نۇر-سۇلتاندا 1 قازاننان باستاپ ۇلتتىق حالىق ساناعى اياسىندا ينتەرۆيۋەرلەردىڭ ۇيلەردى جاپپاي ارالاۋى باستالدى. قازىر ەرىكتىلەر بارلىق ءۇيدى ارالاپ, ونلاين-ساناققا قاتىسپاعان تۇرعىنداردان ساناق الىپ جاتىر.
بۇل حالىق ساناعى – ەلىمىز تاۋەلسىزدىك العان ساتتەن بەرى ءوتىپ جاتقان ءۇشىنشى حالىق ساناعى. وعان بيىل العاش رەت تسيفرلىق تەحنولوگيالار قولدانىلدى. ونلاين-ساناق 1 قىركۇيەكتەن باستالىپ, 31 قىركۇيەككە دەيىن جالعاسقان ەدى. الايدا ساناقتان ونلاين ءوتۋ مۇمكىندىگى توقتاتىلعان سوڭ ەلىمىزدىڭ بارلىق وڭىرلەرىنەن, ونىڭ ىشىندە ەلوردالىقتاردان ونلاين-ساناق فۋنكتسياسى مەرزىمىن ۇزارتۋ تۋرالى كوپتەگەن وتىنىشتەر تۇسە باستاعان. وسىعان بايلانىستى sanaq.gov.kz سايتىندا «ونلاين-ساۋالناما» فۋنكتسياسىن قايتا قوسۋ تۋرالى شەشىم قابىلداندى. ەندى ساناق ساۋالدارىنا ارنايى sanaq.gov.kz سايتى, e-gov پورتالى ارقىلى تىركەلىپ نەمەسە Aitu ءموبيلدى قوسىمشاسى ارقىلى جاۋاپ بەرۋگە بولادى. ونلاين ءوتۋ مۇمكىندىگى حالىق ساناعى اياقتالعانعا دەيىن قولجەتىمدى بولماق.
1 قازاننان باستاپ ينتەرۆيۋەرلەر ۇيلەردى ارالاپ ساناق الىپ جاتىر. وسى ورايدا ۇلتتىق ستاتيستيكا بيۋروسىنىڭ نۇر-سۇلتان قالاسى بويىنشا دەپارتامەنتى ەلوردا تۇرعىندارى مەن قوناقتارىن ساناق جۇمىسىنا بەلسەندىلىك تانىتۋعا شاقىردى.
ۇيلەردى ارالاپ ساناق الۋ كەزەڭىندە بۇرىن ونلاين-ساناقتان وتكەن رەسپوندەنتتەر ەكىنشى رەت قايتا جازىلمايدى. ولار ينتەرۆيۋەرگە ساناق وتكەندىگى تۋرالى بۇرىن الىنعان SMS-حابارلامانى نەمەسە ەلەكتروندىق حابارلامانى كورسەتۋى ءتيىس.
– مەن ەكىنشى كۋرس ستۋدەنتىمىن. حالىق ساناعىن الۋ جۇمىسىنا ەرىكتى رەتىندە قاتىستىم. قازىرگە دەيىن 100-دەن استام وتباسىن ارالادىم. مەن ارالاعان ۇيلەردەگى تۇرعىنداردىڭ تەڭ جارتىسى ونلاين-ساناقتان وتكەن ەكەن. ال ونلاين-ساناقتان وتپەگەندەردىڭ دەنى – قارتتار. جۇرتتىڭ كوبى بەلسەندى, دەگەنمەن «بىزگە مۇنىڭ نە كەرەگى بار؟ ءبىزدىڭ مازامىزدى الماڭدار, ءبىز ساناققا قاتىسپايمىز» دەپ كەرى تولعايتىن تۇرعىندار دا كەزدەسەدى. مەنىڭشە, بۇل ساناققا جالپى حالىق اتسالىسۋى كەرەك, – دەدى ساناق الۋشى ەرىكتىلەردىڭ ءبىرى اينۇر سارقۇم.
ايتا كەتەيىك, حالىق ساناعىن الۋ – وتە اۋقىمدى ءارى كۇردەلى جۇمىس. سوندىقتان وعان ارناۋلى قىزمەتكەرلەردەن سىرت, ەرىكتىلەر دە تارتىلعان. نۇر-سۇلتان قالاسىنداعى ەرىكتىلەردىڭ قاتارىندا ستۋدەنتتەر مەن زەينەتكەرلەر دە بار.
