ەلورداداعى مۇسىندەر پىشىنىمەن عانا ەمەس, كەڭ اۋقىمدى كومپوزيتسيالارىمەن دە نازار اۋدارتادى. وسىدان ونشاقتى جىل بۇرىن ج.تاشەنوۆ كوشەسىندەگى سكۆەردە ورنالاسقان «استانا» وبرازىنداعى قازاق قىزىنىڭ مۇسىنىنە توقتاي قالىپ قارايتىنبىز. ودان باسقا وڭ جاعالاۋدان ورىن تەپكەن قىتاي جۇلدىز جورامالى نەگىزىندەگى جانۋارلار بەينەسىندەگى كومپوزيتسيا, مۋزىكالى فونتاننىڭ اينالاسىنداعى تسيرك ارتىستەرى مەن جانۋارلاردىڭ جانە ورتاسىندا التىن ءتۇستى ەكۆيليبريست ۇلدىڭ مۇسىنىنەن تۇراتىن «تسيرك» كومپوزيتسياسى باس قالاعا ەرەكشە كورىك بەرەدى.
بۇل كۇندە ەلوردا كوشەلەرىندە قالا تۇرعىندارى مەن قوناقتارى ءۇشىن كوز توقتاتىپ قارايتىن شاعىن مۇسىندەر كوپ. ونىڭ كوبى «قازاقستاننىڭ شاعىن ارحيتەكتۋرالىق فورمالارى جانە استانانىڭ ساندىك ءمۇسىنى» بايقاۋىنىڭ ناتيجەسىندە پايدا بولعانى بەلگىلى.
سول جاعالاۋعا كەلسەك, «عاشىقتار ساياباعىنداعى» قىز بەن جىگىت, «التىن جۇرەك» ءمۇسىنى تۋريستەردىڭ سۇيىكتى ورنىنا اينالعان. «قالالىقتار» سەرياسى مۇسىندەرىنەن بايتەرەكتىڭ ماڭىنداعى باسىنا بەيسبولكا كيىپ, مولبەرتكە بەرىلە سۋرەت سالىپ وتىرعان «سۋرەتشى قىزبەن» سۋرەتكە تۇسەتىن جاستاردىڭ قاراسى استە ازايمايدى. سونداي اق دوڭگەلەك الاڭداعى «عاشىعىمەن كەزدەسۋگە اسىققان قىز», سىرلاسىپ وتىرعان عاشىقتار, دەمالىپ وتىرعان ادام – قالا ءومىرىن بەينەلەيدى. كوپىردىڭ استىنان دالاعا شابا جونەلەتىندەي بوپ تۇرعان ءبىر ءۇيىر جىلقى, قوبىز تارتقان باقسى, كوشپەندىلەر – تۇركىلەردىڭ وتكەن تاريحىنان اسەر بەرەدى.
«The Ritz-Carlton» قوناقۇيى الدىنداعى ايبارلى ارىستاندار, «Hilton Garden» الدىنداعى قۇمىرسقانىڭ ءمۇسىنى ەرەكشە كورىكتى. «Rixos» قوناق ءۇيى الدىنداعى التىن توگىلگەن قۇمىرا ەلىمىزدىڭ بايلىعىن, ۇلى جىبەك جولىن بەينەلەيدى. ورتالىق ساياباقتاعى ورىندىققا جايعاسقان ءۇش مايمىل, استانا تسيركى اۋلاسىنداعى قاڭباق شال, الدار كوسە, قوجاناسىر, ماقتا قىز بەن مىسىق, كۇنىكەي قىز باستاعان ەرتەگى كەيىپكەرلەرى قالا قوناقتارى مەن شەتەلدىكتەردى جاعىمدى اسەرگە بولەيدى.
جادىرا شامۇراتوۆا
