ۇبت وتكەن ءبىر جۇما بويى تالاي تالاپكەردىڭ تاعدىرى شەشىلىپ, باعىتى باعدارلاندى. وسى سىناقتان سوڭ ءومىردەگى باستى قادام – ماماندىق تاڭداۋ ماسەلەسى كوپ تالاپكەردىڭ الدىنان شىعارى انىق.
ماماندىق تاڭداۋ – ومىردەگى ماڭىزدى قادامنىڭ ءبىرى. ءومىرىڭنىڭ اجىراماس بولشەگىنە اينالار ءىستى تاڭدار الدىندا ويىڭ سان-ساققا جۇگىرەرى انىق. ماماندىقتىڭ قىر-سىرىن جەتىك يگەرۋ, ءوز ءبىلىم دارەجەسىن ارقاشان جەتىلدىرىپ وتىرۋ – بىلىكتى ماماننىڭ باستى قاعيداسى. جۇرەك قالاۋىمەن تاڭدالعان ماماندىق – ءومىر تىرەگى.
قازىرگى تاڭدا سۇرانىسقا يە مامانداردى دايىنداۋ – بۇگىنگى تاڭداعى وزەكتى ماسەلە. ءوزىنىڭ يكەمى مەن قابىلەتى بار ماماندىقتى يگەرگەن ادام ءىس كوزىن تابادى. ءار ماماندىقتىڭ ءوز قىزىعى مەن شىجىعى بار. سونىڭ ءبارىن ۇرشىقتاي ءۇيىرىپ اكەتە الاتىن, كاسىبىن تىڭعىلىقتى يگەرگەن مامان – قازىرگى قوعامدا ۇلكەن سۇرانىسقا يە.
الايدا, كەيبىر مەكتەپ تۇلەكتەرىنىڭ ماماندىق تاڭدارداعى العىشارتى جوعارى جالاقىمەن بايلانىستىرىلاتىنى وكىنىشتى. دەگەنمەن, نارىقتىق زاماندا جالاقىنىڭ دا ەلەۋلى ورنى بار. اتا-انا دا بالاسىنىڭ ماماندىق تاڭدار كەزىندە قۇقىق قورعاۋ, قارجى, زاڭ سالاسىن تاڭداۋىنا ىقپال جاسايدى. ەل تاۋەلسىزدىك الىپ, نارىقتىق ەكونوميكالىق قاتىناسقا وتەر الدىندا اۋديت, قارجى سالاسىنداعى ماماندار ۇلكەن سۇرانىسقا يە بولدى. بۇگىنگى كۇنى ونەركاسىپتىڭ دامۋىمەن تەحنيكالىق ماماندىقتارعا سۇرانىس ارتىپ وتىر. دامۋشى قازاقستاننىڭ ونەركاسىپ سالاسىندا جاڭا تەحنيكالاردى يگەرۋ, ولاردى دۇرىس قولدانا ءبىلۋ جاڭا ماماندارعا دەگەن سۇرانىستى ارتتىرىپ وتىر. بىراق, جاستاردىڭ باسىم بولىگى تەحنيكالىق, ياعني دانەكەرلەۋشى, ەلەكتريك سىندى ماماندىقتارعا بارعىسى كەلمەسى انىق. الايدا, جوعارى ءبىلىمدى دەگەن اتى بار ديپلومدى الىپ, «ەكى قولعا ءبىر – كۇرەك» تابا الماي جۇرگەندەر قانشاما؟! سول سەبەپتى ناپاقاسىن ءوز ماماندىعىنان وزگە سالادان تاۋىپ جۇرگەن جاستار سانى كوپ. بۇگىنگى تاڭدا سۇرانىسقا يە, قوعامعا قاجەت ماماندىقتى يگەرگەن جاستىڭ اسىعى الشىسىنان تۇسەرى ءمالىم. سوندىقتان, «ماماندىعىم – ماقتانىشىم» دەپ ايتا الاتىن, ءوز ءىسىنىڭ حاس شەبەرلەرى بولىپ, قازاق ەلىنىڭ وركەندەۋىنە ۇلەس قوساتىن ازامات بولۋ ءۇشىن اۋەلى جانىڭىزعا جاقىن, ەكىنشىدەن, سۇرانىسقا يە كاسىپتى تاڭداعان دۇرىس دەپ سانايمىز.
جانار سالىباي,
ەۇۋ جۋرناليستيكا جانە ساياساتتانۋ
فاكۋلتەتىنىڭ 1-كۋرس ستۋدەنتى
