ەلوردادا سانيتارلىق-ەپيدەميولوگيالىق سالا ماماندارى مەن نۇر-سۇلتان قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسى بىرلەسىپ كارانتين ءتارتىبىنىڭ جەڭىلدەۋىنە وراي كاسىپكەرلىك قىزمەتتىڭ بىرقاتار نىساندارىن ارالادى. كاسىپورىنداردىڭ جۇمىسىن جانداندىرۋعا دايىندىعىن تەكسەردى.
ءموبيلدى توپ «تەحنودوم» تۇرمىستىق تەحنيكا جانە ەلەكترونيكا دۇكەنى, «حان شاتىر» ساۋدا ويىن-ساۋىق ورتالىعى, «FERRUM» مەيرامحاناسى, «كەراميكا الەمى» ساۋدا ورنى مەن «Aisha Bibi» قوناق ءۇيىن ارالاپ, اتالمىش نىسانداردا سانيتارلىق قورعانىس قۇرالدارىنىڭ (سانيتايزەرلەر, تەپلوۆيزورلار, ماسكالار جانە ت.ب.) بار-جوعى جانە ءتيىستى تالاپتاردىڭ ورىندالۋىن تەكسەردى, بارلىق سانيتارلىق تالاپتار بويىنشا ءتۇسىندىرۋ جۇمىستارىن جۇرگىزدى.
«ءبىز باس سانيتاردىڭ قاۋلىسىنا باعىنامىز, قوناقتار مەن قىزمەتكەرلەرگە بەتپەردە بەرەمىز, بارلىق جەردە سانيتارلىق قورعانىس قۇرالدارى ورناتىلاتىن بولادى. بۇگىن ايتىلعان ۇسىنىستار مەن ەسكەرتپەلەر – ءبىز ءۇشىن ماڭىزدى. بەتتۇمشا تاعۋ ءتارتىبىن قاداعالاپ وتىرۋ قاجەت. ساۋدا ورنىنىڭ سىيىمدىلىعى 30 پايىزدان اسپايتىن بولادى» دەدى «تەحنودوم» دۇكەنى قالالىق بولىمشەلەر ءبىرى ديرەكتورى بوتاگوز بايمۇحان.
ءموبيلدى توپ مۇشەلەرى كەلەسى كەزەكتە «حان شاتىر» ساۋدا ويىن-ساۋىق ورتالىعىنا جول تارتتى. «ساۋدا ۇيىنە كىرە بەرىستە وزدىگىنەن جۇمىس ىستەيتىن تەمپەراتۋرانى باقىلاۋعا ارنالعان قۇرىلعى ورناتىلعان. بۇگىندە ساعات 17:00-گە دەيىن قىزمەت كورسەتىلەدى, ءدارىحانا مەن سۋپەرماركەت قانا جۇمىس ىستەپ جاتىر» دەدى «حان شاتىر» ساۋدا ويىن-ساۋىق ورتالىعىنىڭ وپەراتسيالىق مەنەدجەرى تەمىربەك شوقانوۆ.
سونداي-اق ونىڭ ايتۋىنشا, دەزينفەكتسيا جۇرگىزەتىن كومپانيامەن قوسىمشا شارت جاسالىپتى. دەمالىس كۇندەرى ورتالىقتا اۋقىمدى دەزينفەكتسيا جۇمىستارى جۇرگىزىلمەك.
ال «FERRUM» مەيرامحاناسىندا ارنايى ماماندار قىزمەتكەرلەرگە جۇمىس ىستەۋ الگوريتمى مەن سانيتارلىق-ەپيدەميولوگيالىق تالاپتاردىڭ ساقتالۋىن ءتۇسىندىردى.
«ءبىز قوناقتاردىڭ الەۋمەتتىك اراقاشىقتىقتى ساقتاۋى ءۇشىن ەدەنگە ارنايى بەلگىلەر ورناتتىق. ەگەر ولار بەتپەردەسىز بولسا, ءبىر رەتتىك ماسكانى ۇسىنامىز, تەمپەراتۋراسىن ولشەيمىز. دەنە تەمپەراتۋراسى 37 گرادۋستان جوعارى بولسا, ىشكە كىرە المايدى. كەشىرىم سۇراپ, سىپايى تۇردە مەيرامحانادان شىعىپ كەتۋىن وتىنەمىز. زال 40 ادامعا ەسەپتەلگەن, بىراق قازىر 24 ورىنعا دەيىن قىسقاردى» دەيدى «FERRUM» مەيرامحاناسىنىڭ اكىمشىسى راۋشان ءاشىمحان.
«Aisha Bibi» قوناق ءۇيىنىڭ باسقارۋشى ديرەكتورى ناتاليا تسوي سانيتارلىق-ەپيدەميولوگيالىق تالاپتاردىڭ ساقتالاتىنىنا سەندىردى. ايتىلعان سىن-ەسكەرتپەلەرگە قۇلاق اسىپ, از ۋاقىتتا جونگە كەلتىرەتىنىن ايتتى. «بىزدە انتيسەپتيكتەر مەن ماسكالاردىڭ ساپاسىنا ارنالعان ارنايى سەرتيفيكاتتار بار, تەك قانا تەكسەرىلگەن مەديتسينالىق انتيسەپتيكتى قولدانامىز. بۇگىندە قوناق ۇيدە 15-كە جۋىق قىزمەتكەر جۇمىس ىستەيدى. كەلۋشىلەر از, بانكەت زالى جابىق, تەك جازعى تەرراسا جۇمىس ىستەيدى. جازعى تەرراسادا 30-دان اسا ورىندىق قويىلعان, مۇنى رەتتەيمىز. اراقاشىقتىق ساقتالماعان ورىنداردى جونگە كەلتىرەمىز» دەدى ول.
«كەراميكا الەمى» ساۋدا ورنىنىڭ جەتەكشىسى بارلىق تالاپتارعا ساي جۇمىس ىستەپ جاتقانىن جەتكىزدى. «دۇكەن قىزمەتكەرلەرى, كەلۋشىلەر بارلىق سانيتارلىق تالاپتاردى ساقتايدى. ادامداردىڭ اعىنى از. قازىر 10 قىزمەتكەر جۇمىس ىستەيدى, اۋىسىم بويىنشا كەزەكتەسەدى, سانيتايزەرلەر مەن انتيسەپتيكتەر ورناتىلدى. ساتىپ الۋشىلاردىڭ الەۋمەتتىك اراقاشىقتىقتى ساقتاۋى ءۇشىن ەدەنگە ارنايى بەلگىلەر ورناتۋ قاجەت, ونى تەز ارادا تۇزەتەمىز» دەپ ۋادە بەردى ساۋدا ءۇيىنىڭ ديرەكتورى كوركمازوۆا ءمولدىر.
«بۇگىن ءبىز بيزنەس نىساندارىنىڭ جۇمىسىمەن تانىستىق, سانيتارلىق تالاپتاردىڭ ساقتالۋىنا باقىلاۋ جۇرگىزدىك. قازىرگى كەزدە ەپيداحۋال جاقسارىپ كەلەدى. سوندىقتان قالالالىق بيزنەس نىساندارى باس سانيتار مەن مەملەكەتتىك كوميسسيا شەشىم شىعارعان سوڭ, جۇمىسىن جانداندىرادى. مەملەكەتتىك كوميسسيانىڭ سوڭعى شەشىمىنەن كەيىن قاي كاسىپورىنداردىڭ قايتادان جۇمىس ىستەيتىنى بەلگىلى بولادى. بۇگىن الدىن الا تەكسەردىك, ءتۇسىندىرۋ جۇمىستارىن جۇرگىزەمىز» دەدى نۇر-سۇلتان قالاسى ينۆەستيتسيالار جانە كاسىپكەرلىكتى دامىتۋ باسقارماسىنىڭ باسشىسى ەرلان بەكمىرزاەۆ.
ونىڭ ايتۋىنشا, ەلوردالىق بيزنەس نىساندارى كارانتين ءتارتىبىنىڭ كەزەڭ-كەزەڭىمەن جەڭىلدەۋىنە وراي دايىندىق جۇمىستارىن جۇرگىزۋدە. «سانيتارلىق-ەپيدەميولوگيالىق سالا ماماندارىمەن بىرگە كەمشىلىكتەر انىقتالدى. ونى تۇزەتۋگە دە ۋاقىت بار. مەنىڭ ويىمشا, ءار كاسىپكەر كوروناۆيرۋس قاۋپىن تۇسىنەدى جانە سانيتارلىق تالاپتاردى ساقتاۋعا جاۋاپكەرشىلىكپەن قارايدى. ال قالا تۇرعىندارى اتالعان تالاپتارعا باعىنۋ قاجەت» دەپ تۇيىندەدى ەرلان بەكمىرزاەۆ.
نايما نۇرالىقىزى
