شاعىن جانە ورتا بيزنەس استانا قالاسىندا قارقىندى دامىپ, رەسپۋبليكا بويىنشا ءبىرىنشى ورىندا تۇر
بۇگىندە ەلوردادا بيزنەس باستايمىن دەگەن ءاربىر ادامعا قولداۋدىڭ ءتۇر-ءتۇرى بار. قارجىسى جەتپەي قولى بايلانىپ جۇرگەندەرگە تومەن پايىزبەن نەسيە بەرىلسە, مۇمكىندىگى بولا تۇرا كاسىپ باستاۋعا تاۋەكەل ەتە الماي جۇرگەن جاندارعا دا جول اشىق. ارنايى ترەنينگتەرگە قاتىسىپ, قىسقا مەرزىمدى وقىتۋ كۋرستارىنان وتۋگە بولادى. ول ءۇشىن تەك جاقسى بيزنەس-يدەياڭىز بولسا جەتىپ جاتىر.
وسى ماقساتتا استانا اكىمدىگى «بيزنەستىڭ جول كارتاسى – 2020» باعدارلاماسى اياسىندا نەسيەلىك جانە باسقا دا قارجىلىق قولداۋلار كورسەتۋگە نەگىزدەلگەن باعدارلامالاردى قولعا الىپ وتىرعانى بەلگىلى. سونىڭ ىشىندە جاس بۋىنعا قولداۋ باعىتىندا قولعا الىنعان «Astana-ZhasStarT» باعدارلاماسىن ايتۋعا بولادى. بۇل باعدارلاماعا 29 جاسقا دەيىنگى جاس كاسىپكەرلەر قاتىسىپ, 7 پايىزدىق ۇستەمەمەن 20 ملن تەڭگەگە دەيىن نەسيە الۋعا بولادى. باعدارلاما بارىسىندا نەگىزىنەن فرانشيزا تارتۋعا, ريتەيلدىك, ياعني, سۋپەرماركەتتەر, گيپەرماركەتتەر جەلىلەرىن, قوعامدىق تاماقتانۋ پۋنكتتەرىن دامىتۋعا جانە مودەرنيزاتسيالاۋعا ارنالعان جوبالاردى قارجىلاندىرۋعا باسىمدىق بەرىلەدى. اتالمىش باعدارلاما «بولاشاق» قاۋىمداستىعى مەن «دامۋ» قورى اراسىنداعى ارنايى مەموراندۋم نەگىزىندە ىسكە اسىرىلىپ وتىر. «بيزنەستىڭ جول كارتاسى – 2020» باعدارلاماسى اياسىندا قولعا الىنعان بەس-التى جىلدىڭ ىشىندە بارلىعى 500-دەن استام جوبا ماقۇلداندى. تەك وتكەن جىلدىڭ وزىندە عانا 11,9 ملرد تەڭگەنىڭ 67 جوباسى قولداۋعا يە بولدى. ال نەسيەلەرگە جارتىلاي كەپىلدىك بەرۋ بويىنشا جالپى كەپىل سوماسىنىڭ ءوزى 4 ملرد تەڭگەگە جۋىقتاپ قالدى. ونىڭ 1,1 ملرد تەڭگەنى قۇرايتىن 35 جوباسى بىلتىر ماقۇلداندى. سونىمەن قاتار, كۇنى-بۇگىنگە دەيىن قارجىلىق كولەمى 60 ملن تەڭگە شاماسىندا 20 گرانتتىق جوبا قابىلداندى. سونىڭ بەسەۋى, ياعني, 15 ملن تەڭگەسى وتكەن جىلعى كورسەتكىشتىڭ ۇلەسىندە» دەيدى استانا قالالىق كاسىپكەرلىك جانە ونەركاسىپ باسقارماسى كاسىپكەرلىكتى دامىتۋ ءبولىمىنىڭ باستىعى نۇرگۇل نازاروۆا.
ۇلتتىق بانكتىڭ مالىمەتتەرى بويىنشا, 2016 جىلدىڭ قاڭتار-ناۋرىز ايلارىنىڭ وزىندە عانا استانا قالاسىنىڭ ەكونوميكاسىنا دەپ جالپى كولەمى 242,6 ملرد تەڭگە نەسيە بەرىلىپتى. ونىڭ 118,8 ملرد تەڭگەسى شاعىن جانە ورتا بيزنەس وكىلدەرىنە باعىتتالىپ وتىر.
وسىنداي جان-جاقتى قولداۋدىڭ ارقاسىندا ەلوردامىزداعى شاعىن جانە ورتا بيزنەس نىساندارىنىڭ سانى ءبىرشاما ارتىپ, 105 مىڭعا جۋىقتاپ وتىر. بۇلاردىڭ 70 مىڭنان استامى – جەكە كاسىپكەر, 27 مىڭى – زاڭدى تۇلعا رەتىندە تىركەلگەندەر. قالعاندارى – جەكە شارۋا قوجالىقتارى. شاعىن جانە ورتا بيزنەس سەكتورىنداعى قوسىمشا قۇننىڭ جيىنتىق ۇلەسى قالا ەكونوميكاسىنىڭ جالپى كولەمىنىڭ 62 پايىزىنا جەتىپ وتىر.
وسىلايشا استانا قالاسى وڭىرلىك جالپى ءونىمىنىڭ كولەمى 4 ترلن 560 ملرد تەڭگەگە جەتىپ, ءوسىم قارقىنى بويىنشا ەل اۋماعىندا ءبىرىنشى بولىپ تۇر. 2020 جىلعا قاراي بۇل كورسەتكىش 80,5 پايىزدى قۇرايدى دەپ كۇتىلىپ وتىر. اتالمىش بيزنەس وكىلدەرى تەك وتكەن جىلدىڭ وزىندە عانا 3 215,8 ملرد تەڭگەنىڭ تاۋارىن ءوندىرىپ, قالا بيۋدجەتىنە 399,48 ملرد تەڭگە كولەمىندە كىرىس كىرگىزگەن. بارلىعى 287,74 مىڭ ادامدى جۇمىسپەن قامتىپ وتىر.
استانا قالاسى كاسىپكەرلىك جانە ونەركاسىپ باسقارماسىنىڭ مالىمەتىنە قاراعاندا, ەلوردادا وتكەن جىلدىڭ سوڭعى بىرنەشە ايدىڭ وزىندە عانا شاعىن جانە ورتا بيزنەس سالاسىندا 7 مىڭنان استام جۇمىس ورنى اشىلعان ەكەن.
بۇركىت نۇراسىل
