ورىنبەك ولجالى بولدى

قر مادەنيەت جانە سپورت مينيسترلىگى بايلانىس جانە اقپارات قىزمەتكەرلەرى كۇنى قارساڭىندا «مەملەكەتتىك ءتىل جانە باق» رەسپۋبليكالىق بايقاۋىنىڭ جەڭىمپازدارىن ماراپاتتاۋ ءراسىمىن وتكىزدى. مينيستر ارىستانبەك مۇحامەديۇلى ءتىلدىڭ دامۋىنا ايرىقشا ۇلەس قوسىپ جۇرگەن ءتورتىنشى بيلىك وكىلدەرىن مەرەكەلەرىمەن قۇتتىقتاپ, قۇرمەت گراموتالارى مەن العىس حاتتارىن تاپسىردى.

مەرەكەلىك شاراعا قر پارلامەنتىنىڭ دەپۋتاتتارى, باق وكىلدەرى, عالىمدار, جازۋشىلار قاتىسىپ, ەسترادا جۇلدىزدارى ونەر كورسەتتى.
سالتاناتتى جيىندا ارىستانبەك مۇحامەديۇلى بۇقارالىق اقپارات قۇرالدارى ەلدىڭ الەمدىك اقپاراتتىق جانە مادەني كەڭىستىكتەگى ورنىن انىقتاپ, ءار مەملەكەتتىڭ ىشىندە عانا ەمەس, ەلدەر مەن حالىقتار اراسىنداعى قوعامدىق قاتىناستاردىڭ دامۋىنا اسەر ەتەتىندىگىن اتاپ ءوتتى.
قر مسم تىلدەردى دامىتۋ مەن قوعامدىق-ساياسي جۇمىس كوميتەتى ش.شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعىمەن بىرلەسە ۇيىمداستىرعان «مەملەكەتتىك ءتىل جانە باق» رەسپۋبليكالىق بايقاۋىنىڭ جەڭىمپازدارىنا ديپلومدارىن سەناتور, جازۋشىلار وداعىنىڭ توراعاسى نۇرلان ورازالين باستاعان قازىلار القاسىنىڭ مۇشەلەرى تابىستادى.
بايقاۋعا مەملەكەتتىك ءتىلدىڭ احۋالى تۋرالى 200-دەن اسا وتكىر دە وزەكتى ماتەريالدار كەلىپ ءتۇسىپتى. قازىلار القاسى قاتىسۋشىلاردى «ۇزدىك ماقالا», «ۇزدىك تەلەارنا باعدارلاماسى», «ۇزدىك راديو باعدارلاماسى», «ۇزدىك سايت ماقالاسى» نوميناتسيالارى بو­يىنشا باعالادى.
ۇزدىك ماقالا اۆتورى «ەگەمەن قازاقستان» رەسپۋبليكالىق گازەتىنىڭ شولۋشىسى سۇلەيمەن مامەت اتاندى. توپ ىشىنەن ارىپتەسىمىز, «استانا اقشامى» گازەتىنىڭ اعا ءتىلشىسى ورىنبەك وتەمۇرات تا ەرەكشەلەنىپ, ىنتالاندىرۋ سىيلىعىنا يە بولدى.

عالىم قوجابەكوۆ