قازاقستان رەسپۋبليكاسى ۇلتتىق اكادەميالىق كىتاپحاناسىندا «ءبىر ەل – ءبىر كىتاپ» اكتسياسى اياسىندا مانەرلەپ وقۋدان بايقاۋ ءوتتى.
كىتاپحانانىڭ پايدالانۋشىلارعا قولداۋ كورسەتۋ قىزمەتى مەن د.قوناەۆ اتىنداعى كوللەدج جانە اقش ەلشىلىگى بىرلەسىپ ۇيىمداستىرعان بۇل شاراعا ەلوردانىڭ جيىرمادان اسا مەكتەبىنىڭ وقۋشىلارى قاتىستى.
«زۋلا, مەنىڭ جىر-كۇيمەم, شابىت جەگىپ, جەر بەتىنە عۇمىرلى جارىق بەرىپ…» دەگەن اتپەن وتكىزىلىپ وتىرعان بيىلعى بايقاۋدىڭ باستى ەرەكشەلىگى – سايىسشىلار فاريزا اقىن ولەڭدەرىن قازاق, ورىس جانە اعىلشىن تىلدەرىندە مانەرلەپ وقۋعا مۇمكىندىك الدى. وسى جونىندە كەڭىنەن اڭگىمەلەي وتىرىپ, ۇلتتىق اكادەميالىق كىتاپحانا باس ديرەكتورىنىڭ ورىنباسارى عاليا يساقانوۆا: «كىتاپ وقىمايتىن بالا جوق. بىراق, سونى ءتۇسىنىپ وقۋ دەگەن بار» دەي كەلە, فاريزا وڭعارسىنوۆا جىرلارى مەيىرىم مەن شۋاققا, وت-جالىنعا, رۋحقا تولى ەكەنىنە توقتالدى. سوندىقتان دا بيىل قازاقستاننىڭ حالىق جازۋشىسى, مەملەكەتتىك سىيلىقتىڭ يەگەرى, كورنەكتى اقىن شىعارمالارى جالپى وقۋعا تاڭدالىپتى.
شىعارماشىلىق سايىسقا قاتىسۋشىلار اقىننىڭ كوكىرەكتى تازارتىپ, جانعا ساۋلە قۇياتىن, زۇلىمدىقتان بەزدىرىپ, ىزگىلىككە شاقىراتىن وتتى جىرلارىن جاتقا ايتتى. اسىرەسە, اقىن ولەڭىن اعىلشىن تىلىندە ناقىشىنا كەلتىرە مانەرلەپ وقىعان №50 مەكتەپ-ليتسەيىنىڭ وقۋشىسى انەل ساعىندىق, №51 مەكتەپ-گيمنازيانىڭ وقۋشىسى ادىلەت قۇدايبەرگەن (قازاق تىلىندە) جانە №50 مەكتەپ-ليتسەيىنىڭ وقۋشىسى ءمادينا اقبەت (ورىس تىلىندە) جۇلدەگەر اتانسا, بايقاۋدا ونەر كورسەتكەن باسقا دا وقۋشىلار «ەرەكشە ۇزدىك مانەرلەپ وقۋ», «ەڭ جان تەبىرەنتەتىن مانەرلەپ وقۋ», «ارتيستىگى مەن ۇزدىك ساحنالىق بەينەسى ءۇشىن» اتاۋلارىمەن ماراپاتتالدى.
د.قوناەۆ اتىنداعى كوللەدجدىڭ اعىلشىن ءتىلى بويىنشا مامانداندىرىلعان پاندەر وقىتۋشىسى, پەداگوگيكالىق عىلىمداردىڭ ماگيسترى ارمان اسانباەۆ حالقىنىڭ ارداقتىسىنا اينالعان اقىن جىرلارىن وقۋشىلاردىڭ وزدەرى قالاعان تىلدە جاتقا وقۋى قازاق پوەزياسىنىڭ عاسىردان-عاسىرعا جالعاسا بەرەتىنىنىڭ كۋاسى ەكەنىن ايتتى. كەش وسى وقۋ ورنىنىڭ ستۋدەنتى سابىرجان قولجابەكتىڭ ورىنداۋىنداعى مۇقاعالي ماقاتاەۆتىڭ «فاريزاعا ارناۋ» ولەڭىمەن اسەرلى اياقتالدى.
گۇلبارشىن وكەشقىزى
