ءتۋريزمدى دامىتۋعا ارنالعان كورمە

تۇڭعىش پرەزيدەنت مەرەكەسى اياسىندا قر ۇلتتىق مۇراجايىندا ءتۋريزمدى دامىتۋ ماقساتىندا «ورال: قازاقستاننىڭ باتىس قاقپاسى» فوتوكورمەسى اشىلدى.باتىس قازاقستان ايماعىندا ءتۋريزمنىڭ دامۋ مۇمكىندىكتەرىن كورسەتۋ; پەرسپەكتيۆتى تۋريستىك مارشرۋتتاردى كەڭىنەن ناسيحاتتاۋ; تۋريستىك باعىتتاردى جاڭارتۋ; تۋريستىك الەۋەتتى زەرتتەۋدى ماقسات ەتكەن «ارايلى اقجايىق» ەكسپەديتسياسى وتكىزىلگەن بولاتىن. قر ۇلتتىق مۇراجايىندا ەكسپەديتسيا كەزىندە تۇسىرىلگەن جانە تاڭداپ الىنعان 30 فوتوسۋرەت قويىلعان, «ارايلى اقجايىق» ەكسپەديتسياسىنىڭ فوتوسۋرەتتەرى مەن ماقالالار «National Geographic Kazakhstan» جانە رەسەيدەگى «National geographic» جۋرنالدارىندا جاريالاندى. ەلىمىزدىڭ سولتۇستىك-باتىسىندا ورنالاسقان, جالپى اۋماعى 151,3 مىڭ شاقىرىم قۇرايتىن باتىس قازاقستان وبلىسى ءوزىنىڭ جاعىراپيالىق ورنالاسۋى جاعىنان ءتۋريزمدى دامىتۋعا اسا قولايلى ءوڭىر بولىپ تابىلادى. وبلىس قازاقستاننىڭ اتىراۋ جانە اقتوبە وبلىستارىمەن, رەسەي فەدەراتسياسىنىڭ ساراتوۆ, ۆولگوگراد, ورىنبور, سامارا, استراحان سەكىلدى بەس بىردەي گۋبەرنياسىمەن شەكارالاس جاتىر. سونداي-اق ورال قالاسى اۋماعىنداعى جايىق وزەنى ەۋروپا مەن ازيا قۇرلىقتارىن ەكىگە ءبولىپ تۇر. سوندىقتان, باتىس قازاقستاندى ەۋرازيا كىندىگىندەگى وبلىس دەپ نىق سەنىممەن ايتۋعا بولادى.