پارلامەنت سەناتىنىڭ بيۋرو مۇشەلەرى 2021 جىلعى 11 قاراشاعا جوسپارلانعان پالاتا وتىرىسىنىڭ كۇن ءتارتىبىن بەكىتتى. سەنات دەپۋتاتتارى كەزەكتى وتىرىستا «قازاقستان رەسپۋبليكاسى جوعارعى سوتىنىڭ سۋدياسى قىزمەتىنە سايلاۋ تۋرالى» قازاقستان رەسپۋبليكاسى پرەزيدەنتىنىڭ ۇسىنىمدارىن قاراۋدى جوسپارلاپ وتىر.
سونداي-اق «2004 جىلعى 22 جەلتوقسانداعى قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» عارىش ايلاعىندا «بايتەرەك» عارىش زىمىران كەشەنىن قۇرۋ تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى دا تالقىلاناتىن بولدى.
سەناتتىڭ الداعى وتىرىسىنىڭ كۇن تارتىبىنە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك باسقارۋ دەڭگەيلەرى اراسىندا وكىلەتتىكتەردى قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكىنشى وقىلىمدا قاراۋعا ەنگىزىلدى. زاڭ جوباسى مەملەكەتتىك ورگانداردىڭ دەربەستىگىن جانە ءتيىستى جاۋاپكەرشىلىگىن ارتتىرۋعا مۇمكىندىك بەرەدى. ول قابىلداعاننان كەيىن بىرقاتار مينيسترلىكتەرگە قوسىمشا فۋنكتسيالار بەرىلەدى. بيۋرو مۇشەلەرى سونىمەن قاتار ماجىلىستەن بۇرىن كەلىپ تۇسكەن «قازاقستان رەسپۋبليكاسى تاۋەلسىزدىگىنىڭ وتىز جىلدىعىنا بايلانىستى راقىمشىلىق جاساۋ تۋرالى» زاڭ جوباسىن كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنە پىسىقتاۋعا بەردى.
