ناۋرىز – جىلدىڭ باسى, كۇن مەن ءتۇننىڭ تەڭەلەر شاعى. تامىرىن تەرەڭنەن تارتقان وسىناۋ مەيرام – بەرەكە مەن بىرلىكتىڭ نىشانى. تازالىق پەن تاتۋلىقتىڭ تۇعىرىن نىعايتىپ, رياسىز شاتتىق پەن قۋانىشقا كەنەلتەر ۇلى مەرەكە. اسپان دەنەلەرى ەڭ باستاپقى نۇكتەلەرىندە توعىسادى. كۇن مەن ءتۇن تەڭەلەدى. جان-جانۋارلار تولدەرىن ورگىزەدى. سول جارىقتىق تابيعاتتىڭ تۇلەپ, جاڭاراتىن شاعى – وسى ناۋرىز. جەر ۇستىنە تىلمەن ايتىپ جەتكىزگىسىز كەرەمەت ءبىر شاتتىق ورناي قالادى. ناۋرىز دەپ وتىرعانىمىز, جاڭا كۇن دەپ جار سالاتىن قۋانىشىمىز – وسى.
ناۋرىز كوپتەگەن حالىقتاردىڭ ءداستۇرلى مەيرامى رەتىندە باعزى زامانداردان تويلانىپ كەلەدى. بۇل مەرەكەنىڭ دىنگە, نە بولماسا جەكەلەگەن ۇلتتارعا ەش قاتىسى جوق. ناۋرىز – قازاقتىڭ شىن ماعىناسىنداعى ۇلت مەيرامى. ناۋرىزدى قازاقتان باسقا كۇنشىعىس جۇرتتارىنىڭ كوبى, ماسەلەن, ءۇندىستان, يران, اۋعانستان, ورتالىق ازيا جانە كاۆكاز حالىقتارى دا مەيرام ەتەدى. ناۋرىز قازاق حالقى ءۇشىن ايرىقشا سىيىمدى, ارتىقشا دالەلدى مەيرام بولىپ كەلەدى. ەسكىشە ناۋرىزدىڭ 9-ىندا, جاڭاشا 22-سىندە كۇن مەن ءتۇن تەڭەلەدى, قىس ءوتىپ, جاز جەتىپ, شارۋا كەنەلەدى. قىس بويى اق كەبىنىن جامىلىپ, ءولىم توسەگىندە جاتقان تابيعاتتىڭ, جاندى-جانسىزدىڭ ءتىرىلۋى كىمنىڭ بولسا دا كوڭىلىنە شاتتىق بەرەتىنى انىق. تىرشىلىك جاعىنان قىستىڭ وتۋىنە, جازدىڭ جەتۋىنە بارلىق ءتىرى جان قۋانادى.
تابيعات انانىڭ قۇشاعىن ءجىبىتىپ, جاھانعا جىلۋلىق پەن نۇر – شۋاعىن شاشىپ, تىرشىلىك اتاۋلىعا ءنار بەرگەن كوكتەمنىڭ كورىكتى مەيرامى – ۇلىستىڭ ۇلى كۇنىن ەلىمىزدىڭ تۇكپىر-تۇكپىرىندە قۋانىشپەن اتاپ وتۋدە. توبەسى كورىنىپ تۇرعان جاقسىلىقتى لايىقتى قارسى الۋ, وسىعان ءماز-مەيرام ازىرلەنۋدىڭ ءوزى – عانيبەت. تويدىڭ بولعانىنان بولادىسى قىزىق. توي بولعاندا, قانداي توي – ناۋرىز تويى!
ساناۋلى كۇندەردەن كەيىن ءاز ناۋرىز دۇنيە ەسىگىن اشادى. تاريح قويناۋىنا تاعى ءبىر جىلىمىز جول تارتىپ, تاعى ءبىر جىل تابالدىرىقتان اتتايدى. جاڭا كۇن توڭىرەككە نۇر-شاپاعاتىن توگەدى. جەر بەتىنە جاقسىلىق اكەلەتىن ۇلىستىڭ ۇلى كۇنىن شات-شادىمان كوڭىلمەن قارسى الايىق, اعايىن!
ا.باقاشباەۆا,
استانا قالاسى ادىلەت باسقارماسىنىڭ
جەتەكشى مامانى
