كەشە استانا قالاسىنىڭ اكىمى ادىلبەك جاقسىبەكوۆتىڭ توراعالىعىمەن وتكەن اپپارات وتىرىسىندا قالالىق ينفراقۇرىلىمدى اباتتاندىرۋ ماسەلەلەرى قارالىپ, اۋماقتاردى سانيتارلىق تازارتۋ, تۇراق ورىندارىن جاساۋ جانە ەلوردا تۇرعىندارىن مازالايتىن باسقا دا ماسەلەلەر تالقىلاندى.
كوممۋنالدىق قىزمەتتەردىڭ باستى مىندەتى – قالادا تازالىقتى قامتاماسىز ەتۋ. الايدا, بەلگىلەنبەگەن ورىنداردا قۇرىلىس جانە تۇرمىستىق قالدىقتاردى ءۇيۋ, قوقىستى بەيبەرەكەت توگۋ فاكتىلەرى انىقتالىپ جاتادى. وتىرىس بارىسىندا سوعان نازار اۋدارىلىپ, اۋماقتاردى تاپ-تۇيناقتاي ەتپەگەن اۋدان اكىمدەرىنە ەسكەرتۋ جاسالدى.
ءا.جاقسىبەكوۆ سانيتارلىق نورمالاردى بۇزۋدى جويۋ ءۇشىن ءبىر اپتا ۋاقىت بەردى. بۇل رەتتە اۋدان اكىمدىكتەرىنىڭ دە, ەكولوگيالىق پوليتسيانىڭ دا ۇيلەسىمدى جۇمىس ىستەۋى قاجەت ەكەندىگى اتاپ ءوتىلدى.
«ەلوردا تۇرعىندارى مەن قوناقتارى قالا كۇنىن جايلى جاعدايدا قارسى الۋعا ءتيىس, اۋماقتاردىڭ ءبارى جينالىپ, تازارتىلۋى كەرەك» دەدى ءا.جاقسىبەكوۆ.
ساۋلەت جانە قالا قۇرىلىسى باسقارماسى تاراپىنان كورسەتىلەتىن قىزمەتتەرگە ەرەكشە نازار اۋدارىلدى. قالا اكىمى باسقارمانىڭ حالىقپەن جۇمىس ىستەۋ ساپاسىنىڭ قاناعاتتانارلىقسىز ەكەندىگىن اتاپ ءوتىپ, جاعدايدى جاقسارتۋ بويىنشا شارالار قابىلداپ, جۇمىس كەستەسىن قايتا قاراۋدى تاپسىردى.
قالا اكىمدىگى تۇرعىندارعا جايلى بولۋى ءۇشىن ءىىد اكىمشىلىك پوليتسيا باسقارماسىنىڭ تىركەۋ ەمتيحان ءبولىمى ينفراقۇرىلىمى مەن ىڭعايلى تۇراعى بار باسقا عيماراتقا كوشىرۋ ماسەلەسىن قاراستىراتىن بولدى. ەلوردا باسشىسى, سونداي-اق, تەب جۇمىسىنىڭ ساپاسىنا توقتالىپ, وپەراتورلار سانىنىڭ جەتىسپەيتىنىن جەتكىزدى.
«حالىقپەن جۇمىس ىستەۋ – قالالىق باسقارمالاردىڭ نەگىزگى مىندەتتەرىنىڭ ءبىرى. بۇل جەردە ەڭ باستىسى – مەملەكەتتىك ورگاندارعا ەمەس, تۇرعىندارعا قولايلى جاعداي جاساۋ» دەپ اتاپ ءوتتى ەلوردا اكىمى.
