كۋالىكتەر كارتالارعا اۋىستى
قالا اكىمدىگىندە مەملەكەتتىك قىزمەت سالاسىندا قابىلدانعان جاڭاشىلدىققا ارنالعان ءباسپاسوز ماسليحاتى ءوتتى.اعىمداعى جىلى 26 قاراشادا «مەملەكەتتىك قىزمەت تۋرالى» زاڭعا قۇقىق قولدانۋ تاجىريبەسى بارىسىندا انىقتالعان كەيبىر ولقىلىقتار مەن قاقتىعىستاردى جويۋ ءۇشىن وزگەرتۋلەر ەنگىزىلگەنى بەلگىلى. وسى ورايدا مەملەكەتتىك قىزمەت ىستەرى اگەنتتىگى نۇر-سۇلتان قالاسى بويىنشا دەپارتامەنتىنىڭ باسشىسى جاندوس سارسەن بۇل ماجىلىستە بىرقاتار وزگەرىستەردى اتاپ ءوتتى. ونىڭ ايتۋىنشا, اكىمشىلىك لاۋازىمدارعا كونكۋرستان تىس تاعايىنداۋعا قۇقىعى بار ادامداردىڭ سانى كەڭەيتىلدى. بوس باسشىلىق لاۋازىمداردى جەدەل تولتىرۋ ءۇشىن باسشىلىق لاۋازىمداردىڭ مىندەتتەرىن ۋاقىتشا تاعايىنداۋ مەرزىمى 3 ايمەن شەكتەلگەن جانە مەملەكەتتىك ورگانداردىڭ ءبىرىنشى باسشىلارىنىڭ كومەكشىلەرى مەن كەڭەسشىلەرىنە باسشىلىق لاۋازىمداردىڭ مىندەتتەرىن ۋاقىتشا تاعايىنداۋعا تىيىم سالىندى. بۇرىن مەملەكەتتىك قىزمەتشىلەردى وقىتۋ تەك مەملەكەتتىك باسقارۋ اكادەمياسىندا جۇزەگە اسىرىلىپ كەلسە, ەندىگى كەزەكتە قر پرەزيدەنتىنىڭ جانىنداعى ءبىلىم بەرۋ ۇيىمدارىندا جانە ولاردىڭ فيليالدارىندا, دەربەس ءبىلىم بەرۋ ۇيىمدارىندا جۇزەگە اسىرىلادى. قابىلدانعان زاڭعا سايكەس, دامىعان ەلدەردە قولدانىلاتىن جاڭاشىلدىقتار ەنگىزىلەتىن بولادى. وسىلايشا حالىقارالىق تاجىريبەگە ساي مەملەكەتتىك قىزمەتشىلەردىڭ كوپشىلىگىنىڭ قىزمەتتىك كۋالىكتەرى سايكەستەندىرۋ كارتالارىنا اۋىستىرىلادى. «نەگىزگى جالپى تۇزەتۋلەر, ياعني كونكۋرس راسىمدەرىن جەتىلدىرۋگە, كادر ماسەلەلەرىن شەشۋدە مەملەكەتتىك ورگانداردىڭ جەدەلدىگىن ارتتىرۋعا, كادرلاردىڭ جەتىسپەۋشىلىگى قاۋپىن تومەندەتۋگە, مەملەكەتتىك قىزمەتشىلەردىڭ جاۋاپكەرشىلىگىن جوعارىلاتۋعا باعىتتالىپ, كاسىبي مەملەكەتتىك اپپارات قۇرۋعا مۇمكىندىك بەرەدى» دەدى ج.سارسەن.