قوبىلاندى باتىر» جىرىنىڭ ماراباي جىراۋ نۇسقاسىن جاتقا ايتىپ, جىردىڭ ىشىندەگى كونەرگەن سوزدەردىڭ ماعىناسىن اشىپ, 6-10-سىنىپتىڭ قازاق ءتىلى مەن ادەبيەتى وقۋلىعى بويىنشا ازىرلەنگەن سۇراقتارعا جاۋاپ بەرەدى.
بايقاۋ ەلىمىزدەگى 5000 مەكتەپتەن 50000 وقۋشى مەن 25000 مۇعالىمدى قامتيدى. وعان ءار مەكتەپتەن 10 وقۋشى قاتىسادى. جوبا 3 كەزەڭنەن تۇرادى: 1-كەزەڭ – اۋداندىق, 2-كەزەڭ – وبلىستىق, 3-كەزەڭ رەسپۋبليكالىق دەڭگەيدە بولادى. جەڭىمپازدارعا قوماقتى قارجىلاي سىيلىق بەرىلەدى.
جوبا اياسىندا 107 بەتتەن تۇراتىن «قوبىلاندى باتىر» جىرىن 50000 وقۋشىعا تولىق جاتتاتۋ كوزدەلىپ وتىر. ويتكەنى ۇيىمداستىرۋشىلار قول جەتكىزگەن ناتيجەنى تاريحي بەلگىلەۋ ءۇشىن گيننەسس رەكوردتار كىتابىنا ەنگىزۋ جوسپارلانعان.
