استانالىق ساياباقتىڭ 800 شارشى مەتر اۋماعىندا ەرەكشە قاجەتتىلىگى بار بالالار ءۇشىن قولجەتىمدى «Kunshyaq» ينكليۋزيۆتى بالالار الاڭ اشىلدى.
قالالىق ەسىل اۋدانى اكىمدىگى مەن «روتاري-كلۋب استانا» قوعامدىق بىرلەستىگى بىرلەسىپ وتكىزگەن بۇل شاراعا اقش-تىڭ قازاقستانداعى ەلشىلىگىنىڭ وكىلدەرى دە قاتىستى. شارا بارىسىندا بۇلدىرشىندەردەن قۇرالعان «زامانداس» توبى ءان ايتىپ, بي بيلەپ, كوپشىلىككە قۋانىش سىيلادى. سونىمەن قاتار ءتۇرلى سپورتتىق ويىندار ويناتىلىپ, دەمەۋشىلەر تاراپىنان داستارقان جايىلىپ, بالالارعا كىتاپتار سىيلىققا بەرىلدى. بۇل الاڭدا مۇگەدەكتەر ارباسىنىڭ كىرۋ مۇمكىندىگى بار ويىن كەشەندەرى, ەرەكشە قاجەتتىلىكتەرى بار بالالارعا ارنالعان قاۋىپسىز اتكەنشەكتەر, بەيىمدەلگەن قۇمسالعىش ۇستەلدەرى, ارنايى تاكتيلدى پانەلدەرمەن 15 ءتۇرلى قوندىرعىلار ورناتىلعان. ءىس-شاراعا قاتىسقان نۇر-سۇلتان قالاسى اكىمىنىڭ ورىنباسارى باقتيار ماكەن بۇل ەرەكشە قاجەتتىلىكتەرى بار بالالارعا ارنالعان ينكليۋزيۆتى الاڭ ولاردىڭ الەۋمەتكە بەيىمدەلۋىنە كومەكتەسەدى, اكىمشىلىك تاراپىنان ءبىز ارقاشاندا قولداۋ كورسەتەمىز دەپ اتاپ ءوتتى.
