2006 جىلدىڭ كۇزىندە استانادا بەيبىتشىلىك جانە كەلىسىم سارايى بوي كوتەردى. بەلگىلى بريتاندىق ساۋلەتشى نورمان روبەرت فوستەردىڭ جوباسىمەن سالىنعان پيراميدا پىشىندەس عيماراتتىڭ ۇشار باسىن سۋرەتشى براين كلارك بەزەندىردى. وندا ەلىمىزدەگى بىرلىك پەن ىنتىماقتىڭ سيمۆولىنداي 130 كوگەرشىن بەينەلەنگەن.
سارايدىڭ اشىلۋ سالتاناتىنا اتاقتى وپەرا ءانشىسى, كلاسسيكالىق مۋزىكانىڭ جارىق جۇلدىزى مونسەررات كابالە قاتىسىپ, ءان سالدى. سودان بەرى دە سارايدا الەمگە ايگىلى تالاي تۇلعالار ونەر كورسەتتى. بۇگىندەرى بەيبىتشىلىك جانە كەلىسىم سارايى ەلوردانىڭ ماڭىزدى مادەني وشاعىنا اينالدى.
14 قازان كۇنى قازاقستان رەسپۋبليكاسى تاۋەلسىزدىگىنىڭ 25 جىلدىعى اياسىندا بەيبىتشىلىك جانە كەلىسىم سارايى 10 جىلدىق مەرەيتويىن كونتسەرتپەن اتاپ وتەدى. كەشتى سارايدىڭ «Pyramid Dance Group» شىعارماشىلىق بي ۇجىمى كوڭىلدى ميۋزيكلمەن اشادى. مەرەكەلىك شارادا سارايدىڭ تاريحىنان سىر شەرتەتىن تەاترلاندىرىلعان قويىلىم كورەرمەندەرگە ۇسىنىلادى.
ەرەكشە بارابان شوۋى كەشتىڭ قىزىعىن ارتتىرىپ, ەلوردا تۇرعىندارى مەن قوناقتارىنا جاعىمدى كوڭىل-كۇي سىيلاماق. سونداي-اق, ەتنومادەني بىرلەستىكتەردىڭ كوركەمونەرپازدارى مەرەيتويعا ورتاقتاسادى. ولاردىڭ اراسىندا بەلارۋس, ارميان, وزبەك, سلاۆيان جانە ۋكراين ەتنومادەني بىرلەستىكتەرىنىڭ وكىلدەرى بولادى.
مەرەكەلىك كەشتىڭ ارنايى قوناعى – رەسەي ەستراداسىنداعى تانىمال «پيتستسا» توبى بەلگىلى كومپوزيتسيالارىن ورىندايدى.
كونتسەرت ساعات 19.30-دا باستالادى.
