ەسىل اۋدانى اكىمدىگىندە ەلوردانىڭ قۇرىلىس الاڭدارىنداعى ەڭبەك جاعدايىن جاقسارتۋ جانە ونىڭ قاۋىپسىزدىگىن ارتتىرۋ, تەحنيكالىق قاۋىپسىزدىكتى ساقتاۋ, جۇمىسشىلاردىڭ وندىرىستىك جاراقات الۋىنا جول بەرمەۋ بارىسى تالقىلاندى. وعان اۋدان اكىمى ءسابيلا مۇستافينا, اۋدان پروكۋرورى ءبىرجان ماجرەنوۆ جانە قۇرىلىس كومپانيالارىنىڭ وكىلدەرى قاتىستى.
قالاداعى بۇكىل قۇرىلىستىڭ 70 پايىزى سول جاعالاۋ دا شوعىرلانعان. زەرتتەۋلەرگە سۇيەنسەك, بۇگىندە قۇرىلىس نىساندارى جۇمىسشىلاردىڭ ەڭ كوپ جاراقات الاتىن قاتەر الاڭىنا اينالىپ وتىر. وتكەن جىلدىڭ العاشقى توقسانىندا قۇرىلىستا جەتى ادام جاراقات السا, بيىلعى وسى كەزەڭدەگى مالىمەت بويىنشا سەگىز توتەنشە وقيعا بولعان. ونىڭ ۇشەۋىندە كىسى ءولىمى ورىن الىپ, قايعىلى وقيعا جۇمىس بەرۋشىنىڭ كىناسىنەن بولعانى دالەلدەنىپ وتىر.
– ال سوڭعى ءتورت ايدا 14 وقىس جاعداي تىركەلگەن. ونىڭ بىرىندە 8-قاباتتان 19 جۇمىسشى بىردەن قۇلاپ, جاراقات العانى بۇكىل بۇقارالىق اقپارات قۇرالدارىندا جاريالانعانى بەلگىلى. بارلىق فاكتىلەر تەكسەرىلىپ, قازاقستان رەسپۋبليكاسىنىڭ 152-بابى بويىنشا قىلمىستىق ءىس قوزعالعان. الايدا, كىسى ولىمىنە جەتكىزگەن مۇنداي ولقىلىقتاردى اقتاۋعا بولمايدى. بارلىق جاعدايدا قاۋىپسىزدىك شارالارىنىڭ ويداعىداي بولماۋى, قۇرال-جابدىقتاردىڭ ساپاسىزدىعى, جۇمىس بەرۋشىلەردىڭ قاۋىپسىزدىك نورمالارىنا نەمقۇرايلى قاراۋىنان بولىپ وتىر. الداعى ۋاقىتتا وسىنداي ولقىلىقتارعا جول بەرگەن قۇرىلىس كومپانيالارىن ارنايى رەەسترگە كىرگىزەمىز. ەگەر ءبىزدىڭ تاراپىمىزدان كورسەتىلگەن تالاپتار ورىندالماسا, زاڭنامادا كورسەتىلگەن شارالارمەن قاتار, ارنايى تەكسەرۋ جۇرگىزۋ جونىندە باس پروكۋراتۋراعا ۇسىنىم حات جولدايمىز, – دەدى اۋدان پروكۋرورى ءبىرجان ماجرەنوۆ.
ايگۇل ۋايسوۆا
