گەنۋيادا 600 ادام ءۇيسىز قالدى
يتاليانىڭ گەنۋيا قالاسىندا اۆتوموبيل تراسساسىنداعى كوپىردىڭ قۇلاۋى سالدارىنان 600-دەن استام ادام باسپانالارىنان ايىرىلدى.
سوڭعى مالىمەتكە قاراعاندا, 632 ادام ءوز ۇيلەرىن تاستاپ شىققان. ولار 311 ءۇيدىڭ ادامدارى بولىپ تابىلادى. قالا باسشىلىعى ولاردى ۋاقىتشا باسپانالارعا ورنالاستىرعان.
اۆتوسترادا ۇستىندەگى ەكى ءجۇز مەترلىك وتكەل سەيسەنبى كۇنى ءتۇس الەتىندە قۇلادى. سول كەزدە كوپىردە 30 كولىك كەلە جاتقان. ناتيجەسىندە 39 ادام وقيعا ورنىندا قازا تاپقان. مۇندا ىزدەستىرۋ جۇمىستارى ءالى دە ءجۇرىپ جاتىر.
تۇركيا اقش تاۋارلارىنا سالىق سالدى
انكارا ۆاشينگتوننىڭ وزىنە جاساعان ارەكەتىنە قاراي جاۋاپ قايتارىپ, مۇحيتتىڭ ارعى بەتىنەن كەلەتىن 22 ءتۇرلى تاۋارعا باج سالىعىن سالدى.
ساۋدا ءمينيسترى رۋحسار پەكدجان حانىم سوڭعى كۇنى سالىق سانى تۋرا ەكى ەسەگە كوبەيتىلىپ, ولاردىڭ جالپى مولشەرى 533 ملن دوللارعا بارعانىن ايتتى. ول سونىمەن بىرگە اقش-تىڭ تۇركيا ءۇشىن جالعىز ساۋدا ارىپتەسى ەمەس ەكەنىن, ودان باسقا دا بايلانىستاعى ەلدەردىڭ بارشىلىعىن ءسوز ەتتى.
مۇنىڭ الدىندا انادولى قۇراما شتاتتاردىڭ ەلەكتروندى تاۋارلارىنا بويكوت جاريالاعان بولاتىن. بيلىك سونداي-اق ەندى امەريكانىڭ قۇرىلىس ماتەريالدارىنان دا باس تارتاتىندارىن مالىمدەدى. سارسەنبى كۇنى تۇرىك ليدەرى سول جاقتان كەلەتىن تەمەكى, الكوگول, اۆتوموبيل, كوسمەتيكا, كۇرىش جانە جەمىس-جيدەك سەكىلدى تاۋارلارعا دا تىيىم سالىنعالى جاتقانىن مالىمدەدى.
تۇرىكتەر بۇدان بولەك, اقش دوللارىنا دا بويكوت جاريالاماقشى. بۇل ورايدا ولار مۇنى رەسەي, قىتاي سەكىلدى ەلدەرمەن بىرگە جۇرگىزبەكشى.
وتىز مىڭ مۇعالىم شەرۋگە شىقتى
جاڭا زەلانديادا كەمىندە 30 مىڭ مۇعالىم شەرۋگە شىعىپ, وزدەرىنىڭ ايلىق جالاقىلارىن كوبەيتۋدى تالاپ ەتتى.
سوڭعى 24 جىلدان بەرى ءبىرىنشى رەت ۇيىمداستىرىلىپ وتىرعان شەرۋگە قاتىسۋشىلار قاتارىن باستاۋىش جانە ورتا مەكتەپتەردە ساباق بەرەتىن ۇستازدار قۇرادى. ولار سونىمەن قاتار باستاۋىش سىنىپتارداعى وقۋشىلار سانىن قىسقارتۋدى ۇسىنعان.
اقپارات قۇرالدارىنىڭ ءمالىمەتىنشە, ەرەۋىل بۇكىل ەلدەگى ءجۇزدەگەن مەكتەپتەردىڭ جابىلىپ قالىپ, 400 مىڭ وقۋشىنىڭ ساباقتارى وتپەي قالۋعا اپارىپ سوقتىرعان. اكتسيا وسىمەن توقتاتىلدى. ەگەر تالاپ ورىندالماسا, مۇعالىمدەر ەكى اپتادان كەيىن تاعى كوشەگە شىقپاقشى.
جاڭا زەلانديا ەلىندە وقۋشىلاردىڭ دەمالىسى قىس ايلارىندا بەرىلەدى.
