اتا زاڭعا وزگەرىستەر مەن تولىقتىرۋلار ەنگىزۋ جونىندە رەفەرەندۋم وتكىزۋدىڭ ماقساتى نە؟ باسقا دا زاڭداردى جاڭادان قابىلداۋدىڭ قانداي قاجەتتىگى بار؟
بۇل – قوعامدىق-ساياسي قاجەتتىلىك, ۋاقىتتىڭ تالابى. ازات ەلدىڭ رۋحىمەن سۋارىلعان ۇرپاق الدىندا جاڭا مىندەتتەردىڭ پايدا بولۋى – تابيعي زاڭدىلىق. تۋىنداعان كۇردەلى قيىندىقتان جول تابۋ, باتىل شەشىم قابىلداۋ – ەلىمىزدەگى ەڭ جوعارى لاۋازىمدى تۇلعا.
مەملەكەت باسشىسىنىڭ ۇتىمدى ۇيعارىمى, تۇتاس قوعامنىڭ قاسيەتتى بورىشى – ءار ادامنىڭ ازاماتتىق پارىزى. ومىردە بۇلجىمايتىن قۇندىلىق بار بولسا, بىزدىڭشە, ول – ۇلتتىڭ ار-ۇجدانى, ۇياتى مەن نامىسى, بىرلىگى مەن سەنىمى.
ال ساياسي رەفورما – مەملەكەتتىك باسقارۋدىڭ جاڭا تەتىكتەرىن قوسۋ, الەۋەتىن ارتتىرۋ دەگەن ءسوز. تاۋەلسىز – ەلىمىزدىڭ جاڭا كەزەڭى, تىڭ باستاماسى. رەفەرەندۋم – تاعدىرشەش ءتۇيىندى ماسەلەنى كوپشىلىكپەن بىرگە شەشەتىن ءراسىم, حالىقتىڭ تالابى مەن تاڭداۋى تارازىعا تۇسەتىن تۇس. ءومىردى, تۇرمىستى جاقسى جاعىنا وزگەرتۋ ءۇشىن قالىپتاسقان بيلىك تارماقتارى وكىلەتتىكتەرىن قايتا ءبولىپ, بەكىتۋ جەتكىلىكسىز بولار ەدى. شىنتۋايتىندا, رەفەرەندۋمعا ۇسىنىلىپ وتىرعان تولىقتىرۋلار مەن تۇزەتۋلەر ەلىمىزدى مودەرنيزاتسيالاۋعا باعىتتالىپ وتىر. تۇبەگەيلى وزگەرىستەر عانا مەملەكەتتىڭ دامۋىنا سەرپىن بەرىپ, وتانداستارىمىزدىڭ ساناسىنا, سەزىمىنە ىقپال ەتەدى.
«الەمنىڭ وزگەرۋىن قالاساڭ, سول وزگەرۋدىڭ العاشقىسى ءوزىڭ بول!» دەگەن ەكەن ماحاتما گاندي.
بۇل ءۇردىس, بازبىرەۋلەر ايتىپ قالعانداي, حالىقتى كەزەكتى الدارقاتۋ ەمەس. كەرىسىنشە, ونى بىرىكتىرەتىن, جۇمىلدىرا تۇسەتىن تاۋداي تالاپ, تەڭىزدەي تىلەك.
تۇسىنىكتى, قاراپايىم تىلمەن جازىلعان ءادىل زاڭعا تۇگەل باعىناتىن بولساق, ونىڭ ۇستەم بولارى حاق. ال وعان مويىنۇسىنباي, ءوزىمىز قابىلداعان زاڭعا ءاتۇستى قاراۋدان ارىلماساق, كوننىڭ قايتا قاتايىپ, ورنىنا كەلگەنىمەن بىردەي بولماق. زاڭسىزدىق پەن ادىلەتسىزدىكتىڭ, تەڭسىزدىك پەن تياناقسىزدىقتىڭ تەپەرىشىنە تۇسەمىز. وكىنىشكە قاراي, وندايدى باستان وتكەرگەن ەلدەردىڭ قاتارىندا از-كەم بولعانىمىز دا جاسىرىن ەمەس. باعزىدان قالعان قاناتتى ءسوز بار. ءمانىن ەسكە سالساق, «ساياساتتىڭ ەكى سەرتى بار, ءبىرى – اسىقپاۋ, ەكىنشىسى – كەشىكپەۋ». سوندىقتان, ءبىزدىڭ ەل عانا ەمەس, الەم جۇرتى قۇلاعىن ءتۇرىپ وتىرعان رەفەرەندۋم دەر كەزىندە وتكىزىلىپ وتىر دەپ پايىمدايمىز.
جالپى, شالا-جانسار نەمەسە جۇمىس ىستەمەيتىن ءولى زاڭ مەملەكەتتىڭ قابىرعاسىن سوگەدى, يمانسىزدىققا جول اشادى. بارشانىڭ بىردەي ورىنداۋى ءتيىس زاڭ عانا تاۋەلسىز ەلىمىزدىڭ ۇستىنىن مىقتايدى, مەرەيىن اسىرىپ, مارتەبەسىن ايقىندايدى. قاتاڭ تارتىپكە باعىنۋدى باياندى ەتەتىن دەموكراتيانى دامىتادى, جاڭارعان قازاقستاندىق جولىمىز وركەنيەتتى داڭعىلعا اينالادى. بۇل ءبىزدىڭ بۇگىنىمىز بەن ەرتەڭىمىز ءۇشىن ماڭىزدى.
شەشۋشى كەزەڭدەگى قادام بارشا حالقىمىزعا قۇتتى بولسىن!
دارحان مىڭباي,
پارلامەنت ءماجىلىسىنىڭ دەپۋتاتى
