كەشە قر پرەزيدەنتى جانىنداعى ورتالىق كوممۋنيكاتسيالار قىزمەتىنىڭ ءداستۇرلى بريفينگى ءوتتى. ورتالىقتىڭ رەسمي وكىلى التاي ابيبۋللاەۆ ۇكىمەت مۇشەلەرىنىڭ جۇمىس جوسپارىمەن تانىستىردى.
سونىمەن, ەرتەڭ قر پرەمەر-مينيسترى سەرىك احمەتوۆتىڭ ءتوراعالىعىمەن ۇكىمەت وتىرىسى وتەدى. وندا ەلدەگى كاسىپكەرلىك پەن بيزنەستىڭ جاي-كۇيى تالقىلانادى دەپ جوسپارلانىپ وتىر. 12 ناۋرىزدا ەكونوميكالىق ساياسات جونىندەگى كەڭەستىڭ كەزەكتى وتىرىسى وتكىزىلىپ, مەملەكەتتىڭ الەۋمەتتىك-ەكونوميكالىق دامۋ ماسەلەسى اڭگىمە وزەگىنە اينالماق.
ال, 14 ناۋرىزدا ۇكىمەت باسشىسى جۇمىس ساپارىمەن الماتىعا بارادى. ساپار اياسىندا كاسىپكەرلەرگە قىزمەت كورسەتۋ ورتالىعى مەن ناقتى سەكتوردىڭ نىساندارىنا بارىپ, وعان قوسا, ىسكەرلىك توپ وكىلدەرىمەن كەزدەسىپ, قالانىڭ دامۋ ماسەلەلەرى بويىنشا ءماجىلىس وتكىزەدى دەپ كۇتىلۋدە.
بۇدان بولەك, قازاقستان ۇكىمەتىنىڭ دەلەگاتسياسى 15 ناۋرىزدا ماسكەۋدە وتەتىن تمد ەكونوميكالىق كەڭەسىنىڭ 57-ءشى وتىرىسىنا قاتىسادى. وندا 2020 جىلعا دەيىنگى تمد-عا قاتىسۋشى مەملەكەتتەردىڭ يننوۆاتسيالىق ىنتىماقتاستىعى مەملەكەتارالىق باعدارلاماسىنىڭ ىسكە اسىرىلۋى بارىسى تۋرالى ماسەلەلەر تالقىعا سالىنادى. ورتالىق وكىلىنىڭ مالىمدەۋىنشە, 13-15 ناۋرىز ارالىعىندا حەلسينكي قالاسىندا كەزەكتى قازاقستان-فين بيزنەس فورۋمى وتەدى.
– وعان قر قورشاعان ورتانى قورعاۋ ءمينيسترى نۇرلان قاپپاروۆ, قۇزىرلى مينيسترلىكتەر مەن ۆەدومستۆولاردىڭ وكىلدەرى جانە ەلىمىزدىڭ ىسكەرلىك توپتار وكىلدەرى قاتىسادى دەپ جوسپارلانعان, – دەدى ا.ابيبۋللاەۆ.
ا.شوشاەۆا
