پارتيانىڭ مىندەتى – حالىقتى بىرىكتىرۋ

تۇڭعىش پرەزيدەنت-ەلباسى نۇرسۇلتان نازارباەۆ Nur Otan پارتياسىنىڭ توراعاسى وكىلەتتىگىن مەملەكەت باسشىسى قاسىم-جومارت توقاەۆقا تاپسىرۋ تۋرالى شەشىم قابىلدادى. ەلباسىنىڭ بۇل شەشىمى Nur Otan پارتياسىنىڭ ساياسي كەڭەسىنىڭ كەڭەيتىلگەن وتىرىسىندا جاريا ەتىلدى. پارتيا باسشىسىنىڭ وكىلەتتىگىن تاپسىرۋ ءراسىمى پارتيا جارعىسىنا سايكەس جۇزەگە اسىرىلىپ, توراعانى سايلاۋ جانە قىزمەتىنەن بوساتۋ ماسەلەسى Nur Otan پارتياسىنىڭ الداعى قۇرىلتايىندا قارالاتىن بولادى.

بيلىك ءترانزيتىنىڭ لوگيكالىق جالعاسى

«اتقاراتىن لاۋازىمىنا, قۇقىقتارىنا قاراماستان, نۇرسۇلتان ءابىشۇلى ۇلتىمىزدىڭ كوشباسشىسى – ەلباسى, الەم مويىنداعان قازىرگى زاماننىڭ كورنەكتى ساياساتكەرى, بەدەلدى تۇلعا بولىپ قالا بەرەتىنىن ءتۇسىنۋ كەرەك.

زاماناۋي قازاقستاننىڭ نەگىزىن قالاعان, جانىن سالىپ, بۇكىل ءومىرىن ەلگە ارناعان ادامنىڭ ارقاشان حالىق مۇددەسىن ويلاپ, ەلىمىزدىڭ بولاشاعى ءۇشىن الاڭدايتىنىن ءبارى تۇسىنەدى دەپ ويلايمىن. ەلباسىنىڭ بۇل ۇستانىمى وزگەرمەك ەمەس.

بۇگىنگى شەشىم – بيلىك ءترانزيتىنىڭ قيسىندى جالعاسى عانا. نۇرسۇلتان نازارباەۆ اتاپ وتكەندەي, اسىرەسە قازىرگى پاندەميادان بولىپ وتىرعان جاھاندىق داعدارىس كەزىندە Nur Otan پارتياسى قازاقستان پرەزيدەنتى ءۇشىن باستى تىرەك بولۋى كەرەك.

جارعىعا سايكەس, Nur Otan پارتيا­سىنىڭ توراعاسىن سايلاۋ مەن ونى لاۋازىمىنان بوساتۋ پارتيا سەزىنىڭ ەرەكشە قۇزىرەتىنە جاتادى. وعان دەيىن نۇرسۇلتان نازارباەۆ پارتيا توراعاسىنىڭ قىزمەتىندە بولادى» دەپ جازدى تۇڭعىش پرەزيدەنتى-ەلباسىنىڭ كەڭەسشىسى – ءباسپاسوز حاتشىسى ايدوس ۇكىباي تۆيتتەردەگى پاراقشاسىندا.

نۇرسۇلتان نازارباەۆتىڭ ەلباسى مارتەبەسىندەگى وكىلەتتىكتەرى مەن قاۋىپسىزدىك كەڭەسىنىڭ توراعاسى قىزمەتى ساقتالادى. «قازاقستان رەسپۋبليكاسىنىڭ تۇڭعىش پرەزيدەنتى-ەلباسى تۋرالى» زاڭعا سايكەس, نۇرسۇلتان نازارباەۆتىڭ مەملەكەتتىك قۇرىلىستىڭ, ىشكى جانە سىرتقى ساياساتتىڭ, ەل قاۋىپسىزدىگىنىڭ ماڭىزدى ماسەلەلەرى بويىنشا ءوز باس­تامالارىمەن قازاقستان حالقىنا, مەملەكەتتىك ورگاندارعا جانە لاۋازىمدى تۇلعالارعا ۇندەۋ جاساۋعا ءومىر بويىنا قۇقىعى بار. 2021 جىلى 28 ساۋىردە ەلباسى مەملەكەت باسشىسىنا قازاقستان حالقى اسسامبلەياسى توراعاسىنىڭ قىز­مەتىن تاپسىرعانى ءمالىم. سونداي-اق تۇڭعىش پرەزيدەنت كونستيتۋتسيالىق كەڭەستىڭ مۇشەسى بولىپ قالا بەرەدى.

پارتيانىڭ ستراتەگيالىق ماقساتتارىن ايقىندادى

ەندى نۇرسۇلتان نازارباەۆتىڭ توراعالىعىمەن وتكەن Nur Otan پارتيا­سى ساياسي كەڭەسىنىڭ كەڭەيتىلگەن وتىرىسىنىڭ كۇن تارتىبىندە قارالعان ماسەلەلەرگە كەلەيىك. بەينەكونفەرەنتسيا بايلانىسى رەجيمىندە وتكەن وتىرىسقا مەملەكەت باسشىسى قاسىم-جومارت توقاەۆ, پرەمەر-مينيستر مەن ۇكىمەت مۇشەلەرى, Nur Otan پارتياسىنىڭ ساياسي كەڭەسى مەن بيۋرو مۇشەلەرى, پارلامەنت ماجىلىسىندەگى جانە ماسليحاتتارداعى پارتيا فراكتسياسىنىڭ دەپۋتاتتارى, ءوڭىر باسشىلارى, Jas Otan جاستار قاناتىنىڭ كوشباسشىلارى قاتىستى.

جيىندى اشىپ, ءسوز سويلەگەن ­ەلباسى وتىز جىل ىشىندەگى ەلىمىزدىڭ دامۋ جەتىستىكتەرىنە توقتالىپ, مۇنىڭ بارلىعى بىرلەسە اتقارىلعان جۇمىستىڭ, ماڭىزدى مەملەكەتتىك شەشىمدەر مەن باتىل رەفورمالاردىڭ جەمىسى ەكەنىن اتاپ ءوتتى.

«ءبىرىزدى ساياسي رەفورمالاردىڭ ناتيجەسىندە بۇگىندە ەلىمىزدە جوعارى دەموكراتيالىق ستاندارتتارعا ساي كەلەتىن ءتيىمدى كوپپارتيالىق جۇيە قالىپتاستى. بيىل تاريحىمىزدا العاش رەت زاڭ شىعارۋشى جانە وكىلدىك ورگاندارعا سايلاۋ پروپورتسيونالدى جۇيە بويىنشا ءوتتى. سونداي-اق اۋىل اكىمدەرىن تىكەلەي سايلاۋ تاجىريبەسى ەنگىزىلدى. بۇل قادامداردىڭ ءبارى ەلدەگى پارتيالار اراسىندا باسەكەنى كۇشەيتىپ, ولاردىڭ جاۋاپكەرشىلىگى مەن ەسەپتىلىگىن ارتتىرا ءتۇستى» دەدى نۇرسۇلتان نازارباەۆ.

وتىرىستا پرەمەر-مينيستر, پارتيا ساياسي كەڭەسىنىڭ بيۋرو مۇشەسى ا.ءماميننىڭ, پارلامەنت ءماجىلىسىنىڭ توراعاسى, پارتيا فراكتسياسىنىڭ باسشىسى
ن.نىعماتۋليننىڭ, پارلامەنت ءماجىلىسىنىڭ دەپۋتاتى, Nur Otan پارتياسى وڭىرلىك دامۋ جونىندەگى قوعامدىق كەڭەسىنىڭ توراعاسى يۋ.كۋچينسكايانىڭ, Nur Otan پارتياسى شىمكەنت قالالىق فيليالىنىڭ توراعاسى م.ايتەنوۆتىڭ, Nur Otan پارتياسى پاۆلودار اۋداندىق فيليالى توراعاسىنىڭ ءبىرىنشى ورىنباسارى, Nur Otan پارتياسىنىڭ اۋداندىق ماسليحاتتاعى فراكتسياسىنىڭ باسشىسى, قازاقستان حالقى اسسامبلەيا­سىنىڭ مۇشەسى ۆ.گەينتستىڭ, Nur Otan پارتياسىنىڭ مۇشەسى, باتىس قازاقستان وبلىسى, ءبورلى اۋىلدىق وكرۋگىنىڭ اكىمى ءا.زاريفوۆتىڭ باياندامالارى تىڭدالدى.

ەلباسى پرەمەر-مينيستر مەن پارلامەنت ءماجىلىسى توراعاسىنىڭ باياندامالارىنان سوڭ بيلىكتىڭ اتقارۋشى جانە زاڭ شىعارۋشى تارماعى پارتيانىڭ سايلاۋالدى باعدارلاماسىن جۇزەگە اسىرۋدا ۇيلەسىمدى جۇمىس ىستەگەنىن ەرەكشە اتاپ ءوتتى. نۇرسۇلتان ­نازارباەۆ مەملەكەتىمىزدىڭ الدىندا تۇرعان سىن-قاتەرلەرگە, سونداي-اق پارتيانىڭ كەلەشەك ستراتەگيالىق ماقساتتارىنا جان-جاقتى توقتالدى.

«قازاقستان تاۋەلسىزدىكتىڭ ءتورتىنشى ونجىلدىعىنا قادام باسۋدا. بۇل اۋقىمدى وزگەرىستەرگە, قيىن دا جاۋاپ­تى شەشىمدەرگە تولى كەزەڭ بولارى انىق. قازىردىڭ وزىندە پاندەميانى توقتاتۋ قيىنعا سوعۋدا. بۇگىندە اۋقىمدى وزگەرىستەر بولىپ جاتىر. وعان اقپاراتتىق تەحنولوگيالار مەن جاسىل ەنەرگەتيكانىڭ قارقىندى ەنگىزىلۋى دە اسەر ەتۋدە» دەدى ەلباسى.

تۇڭعىش پرەزيدەنت ادامزات الدىندا تۇرعان بىرقاتار سىن-قاتەرلەردى اتاپ ءوتتى. سونىڭ ىشىندە جاڭا پاندەميالارعا قارسى كۇرەسكە, ەكولوگيالىق پروبلەمالار مەن جاھاندىق جىلىنۋدىڭ تەرىس اسەرىنىڭ كۇشەيۋىنە, الەمدىك ەكونوميكانىڭ وزگەرۋىنە وراي ەلدەردىڭ باسەكەگە قابىلەتتىلىگىنىڭ تومەندەۋىنە, گەوساياسي شيەلەنىستىڭ ورشۋىنە, سونداي-اق قوعامدىق پىكىر مەن قۇندىلىقتاردىڭ كۇرت وزگەرۋىنەن ساياسي الاۋىزدىق بەلەڭ الاتىنىنا نازار اۋداردى.

«جاھاندىق تۇراقسىزدىق ۇزاققا سوزىلۋى مۇمكىن. وسى ورايدا پارتيا­نىڭ سوڭعى پارلامەنت سايلاۋىنداعى «قيىندىقتى ەڭسەرىپ, جەڭىسكە بىرگە جەتەمىز!» دەگەن ۇرانىنىڭ وزەكتىلىگى ارتا تۇسۋدە. ءبىز بۇكىل قوعامنىڭ مۇددەسىن قورعايتىن تسەنتريستىك ۇستانىمدى ساقتاۋىمىز قاجەت ەكەنىن تاعى دا اتاپ وتكىم كەلىپ وتىر. پارتيانىڭ مىندەتى – حالىقتى ءبولىپ-جارۋ ەمەس, بىرىكتىرۋ» دەدى نۇرسۇلتان نازارباەۆ.

بىرلىكتى كورسەتەتىن قادام

ەلباسى پارتيا فراكتسياسى دەپۋتاتتارىنىڭ پاندەميا كەزىندەگى ءتيىمدى جۇمىسىنا توقتالىپ, بارشا قازاقستاندىقتار پرەزيدەنتتىڭ مەملەكەتتىك باعدارىن قولداپ, سونىڭ اياسىندا جۇمىلۋى ماڭىزدى ەكەنىنە باسا ءمان بەردى. «مەن پارتيامىزدىڭ نەگىزىن قالاپ, وعان وسى جىلدار ىشىندە باسشىلىق ەتتىم. Nur Otan پارتياسىن ەل پرەزيدەنتى باسقارىپ, ونىڭ ساياساتى مەن ستراتەگياسىن ءوزى ايقىنداپ وتىرۋى ماڭىزدى ەكەنىن جاقسى بىلەمىن. بۇعان دەيىن دە سولاي بولدى. ءبىز پارتيا جارعىسىنا سۇيەنە وتىرىپ, شەشىم قابىلداۋىمىز كەرەك. بۇل – ءبىزدىڭ بىرلىگىمىزدى كورسەتەتىن قادام» دەدى تۇڭعىش پرەزيدەنت.

نۇرسۇلتان نازارباەۆ مەملەكەتتىك باعداردىڭ ساباقتاستىعى مەن تۇراقتىلىعىنا نەگىز بولاتىن پارتيانىڭ ۇزاق مەرزىمدى كوشباسشىلىعىن قامتاماسىز ەتۋ ماڭىزدى ەكەنىنە نازار اۋداردى. ەلباسى اتاپ وتكەندەي, ول ءۇشىن Nur Otan پارتياسى ۇنەمى جاڭعىرىپ وتىرۋعا, زامان تالابىنا ساي ءارى وزگەرىستەرگە دايىن بولۋعا, حالىق مۇددەسىن باسشىلىققا الۋعا, الدىنا ايقىن ماقسات قويىپ, وعان جەتۋدىڭ ناقتى جولدارىن تابۋعا, بيلىك ورگاندارىنىڭ, قوعامدىق ينستيتۋتتاردىڭ ءتيىمدى ىقپالداستىعىن قامتاماسىز ەتۋگە ءتيىس, سونداي-اق قوعامدى پارتيا قۇندىلىقتارى توڭىرەگىنە بىرىكتىرۋى كەرەك.

«ءبىز تاۋەلسىزدىكتىڭ وتىز جىلدىعىن ايتۋلى جەتىستىكتەرمەن قارسى الىپ وتىرمىز. قۋاتتى ەلگە اينالىپ, بىرلىگى بەكەم قوعام قۇردىق. وتىز جىلدا 9,5 ميلليوننان استام ءسابي دۇنيەگە كەلدى. بۇل – كوزى اشىق, كوكىرەگى وياۋ, ساناسى ازات, ويى وزىق جاڭا بۋىن. مەملەكەتتىلىكتى ساقتاپ, «ماڭگىلىك ەل» جالپىۇلتتىق يدەياسىن اقيقاتقا اينالدىرۋ وسى ۇرپاقتىڭ تاريحي ميسسياسى دەپ سانايمىن» دەدى تۇڭعىش پرەزيدەنت.