جىل باسىنان بەرى استانا اكىمدىگى جانىنان «بالالار-جاسوسپىرىمدەر سپورت مەكتەبى, مۇگەدەك سپورتشىلارعا ارنالعان سپورت مەكتەبى» ءوز جۇمىسىن باستادى. اقپان ايىندا مەكتەپ جانىنان تاعى دا ءبىر سەكتسيا اشىلدى. وندا مۇمكىندىگى شەكتەۋلى جاندار كاراتە-دو ونەرىن مەڭگەرەدى.
جالپى, بۇل مەكتەپتە 18 سپورت تۇرىنەن جاتتىعۋلار وتەدى. اتاپ ايتقاندا, اربادا وتىرىپ بي بيلەۋ, وتىرىپ وينايتىن ۆولەيبول, گرەك-ريم كۇرەسى, ەركىن كۇرەس, دويبى, شاحمات, توعىزقۇمالاق, جەڭىل اتلەتيكا, ءجۇزۋ, پاۋەرليفتينگ, ۇستەل تەننيسى, فۋتبول, تاەكۆوندو, اسىق اتۋ, دزيۋدو, بوچچا جانە گولبول. ەندى بۇلارعا پاراكاراتە قوسىلدى.
توپ جەتەكشىسى – كاراتە-دودان قازاقستاننىڭ ەڭبەك سىڭىرگەن جاتتىقتىرۋشىسى مەيرامگۇل دۋكۋەۆا. سپورتشى 15 جىلدان بەرى ەلوردالىق كاراتەشىلەردى رەسپۋبليكالىق جانە حالىقارالىق جارىستارعا دايىنداپ ءجۇر.
پاراكاراتەشىلەر جاڭا پاراليمپيادالىق جاتتىعۋ ورتالىعىندا دايىندالادى. قازىر توپتا 15 ادام بار. ولار – ارباعا تاڭىلعان سپورتشىلار, مەنتالدى مۇگەدەكتەر جانە كورۋ ورگاندارى بۇزىلعان جاندار. ەڭ جاس پاراكاراتەشىنىڭ جاسى – 14-تە, ەڭ ۇلكەنى – 36-دا. سپورت مەكتەبى شاكىرتتەردىڭ كەلىپ-كەتۋىن دە قامتاماسىز ەتەدى. پاراكاراتەشىلەردىڭ جاتتىعۋعا دەگەن ىنتاسى مول, ولاردىڭ ارمانى – جاقىندا پاراليمپيادالىق ويىندارعا قاتىسۋ.
بيىل 1 قاڭتاردان باستاپ استانانىڭ مۇمكىندىگى شەكتەۋلى جاندارى مۇگەدەكتىگىنىڭ توبىنا جانە جاسىنا قاراماستان پاراليمپيادالىق جاتتىعۋ ورتالىعىندا تەگىن جاتتىعا باستادى.
