گولوۆكيننىڭ كەلەسى جەكپە-جەگى 26 شىلدەدە نيۋ-يورك قالاسىنىڭ «Madison Square Garden» (MSG) ارەناسىندا وتەتىنى بەلگىلى بولدى.
WBA گولوۆكيندى اۆستراليالىق دجارود فلەتچەرمەن كەزدەسۋگە مىندەتتەگەن ەدى. بۇل شەشىمگە گولوۆكيننىڭ كومانداسى ريزا بولماي, قاۋىمداستىق باسشىلىعىنا دەنيەل گيلمەن جەكپە-جەك وتكىزۋگە مۇمكىندىك بەرۋ جونىندە ءوتىنىش جولدادى.
ەگەر گيلمەن اراداعى كەلىسسوزدەر ءساتتى اياقتالسا, جەكپە-جەك «MSG»-ءدىڭ 20 مىڭ ادامعا ارنالعان ارەناسىندا وتەدى. قازاقستاندىق بوكسشىنىڭ الدىڭعى كەزدەسۋلەرى «Madison Square Garden»-ءنىڭ 5600 كورەرمەن سىياتىن تەاترىندا وتكەن بولاتىن.
ايتا كەتەر جايت, گەنا ەكىنشى ورتا سالماققا اۋىسۋعا جانە وسى سالماقتاعى بوكسشىلارمەن جەكپە-جەككە شىعۋعا دايىن ەكەنىن مالىمدەدى. سونداي-اق, ول 31 مامىر كۇنى, WBA مەن IBF بىرىكتىرىلگەن كارل فروچ پەن دجوردج گروۋۆس جەكپە-جەگىنىڭ جەڭىمپازىمەن جانە وسى ديۆيزيوننىڭ مىقتى بوكسشىسى سانالاتىن اندرە ۋوردپەن دە جەكپە-جەككە شىعۋعا ءازىر ەكەنىن ايتۋدا.
