كەشە ەلوردادا «نارەستەنىڭ دەنساۋلىعىنا ينتەگرالدى قاراۋ» اتتى تاقىرىپتا عىلىمي كونفەرەنتسيا ءوتتى. كونفەرەنتسيانى قالالىق بالالار جۇقپالى اۋرۋلار اۋرۋحاناسى ۇيىمداستىردى. وعان ەلورداداعى بارلىق ەمدەۋ مەكەمەلەرىنىڭ جەتەكشىلەرى, سالاماتتى ومىر سالتىن قالىپتاستىرۋ ورتالىقتارىنىڭ وكىلدەرى قاتىستى. شارادان سوڭ اتالعان اۋرۋحانانىڭ باس دارىگەرىنىڭ مەديتسينالىق قىزمەت ساپاسىن قاداعالاۋ جونىندەگى ورىنباسارى روزا وتەگەنوۆامەن از-كەم سۇحباتتاسقان ەدىك.
– كونفەرەنتسيانىڭ كوتەرىپ وتىرعان تاقىرىبى قانشالىقتى ماڭىزدى؟
– جاز مەزگىلىنىڭ باستالعانىنا دا ءبىرشاما ۋاقىت بولدى. وسى ورايدا, اسىرەسە, بالالار اراسىندا جۇقپالى دەرتتىڭ ءورشىپ كەتەتىنى بار. بۇل باسقوسۋدىڭ ءسىز ايتقان ماڭىزدىلىعى دا, سالماعى دا وسىندا. كونفەرەنتسيادا جاڭا تۋعان ءسابي مەن 5 جاسقا دەيىنگى بالالار اراسىنداعى جۇقپالى اۋرۋلاردى ءتيىمدى ەمدەۋ مەن ءولىم-ءجىتىمدى ازايتۋعا باعىتتالعان جاڭا باعدارلامانىڭ ناتيجەسى تۋرالى باياندامالار جاسالىپ, ولاردىڭ قولدانىلۋى حاقىندا تاجىريبە ءبولىسۋ شارالارى جۇزەگە استى.
– تاعى دا كەڭىرەك توقتالىپ وتسەڭىز…
– جيىن بارىسىندا دارىگەرلەر سوڭعى جىلدارى جيناقتالعان تاجىريبەلەرىمەن بولىسەدى. ارىپتەستەر اراسىندا ونىڭ وڭ شەشىم تاپقان تۇستارىن كەڭەيتىپ ايتادى, كورسەتەدى. ءتىپتى, اتا-انالارعا دا كەڭەس بەرۋ ءۇشىن ارنايى قابىلدانعان باعدارلاما اياسىندا ەم-دومنىڭ ماڭىزى تۋرالى جان-جاقتى بايانداپ بەرەمىز. بۇل تاجىريبەنى ءبىز 2008 جىلدان باستاپ قولدانىسقا ەنگىزدىك. ەندى سونىڭ ناقتى ناتيجەلەرىنىڭ قانداي ەكەنىن كورسەتكىمىز كەلەدى.
– ناتيجە كوڭىل قۋانتاتىن بولار؟..
– ارينە, وسى سەكىلدى جيىنداردىڭ, باسقوسۋلاردىڭ, تاجىريبە الماسۋلاردىڭ ارقاسىندا بالا ءولىمى 2007 جىلمەن سالىستىرعاندا وتكەن جىلى 13 پايىزعا دەيىن ازايدى. بۇل از كورسەتكىش ەمەس.
– دارىگەرلەر تاراپىنا جۇرتشىلىقتان ايتىلار سىن از ەمەس. بالالار دارىگەرى قانداي بولۋ كەرەك؟
– سىرقاتتىڭ قاۋىپتى بەلگىلەرىنە دەر كەزىندە باعا بەرە الۋ – دارىگەردىڭ ەڭ ءبىرىنشى قاسيەتى بولۋ ءتيىس. ول – ادام جانىنىڭ اراشاشىسى. سوندىقتان, ول ءوز بىلىكتىلىگىنىڭ جوعارىلىعىن بالانىڭ ناۋقاسىن دۇرىس تانۋىمەن كورسەتە الادى. بالانى دۇرىس تاماقتاندىرۋدى اتا-اناسىنا شەگەلەپ ايتىپ جىبەرۋ دە ماڭىزدى. مەيىرىمدىلىك تە دارىگەردىڭ بولمىسىنان انىق بايقالۋى كەرەك. مۇنىڭ بارلىعىنىڭ دا بالا دەنساۋلىعىنا تيگىزەر وڭ اسەرى مول. وسىلار ەم ناتيجەلەرىن وزگەرتىپ, جاقسى كورسەتكىشتەرگە قول جەتكىزۋگە مۇمكىندىك تۋدىرادى.
شىنار ءابىلدا
