ەلوردادا جاسىل جەلەكتەردى وتىرعىزۋ, كۇتىپ ۇستاۋ جانە قورعاۋ جونىندەگى ءىس-شارالاردىڭ جۇزەگە اسىرىلۋ تيىمدىلىگى تومەن. سونداي-اق ەكونوميكالىق تۇراقتىلىق پەن توتەنشە جاعداي رەجيمىن قامتاماسىز ەتۋ ءۇشىن داعدارىسقا قارسى شارالار شەڭبەرىندە بيۋدجەت قاراجاتىن ءتيىمدى پايدالانۋدا دا قاتەلىكتەر بار. وسى باعىتتا جۇرگىزىلگەن مەملەكەتتىك اۋديت قورىتىندىسى بويىنشا نۇر-سۇلتان قالاسىنىڭ قورشاعان ورتانى قورعاۋ جانە تابيعاتتى پايدالانۋ باسقارماسىنىڭ قىزمەتىندە جۇيەلى كەمشىلىكتەر انىقتالدى.
اتالعان باسقارما قالانى كوگالداندىرۋ ىسىندە جاسىل جەلەكتەردى كۇتىپ ۇستاۋ قاعيدالارىن جۇيەلى تۇردە بۇزىپ, كوگالداندىرىلعان اۋماقتاردى دامىتۋدى دەندرولوگيالىق جوسپارسىز ىسكە اسىرعان جانە جاسىل جەلەكتەردىڭ ءتىزىلىمىن جۇرگىزبەگەن. بۇل تۋرالى مەملەكەتتىك ءاۋديتتى جۇرگىزگەن نۇر-سۇلتان قالاسى بويىنشا تەكسەرۋ كوميسسياسى مالىمدەدى. جوعارىدا ايتىلعان قۇجاتتاردىڭ بولماۋىنان 2 898 612,5 تەڭگە كولەمىندە بيۋدجەت قاراجاتى ءتيىمسىز جوسپارلانعان. جاسىل جەلەكتەردىڭ ءتىزىلىمىن جۇرگىزبەۋ, سونداي-اق ولاردىڭ سانى, تۇرلەرى, جاي-كۇيى جانە باسقا دا سيپاتتامالارى بويىنشا ناقتى اقپاراتتاردىڭ بولماۋى كوگالداندىرۋعا بايلانىستى وپەراتسيالاردى كورسەتۋ كەزىندە بۋحگالتەرلىك ەسەپتە 7 797 998,2 تەڭگەگە دەيىن اۋىتقۋلارعا الىپ كەلدى.
– قالانى كوگالداندىرۋ جۇمىستارى اگروتەحنيكالىق شارالار مەن فيتوسانيتارلىق تەكسەرۋلەردى ساقتاماي جۇرگىزىلەدى. سونداي كەمشىلىكتەردىڭ ءبىرى جالپى سوماسى 20 610,5 تەڭگەگە كوپجىلدىق جاسىل جەلەكتەر تۇرىندەگى مەملەكەتتىك اكتيۆتەردى ءتيىمدى پايدالانباۋ بولىپ وتىر. كوگالداندىرۋ جۇمىستارىنىڭ باسىم بولىگى جويىلعان جاسىل جەلەكتەردىڭ ورنىنا وتەم رەتىندەگى اعاش وتىرعىزۋ ارقىلى جۇزەگە اسىرىلادى. بۇل رەتتە دە ءتيىستى دەڭگەيدە باقىلاۋ مەن جوسپارلاۋ جوق. سونىڭ سالدارىنان 9 708 جاسىل جەلەك وتەم رەتىندە وتىرعىزىلماعان. ودان باسقا, جالپى سانى 41 642 ءتۇپ اعاش, 9 576 ءتۇپ بۇتا, سونداي-اق 12155 قۋما مەتر شارباق تامىر جايماي, كەۋىپ قالعان, سودان كەيىن ولاردى قايتا وتىرعىزۋ جۇمىستارى جۇرگىزىلمەگەن جانە ەكى جىل ىشىندە ءتيىستى كۇتىم جاسالماعان, – دەيدى تەكسەرۋ كوميسسياسىنىڭ مۇشەسى ەگور لەبو.
ەكونوميكالىق تۇراقتىلىقتى جانە توتەنشە جاعداي رەجيمىن قامتاماسىز ەتۋ ءۇشىن داعدارىسقا قارسى شارالاردى ىسكە اسىرۋ جوسپارى بويىنشا جۇمىس ورىندارىن قۇرۋدا كەمشىلىكتەر بولعان. بيىل 1 تامىزداعى جاعداي بويىنشا مالىمەتتەرگە سايكەس جاڭادان قۇرىلعان جۇمىس ورىندارىنىڭ ناقتى سانى – 426, ال ول جوسپار بويىنشا 863 بولۋ كەرەك. ونىڭ ىشىندە حالىقتى جۇمىسپەن قامتۋ ورتالىعى ارقىلى جۇمىسقا ورنالاستىرىلعاندار – 138, ءوز بەتىنشە جۇمىسقا ورنالاستىرىلعاندار – 288 ادام.
اۋديت قورىتىندىسىندا جالپى سوماسى 7911 144,9 تەڭگەگە قارجىلىق بۇزۋشىلىقتار انىقتالىپ, بيۋدجەت قاراجاتىن ءتيىمسىز جوسپارلاۋ سوماسى 3 075 174,9 تەڭگەنى قۇرادى. سونىمەن قاتار 22 جۇيەلىك جانە 93 راسىمدىك بۇزۋشىلىق تىركەلدى. جەكەلەگەن فاكتىلەر بويىنشا ماتەريالدار اكىمشىلىك ءىس جۇرگىزۋدى قوزعاۋ ءۇشىن ۋاكىلەتتى ورگاندارعا, 1 فاكتى بويىنشا پروتسەسسۋالدىق شەشىم قابىلداۋ ءۇشىن نۇر-سۇلتان قالاسىنىڭ پروكۋراتۋراسىنا جىبەرىلدى. انىقتالعان كەمشىلىكتەردى جويۋ ءۇشىن تەكسەرۋ كوميسسياسى تاپسىرمالار مەن ۇسىنىمدار ازىرلەپ, اۋديت وبەكتىلەرىنە جولدادى.
