بالعىن سۋرەتشىلەر بوياۋى
«جەر – ءبىزدىڭ ورتاق ءۇيىمىز» اتتى رەسپۋبليكالىق بالالار ەكولوگيالىق پلەنەر بايقاۋى ءوز مارەسىنە جەتتى. بيىل بۇل بايقاۋ قازاقستاندا ونىنشى رەت وتكىزىلدى.
سوڭعى جىلدارى بايقاۋدى وتكىزۋدى قازاقستان يۋنەسكو كلۋبتارى ۇلتتىق فەدەراتسياسى ءوز قولىنا العان. العاشىندا بالالاردىڭ قولىمەن سالىنعان سۋرەتتەر ءبىر عانا اتالىم بويىنشا باعالانىپ كەلدى. ال, قازىرگى تاڭدا وعان زاماناۋي نوميناتسيالار كىرىكتىرىلگەن. ماسەلەن, وسى جىلى «ەكولوگيا جانە ينتەرەر ديزاينى» نوميناتسياسى بويىنشا ۆالەريا سكرەپتسوۆا جەڭىمپاز اتاندى. «ەكولوگيا جانە كوستيۋم ديزاينى» نوميناتسياسىنىڭ باس جۇلدەسىن اناستاسيا ۆۋندەر يەلەندى. «ەكولوگيا جانە ساۋلەت ونەرى» بويىنشا جۇلدەگەر كونستانتين كادۋركين بولدى. «ەكولوگيا جانە لاندشافت ديزاينى» بويىنشا جۇلدەنى الەنا درۋجينينا قانجىعاسىنا بايلادى.
بيىلعى پلەنەر ەسىلدىڭ جاعاسىندا وتكەنىن ەرەكشە اتاپ ايتقان ءجون. ەلورداعا ەلىمىزدىڭ تۇكپىر-تۇكپىرىندەگى كوركەمسۋرەت مەكتەپتەرىنىڭ جاس سۋرەتشىلەرى جينالدى. العاشقى جىلى بايقاۋعا 50 سۋرەتشى قاتىسۋعا نيەت بىلدىرگەن بولسا, ون جىل ىشىندە ولاردىڭ سانى ەكى مىڭنان اسىپ جىعىلعان ەكەن. ولارعا سۋرەت ونەرىنىڭ قىر-سىرىن ۇيرەتۋگە كاميل موللاشەۆ, اماندوس اقاناەۆ, ەرلان ايتۋاروۆ سىندى مايتالمان سۋرەتشىلەر ۇلەس قوسقان. قاتىسۋشىلاردىڭ دەنى بايقاۋداعى جەتىستىكتەرىنىڭ ارقاسىندا كەلەشەكتەگى ماماندىقتارىن تاڭداعان. ءار جىلدارى جەڭىمپاز اتانعان سۋرەتشىلەر بايقاۋ-دى ىستىق ىقىلاسپەن ەسكە العان بەينەباياندار استاناداعى وقۋشىلار سارايىندا وتكەن ماراپاتتاۋ راسىمىندە كورسەتىلدى. 2003 جىلعى باس جۇلدە يەگەرى سالتانات ساتىبالديەۆا بۇگىنگى تاڭدا وسى پلەنەردەگى جەڭىسىنىڭ اسەرىمەن جۇرگەنوۆ اتىنداعى قازاق ونەر اكادەمياسىن تامامداعان. قازىر بۇل جوبانىڭ باس دەمەۋشىسى «شەۆرون» كومپانياسى بولعانىمەن, قورشاعان ورتانى قورعاۋ, مادەنيەت جانە اقپارات, ءبىلىم جانە عىلىم مينيسترلىكتەرى, قالا اكىمدىگى دە تۇراقتى تۇردە قولداۋ كورسەتىپ كەلەدى.
سانجار كەڭەسوۆ, ل.گۋميلەۆ اتىنداعى ەۇۋ ستۋدەنتى