مەن تاۋەلسىزدىكتىڭ ءتول قۇرداسىمىن. 1991 جىلى دۇنيەگە كەلگەننەن كەيىن ۇلكەن جاۋاپكەرشىلىك بارىن سەزىنەمىن. سەبەبى ءبىز مەملەكەتپەن بىرگە ءوسىپ, وركەندەۋىمىز كەرەك. ال مەملەكەتتىڭ وركەندەۋىنە جاستاردىڭ قوسار ۇلەسى زور.
ۇلت ۇستازى احمەت بايتۇرسىنوۆ «بالام دەيتىن ەل بولماسا, ەلىم دەيتىن بالا قايدان بولماق؟» دەپ تەگىن ايتپاعان عوي. قازىرگى تاڭدا ەلىمىزدە جاستارعا بەرىلگەن مۇمكىندىكتەر جەتەرلىك. كاسىپ باستاۋعا ارنالعان, وقىپ, ءبىلىم-عىلىمنىڭ شىڭىنا شىعۋدى كوزدەگەندەرگە نەگىزدەلگەن مەملەكەتتىك باعدارلامالار كوپ-اق. وكىنىشكە قاراي, وسى مۇمكىندىكتى پايدالانا الماي جۇرگەندەر بار. مەنىڭشە, قازىرگى تاڭدا قازاق جاستارىنىڭ ءالسىز بولۋعا حاقى جوق. تاعى ءبىر ايتارىم, ەلگە بىردەڭە بەرمەس بۇرىن, ءار ادام ءوزىنىڭ باعىتىن ءبىلىپ, تۇلعا بولىپ قالىپتاسۋى شارت. ياعني اركىم وزىنەن باستاۋى كەرەك. ءوز باسىما كەلەر بولسام, مەنىڭ مەملەكەتكە بەرەرىم الدا. ازىرگە ءوزىمدى شىداۋ ۇستىندەمىن. قازىر جەكە كاسىبىمدى باستادىم. ياعني دەنساۋلىققا زيان كەلتىرەتىن سۋسىندار مەن وزگە دە دۇنيەلەردى ساتپايتىن انتي-كافە اشتىم. اللاعا شۇكىر, كاسىبىمنىڭ تاسى ورگە دومالاپ كەلەدى. بۇدان بولەك, مەملەكەتتىك باعدارلاما ارقىلى باسپانالى بولدىم. بايقاعانىمىزداي, ەڭبەك ەتىپ, بولاشاعىن جارقىن قىلۋدى ارماندايتىن جاستارعا ەلىمىزدە بارلىق جاعداي جاسالعان ءارى مۇمكىندىكتەر كوپ.
2016 جىلدىڭ 29 قىركۇيەگىندە تۇڭعىش پرەزيدەنت ن.نازارباەۆتىڭ قاتىسۋىمەن وتكەن القالى جيىنعا شاقىرتۋ الدىم. ول كەزدەسۋدە ەلدىك ماسەلەلەر قوزعالىپ, حالىقتىڭ ءال-احۋالى تۋرالى, جاستاردىڭ بولاشاعى جايىندا اڭگىمە بولعان ەدى. ەلباسى «اتقارىلىپ جاتقان ءىستىڭ ءبارى – بولاشاقتىڭ قامى. ەل ءىشى تىنىش, مەملەكەتىمىز وركەندەپ, دامىپ جاتىر. وسىدان كەيىن جاستارىمىزدىڭ جاعدايى نازارعا الىنىپ, ولارعا الەمنىڭ قاي ەلىنە بارىپ وقيمىن دەسە دە مۇمكىندىك تۋدىرىپ بەردىك. جاستار ەل ءۇشىن ايانباي ەڭبەك ەتەتىن بولسا, مەملەكەتىمىزدىڭ ەرتەڭى جارىق, بولاشاعى نىق بولادى» دەگەن بولاتىن.
قازاق ەلىنىڭ ەسىمىن الەمگە ايگىلەپ, تاۋەلسىز مەملەكەتىمىزدىڭ اياعىن نىق باسىپ, الەمدەگى الپاۋىت ەلدەرمەن تەرەزەسى تەڭ دارەجەدە تۇرۋىنا جاعداي جاساعان ەلباسى ەكەنىنە داۋ جوق. بۇگىندە بەيبىتشىلىكتىڭ بەسىگىندە تەربەلگەن قاسيەتتى وتانىمىزدا الاڭسىز بالا ءوسىرىپ, جانۇيامىزدى العا سۇيرەپ كەلەمىز. سوندىقتان بۇل كۇننىڭ ماڭىزى زور دەپ بىلەمىن.
سايات جۇسىپباەۆ,
جەكە كاسىپكەر
