«ناز» تاريحتى ناقىشتار بيىمەنەن
ارقا توسىنە جاڭا ەلوردا قوندىرعان كەزەڭنىڭ وكشەسىن باسا قۇرىلعان «ناز» مەملەكەتتىك بي تەاترى بيىلعى استانا كۇنى مەرەكەسىنە سۇبەلى ۇلەسىن قوسپاق. ەرتەڭ «قازاقستان» ورتالىق كونتسەرت زالىندا ونەر ۇجىمى ءوزىنىڭ ون بەس جىلدىعىن ۇلكەن كونتسەرتپەن اتاپ وتەدى. ونەرپازدار حالقىمىزدىڭ سان عاسىرلىق تاريحىن, باي سالت-ءداستۇرى مەن ادەت-عۇرپىن بي تىلىمەن ورنەكتەمەك. كونتسەرت بارىسىندا كورەرمەندەر تەاتردىڭ قازاقستان مەن شەتەلدىڭ ۇزدىك بالەتمەيستەرلەرى دايىنداعان جاڭا رەپەرتۋارىن تاماشالايدى.
مەرەيتويلىق كونتسەرتتە بيشىلەر ۇجىمىمەن قوسا تامارا اسار, ارداق بالاجانوۆا, ايگۇل يمانباەۆا, جانار ايجانوۆا, مارجان اراپباەۆا سىندى بەلگىلى انشىلەر مەن «جاستار» تەاترىنىڭ ارتىستەرى, «پاي-پاي» ۇلتتىق اسپاپتار توبى ونەر كورسەتەدى.
استانالىقتار «اتامەكەنگە» شاقىرادى
الداعى دۇيسەنبى كۇنى «جاستار» سارايىندا ءى حالىقارالىق «قۇرالاي» قۋىرشاق تەاترلارى فەستيۆالىنىڭ اشىلۋ سالتاناتى وتەدى.
فەستيۆالگە قازاقستان, يتاليا, يران, يسپانيا, تۇركيا, رۋمىنيا, تاتارستان, تاجىكستان, ۋكراينا, سەربيا مەملەكەتتەرىنىڭ بالدىرعاندارعا ارنالعان تەاترلارى شاقىرىلعان. ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىىق دراما تەاترىنىڭ ساحناسىندا قويىلاتىن سان الۋان قويىلىمداردى كىشكەنتاي كورەرمەندەر 2 شىلدەگە دەيىن تاماشالاي الادى.
اتاۋلى شارانىڭ وتۋىنە استانا قالاسىنداعى قۋىرشاق تەاترىنىڭ كوركەمدىك جەتەكشىسى قۇرالاي ەشمۇراتوۆا مۇرىندىق بولدى. اتالمىش ۇجىم بەلگىلى جازۋشى, دراماتۋرگ ساكەن ءجۇنىسوۆتىڭ «اماناي مەن زاماناي» پوۆەسىنىڭ نەگىزىندە قويىلعان «اتامەكەن» قويىلىمىن ۇسىنادى. قويىلىم ارقىلى كورەرمەندەر ەلىمىزدىڭ باسىنا تۋعان قيىن كۇندەردەن حابار الىپ, اتامەكەن ۇعىمىنىڭ قاسيەتىن ۇعىنادى.
«وزەن داۋىسى» ورلەيدى
بيىل ەلوردادا «وزەن داۋىسى» كلاسسيكالىق اۋەن كەشتەرى جەتىنشى مارتە وتكىزىلەدى. ءۇش كۇنگە سوزىلاتىن شارا قازاق حاندىعىنىڭ 550 جىلدىعىنا ارنالادى.
مۋزىكا مەرەكەسىن «ماڭگىلىك سارىن» سيمفونيالىق ءانسامبلى قازاقتىڭ ءداستۇرلى مۋزىكاسىمەن اشادى. كەلەسى كۇنى كورەرمەندەرگە ەۆگەني برۋسيلوۆسكيدىڭ «ەر تارعىن» وپەراسى ۇسىنىلادى. ال ءۇش كۇندىكتى حور مۋزىكاسىنىڭ كەشى تۇيىندەيدى.
تاڭعاجايىپ «نۇرلى ەسىل»
بيىل ەسىل وزەنىنىڭ جاعاسىندا تۇڭعىش رەت «نۇرلى ەسىل» مۋلتيمەديالىق-پيروتەحنيكالىق تاڭعاجايىپ شوۋ ۇيىمداستىرىلادى. شوۋدى جاساۋشىلار زامانۋي لازەرلىك تەحنولوگيالاردى قولدانىپ, سۋ بەتىندە نەبىر اسەم قويىلىمداردى ويناتادى.
وزەننىڭ ۇستىندەگى ساحناعا جايعاستىرىلاتىن سيمفونيالىق وركەستر شوۋ اسەرىن ارتتىرا تۇسەدى. ونەر ۇجىم قازاقتىڭ حالىق اندەرى مەن جاڭا زامانعى كلاسسيكالىق اۋەندەردى ورىندايدى.
ساحنانىڭ اينالاسىنا بيىكتىگى ءارتۇرلى سۋبۇرقاقتار ورنالاستىرىلىپ, جاڭا لازەرلىك تەحنولوگيالاردىڭ كومەگىمەن اسەرلى بەينەروليكتەر كورسەتىلەدى. كورىنىستىڭ سوڭى كوزدىڭ جاۋىن الار وتشاشۋلار شوۋىنا ۇلاسادى.
الەم كوشىپ كەلگەندەي بايتاعىما
4-6 شىلدە كۇندەرى ەسىلدىڭ جاعاسى «بىرلىك ەسىلى» ينتەراكتيۆتى فەستيۆالىنىڭ الاڭىنا اينالادى. كوپ ۇلتتى ەلىمىزدەگى تاتۋ-ءتاتتى تىرشىلىكتى پاش ەتەتىن ءۇش كۇندىك شاراعا قوناقتار دا كوپ كەلەدى.
فەستيۆالگە قاتىسۋشىلار وتباسىلىق جانە شىعارماشىلىق دەمالىس اۋانىندا الەم ەلدەرىنىڭ مادەنيەتىمەن كەڭىرەك تانىسا الادى. ەسىل جاعاسىنا سەرۋەندەپ, باسقا قۇرلىق پەن مەملەكەتتەردە ساياحاتتاپ جۇرگەندەي اسەرگە بولەنەدى.
فەستيۆالدىڭ تاعى ءبىر ەرەكشەلىگى – جاس سۋرەتشىلەر اشىق اسپان اياسىندا «بولاشاقتىڭ قالاسى بۇگىن» اتتى پلەنەرگە قاتىسا الادى. ال كىشكەنتاي كورەرمەندەرگە اسفالتتا سۋرەت سالۋعا ارنايى جەر ءبولىنىپ, ولار ءۇشىن الەم حالىقتارىنىڭ ەرتەگىلەرى وقىلادى. اتا-انالار بولسا ءتۇرلى حالىقتاردىڭ وتباسىلىق داستۇرلەرىمەن تانىسىپ, اشەكەيلەر جاساۋدى, سلاۆيان ورنەكتەرىن سالۋدى ۇيرەنەدى. بارلىق قوناقتار كۇندىزگى باعدارلاماداعى «Bugarabu» توبى باستاعان كارناۆال شەرۋىنە قاتىسىپ, كەشكە «Yarik Ecuador», «ەتنوميكس», «Hapanasasa» توپتارىنىڭ جاندى داۋىستا ورىندايتىن اندەرىن تىڭدايدى.
امانعالي قالجانوۆ
