ەلوردامىزدىڭ ايشىقتى قۇلشىلىق ءۇيى «ازىرەت سۇلتان» مەشىتىندە اقساقالدار القاسىنىڭ 2-كەزەكتى وتىرىسى بولىپ ءوتتى. قوعام جانە مەملەكەت قايراتكەرلەرىنەن قۇرالعان القا ماجىلىسىندە قازاقستان مۇسىلماندارى ءدىني باسقارماسىنىڭ استانا قالاسى بويىنشا وكىلى, «نۇر استانا» ورتالىق مەشىتىنىڭ باس يمامى ناۋرىزباي قاجى تاعانۇلى بيىلعى جارتىجىلدىقتا ەلوردالىق مەشىتتەردە اتقارىلعان جۇمىستار جونىندەگى ەسەبى جايلى مالىمدەدى.
وكىل يمامنىڭ سوزىنە سۇيەنسەك, قمدب جاريالاعان «ءدىن مەن ءداستۇر» جىلى اياسىندا قۇرىلعان رەسپۋبليكالىق جانە اقپاراتتىق ناسيحات توپتارى بۇگىنگە دەيىن 18 840 ادامدى قامتىعان. «تاربيە مەن ءبىلىم – ەگىز» جوباسى اياسىندا جوو-دارىنا قاراستى 9 جاتاقحانادا تاربيە ساعاتتارى وتكىزىلسە, مەكتەپ تۇلەكتەرىنە ارنالعان «جولىڭ بولسىن, جاس تۇلەك» اتتى رۋحاني كەشكە 1800-گە جۋىق وقۋشى قاتىسقان. ال, ءار جۇما سايىن 78500 ۋاعىز پاراقشالارى تاراتىلىپ, كالاداعى 7 مەشىتتە ورنالاستىرىلعان نۇكتەلەر ارقىلى 32 ونلاين-دارىستەر اپتانىڭ دۇيسەنبى جانە سەيسەنبى كۇندەرى جۇرگىزىلەدى. «ازىرەت سۇلتان» مەشىتىندە اشىلعان «حيكمەت» تەلەراديو كەشەنىندە «حالىق دانالىعى», «بالالارعا بازارلىق», «شەشەندىك سوزدەر», «اق باتا», «عيبراتناما» سەكىلدى باعدارلامالار اشىلىپ, 8550 سD تاسپالار تاراتىلدى. بۇقارالىق اقپارات قۇرالدارىندا 11 ماقالا جاريالانىپ, 7 بەينەۋاعىز, 5 الەۋمەتتىك روليك تۇسىرىلگەن.
وسى ايتىلعان اقپاراتتارعا كوڭىلى تولعان القا مۇشەلەرى مەشىت ۇجىمى اتقارىپ جاتقان ىستەرگە وڭ باعاسىن بەرىپ, ءوز ۇسىنىس, پىكىرلەرىن دە ورتاعا تاستادى. القا توراعاسى پروفەسسور, فيلوسوفيا عىلىمىنىڭ دوكتورى عاريفوللا ەسىم اتقارىلعان ىستەرگە توقتالا ءوتىپ, «ءدىن سالاسىنداعى قىزمەت شىندىعىندا بازبىرەۋلەر ويلاعانداي وڭاي ءىس ەمەس ەكەنىن بۇگىنگى ەلوردا مەشىتتەرىنىڭ جارتىجىلدىق ەسەبىنەن بايقاپ وتىرعان بولارسىزدار. كەيبىر ادامدار مولدانىڭ ءىسى تەك قۇران وقىپ, حالىقتىڭ ساداقاسىن قاعىپ وتىرۋ دەگەن تاياز پىكىر ايتادى. مەن مەشىت قىزمەتكەرلەرى تاراپىنان اتقارىلىپ جاتقان, اسىرەسە, قايىرىمدىلىق شارالارىنا باسا نازار اۋدارعىم كەلەدى. مۇمكىنشىلىگى شەكتەۋلى, مۇقتاج وتباسىلارعا 5 ملن تەڭگە سوماسىندا كومەك كورسەتىلدى. بۇل دەگەنىمىز – ۇلكەن ەڭبەك» دەدى.
ءوز كەزەگىندە «نۇر استانا» مەشىتىنىڭ باس يمامى ناۋرىزباي تاعانۇلى قالاداعى ۇلكەن مەشىتتەردە عانا قارجىلىق مۇمكىندىكتەر بولاتىنىن, ال ودان وزگە, قالادان تىسقارى ورنالاسقان مەشىتتەردە, شىندىعىندا, مەشىت قىزمەتكەرلەرىنە تولەنەر جالاقىنىڭ ءوزى ماردىمسىز ەكەنىن ايتتى. اسىرەسە, جىل سايىن كەلەتىن قاسيەتتى رامازان ايىندا ءار كەشتە جاماعاتقا ارنالىپ جايىلاتىن اۋىزاشار داستارحانىنا جۇمسالار قاراجات 250-300 مىڭ تەڭگە شاماسىندا بولسا, وتىز كۇن بويى اۋىزاشار دايىنداۋ وڭاي شارۋا ەمەس ەكەنى بەسەنەدەن بەلگىلى. وسى رەتتە, ءدىن جاناشىرلارى, كاسىپكەر ازاماتتاردىڭ ايانباي اتسالىسىپ جاتقانىنىڭ ءوزى ەلدەگى احۋالدىڭ العا جىلجىپ كەلە جاتقاندىعىنىڭ كورىنىسى ەكەنىن اتاپ ءوتتى وكىل يمام.
جايىق ناعىماش
