بوكستان قازاقستان ۇلتتىق قۇراماسى بۇگىن يندونەزيا استاناسى دجاكارتا قالاسىندا وتەتىن ءحVىى جازعى ازيا ويىندارىنا اتتاندى. ەل نامىسىن قورعايتىن بىلعارى قولعاپ شەبەرلەرىن جۇزدەگەن جانكۇيەر نۇرسۇلتان نازارباەۆ حالىقارالىق اۋەجايىنان قوشەمەتپەن شىعارىپ سالدى.
تورتكۇل دۇنيەدە وتەتىن ءدۇبىرلى دودالاردان جۇلدەسىز قايتپايتىن بوكس قۇراماسىنىڭ ماقسات-مۇددەسى جايلى قازاقستان رەسپۋبليكاسىنىڭ بوكستان مەملەكەتتىك جاتتىقتىرۋشىسى بولات ابدراحمانوۆ اڭگىمەلەپ بەردى.
– بولات ۇكىبايۇلى, الدىمەن ءساتتى ساپار تىلەيمىز! ازيا ويىندارىنىڭ ماڭىزدىلىعىنا توقتالىپ وتسەڭىز.
– الدىمەن ءبىز دە گازەت ارقىلى بوكس دەسە ىشكەن اسىن جەرگە قوياتىن جانكۇيەرلەرىمىزگە ريزاشىلىعىمىزدى بىلدىرەمىز. ازيا ويىندارىن وسى ءبىزدىڭ ۇلكەن قۇرلىقتىڭ وليمپيادا ويىندارى دەسە بولادى. ءتورت جىلدا ءبىر وتەتىن بايراقتى جارىسقا بارلىق ەلدەر بارىن سالىپ دايىندالادى. ەڭ مىقتى سپورتشىلارىن اكەلەدى. بۇل رەتتە قازاقستان ۇلتتىق وليمپيادا كوميتەتىنىڭ باسشىسى تيمۋر قۇلىباەۆ مىرزا ءبىزدىڭ سپورتشىلاردىڭ جاقسى دايىندالىپ, ناتيجەلى ونەر كورسەتۋى ءۇشىن بارلىق جاعدايدى جاساۋدى تاپسىردى. ال ءبىز بولساق ءوز تاراپىمىزدان, ياعني بوكسشىلار قۇراماسى ەل قورجىنىنا كوبىرەك مەدال ءتۇسىرۋدى ماقسات ەتىپ وتىرمىز.
– ايبا كەلىسىمىمەن ازيا ويىندارىنا ەرلەر جارىسىنداعى ءۇش سالماق قاتىسپايتىن بولدى. بۇل ۇيعارىم بىزگە قانشالىقتى اسەر ەتۋى مۇمكىن؟
– ءبىز حالىقارالىق ۇيىمداردىڭ مۇشەسى بولعاندىقتان, مۇنداي شەشىمدەرگە قارسىلىق بىلدىرە المايمىز. ارينە, ءۇش سالماقتىڭ قاتىسپاۋى ءبىز ءۇشىن ۇلكەن پروبلەما تۋدىردى. ماسەلەن, نيازىمبەتوۆ تە, لەۆيت تە, قونقاباەۆ تا جۇلدەسىز قايتپايتىن ەدى دەپ ويلايمىن. دەگەنمەن باسقا بوكسشىلارىمىز دا جەرگە قاراتپايتىنىنا سەنىمدىمىن.
– ەسىمىزگە تۇسىرسەك, وسىعان دەيىنگى ازيا چەمپيوناتىندا ءبىزدىڭ قۇراما ءبىر-اق التىن الىپ, قالىڭ جانكۇيەردىڭ كوڭىلىن ءتۇسىرىپ العان ەدى. وسىنداي جاعداي قايتالانۋى مۇمكىن دەگەن قاۋىپ جوق پا؟
– ءبىز قاشاندا ازيادا ەشكىمگە جولدى بەرمەيتىن ەدىك. ەندى ءبىر جارىستا وسىنداي جاعداي ورىن الدى ەكەن دەپ ءتۇڭىلىپ كەتۋگە بولمايتىن شىعار. ءبىر جەردەن قاتەلىكتەر كەتۋى دە مۇمكىن عوي. ويتكەنى بۇل – سپورت. بىردە باپ شاپسا, بىردە باق شاۋىپ كەتەدى. ەڭ باستىسى, بۇگىنگى تاڭدا ۇلتتىق قۇرامانىڭ نەگىزى بىرتىندەپ وزگەرىپ, جاس بوكسشىلار قوسىلىپ جاتىر. بۇل جەردە ايتاتىن ءبىر جاي بار. ازيا بوكسى بۇرىنعىدان دا قارقىندى دامىپ بارادى.
– ۇلتتىق قۇرامانىڭ دايىندىعى قالاي ءوتتى؟
– جاقسى ءوتتى. ۇلتتىق وليمپيادا كوميتەتى, مادەنيەت جانە سپورت مينيسترلىگى جانە قازاقستان بوكس فەدەراتسياسى تاراپىنان جان-جاقتى قولداۋ جاسالدى. بوكسشىلارىمىز جىل باسىنان بەرى بىرنەشە حالىقارالىق جارىستارعا قاتىستى. سونداي-اق, انگليا, وزبەكستان, رەسەي, بەلارۋس بوكسشىلارىمەن بىرلەسكەن جاتتىعۋلار وتكىزدىك. وسىنىڭ ءبارى ءوز جەمىسىن بەرۋگە ءتيىس.
– دجاكارتا شارشى الاڭىندا ەل نامىسىن كىمدەر قورعايدى؟
– اتاقتى باپكەرىمىز مىرزاعالي ايتجانوۆتىڭ قۇرامىندا تەمىرتاس ءجۇسىپوۆ (49 كەلى), ازات ماحمەتوۆ (52 كەلى), قايرات ەراليەۆ (56 كەلى), ءساماتالي تولتاەۆ (60 كەلى), بەكداۋلەت يبراگيموۆ (64 كەلى), اسلانبەك شىمبەرگەنوۆ (69 كەلى) جانە ءابىلحان امانقۇل (75 كەلى) ونەر كورسەتەدى. ال ۆاديم پريسياجنيۋك باپتايتىن ايەلدەر بوكسىندا نازىم قىزايباي (51 كەلى), ءسانيا سۇلتانقىزى (57 كەلى) جانە ريمما ۆولوسەنكو (60 كەلى) شارشى الاڭعا شىعاتىن بولدى.
– ال ەندى التىن الاتىن بوكسشىلاردى اتاي الاسىز با؟
– جوق, اتامايمىن. وسى بوكسشىلاردىڭ بارىنە ءۇمىت ارتامىز. قازاق بوكسشىلارى الەمدىك جارىستاردان ەشقاشان قۇر الاقان قايتپاعان. بۇل جولى دا سولاي بولادى دەپ ويلايمىن. كورىڭىزدەر, سەنىڭىزدەر.
قازاقستان بوكسشىلارىنىڭ ازيا
ويىندارىنداعى كورسەتكىشتەرى
1998 جىل. بانگكوك, تايلاند.
ەرماحان يبرايىموۆ, 67 كەلى, التىن مەدال
مۇحتارحان دىلدابەكوۆ, + 91 كەلى, التىن مەدال
2002 جىل. پۋسان, وڭتۇستىك كورەيا.
نۇرجان كارىمجانوۆ, 60 كەلى, التىن مەدال
گەننادي گولوۆكين, 67 كەلى, التىن مەدال
2006 جىل. دوحا, كاتار.
باقىت سارسەكباەۆ, 69 كەلى, التىن مەدال
باقتيار ارتاەۆ, 75 كەلى, كۇمىس مەدال
مۇحتارحان دىلدابەكوۆ, + 91 كەلى, كۇمىس مەدال
گاليب دجافاروۆ, 57 كەلى, قولا مەدال
سەرىك ساپيەۆ, 64 كەلى, قولا مەدال
دميتري گوتفريد, 91 كەلى, قولا مەدال
2010 جىل. گۋانچجوۋ, قىتاي.
دانيار ەلەۋسىنوۆ, 64 كەلى, التىن مەدال
سەرىك ساپيەۆ, 69 كەلى, التىن مەدال
ءبىرجان جاقىپ, 49 كەلى, كۇمىس مەدال
يۆان دىچكو, + 91 كەلى, كۇمىس مەدال
دانابەك سۋجانوۆ, 75 كەلى, قولا مەدال
ايەلدەر بوكسىندا:
سايدا حاسەنوۆا, 57 كەلى, كۇمىس مەدال
2014 جىل. ينچحون , كورەيا.
ءىلياس سۇلەيمەنوۆ, 52 كەلى, التىن مەدال
دانيار ەلەۋسىنوۆ, 69 كەلى, التىن مەدال
جانىبەك ءالىمحانۇلى, 75 كەلى, التىن مەدال
ادىلبەك نيازىمبەتوۆ, 81 كەلى, التىن مەدال
انتون پينچۋك, 91 كەلى, التىن مەدال
يۆان دىچكو, +91 كەلى, التىن مەدال
ءبىرجان جاقىپ, 49 كەلى, كۇمىس مەدال
