قۇرىلىسى قارقىندى قالا
ەلوردانىڭ قۇرىلىسى ەشقاشان باسەڭدەگەن ەمەس. قالا حالقىنىڭ سانى كوبەيگەن سايىن قىزمەت كورسەتۋ دە ارتا بەرەدى. بالاباقشا, مەكتەپ, ەمحانا جەتىسپەۋشىلىگىن جويۋ ماقساتىندا قولعا الىنعان قۇرىلىس جوبالارىنىڭ ءالى كۇنگە دەيىن جالعاسۋى – سونىڭ دالەلى.
تۇرعىن ءۇي سالۋ توقتامايدى
بيىل استانا قالاسىندا بارلىق قارجىلاندىرۋ كوزدەرى ەسەبىنەن جالپى اۋدانى 964 254 شارشى مەتردى قۇرايتىن 8 564 پاتەر پايدالانۋعا بەرىلدى, بۇل وتكەن جىلدىڭ سايكەس كەزەڭىمەن سالىستىرعاندا 25,8 پايىزعا ارتىق.
جاسىراتىنى جوق, كۇيىپ تۇرعان ماسەلەنىڭ ءبىرى – باسپانا. باس قالادا باسپاناسىز تۇرعىندار كوپ. مەملەكەتتىك قوردان تۇرعىن ءۇي الۋعا مۇقتاج جانداردىڭ قاتارى 40 مىڭنان اسادى. الايدا ونى شەشۋدىڭ جولدارى قالا ءبيلىگىنىڭ نازارىنان تىس قالعان ەمەس. بيىل «2008-2010 جىلدارعا ارنالعان تۇرعىن ءۇي قۇرىلىسىن دامىتۋ» باعدارلاماسى بويىنشا قالعان وبەكتىلەردىڭ قۇرىلىسىن اياقتاۋ جوسپاردا بار. ياعني, سارايشىق كوشەسى مەن جۇماباەۆ داڭعىلىنىڭ قيىلىسىندا ورىن تەپكەن جالپى اۋدانى 21,8 مىڭ شارشى مەتر بولاتىن 310 پاتەر جانە ءتىلەنديەۆ داڭعىلىنداعى كوپ پاتەرلى تۇرعىن ءۇي كەشەنى. وسى نىساندار ۋاقىتىلى تاپسىرىلسا, مىڭداعان ادام قونىس تويىن تويلايتىن بولادى.
ەلوردالىقتاردىڭ يگىلىگىنە اينالعان بايىپتى باعدارلامانىڭ تاعى ءبىرى – ايماقتاردى دامىتۋدىڭ 2020 جىلعا دەيىنگى جوباسى. باعدارلامانى جۇزەگە اسىرۋ باستالعالى بەرى قالالىق باسقارما جالپى اۋدانى 192,2 مىڭ شارشى مەتر بولاتىن 3 653 پاتەرلىك 15 تۇرعىن ءۇي كەشەنىن پايدالانۋعا بەرگەن.
ءدال قازىرگى تاڭدا باعدارلاما شەڭبەرىندە جالپى اۋدانى 46,3 مىڭ شارشى مەتر بولاتىن 803 پاتەردىڭ قۇرىلىسى جۇرگىزىلۋدە.
بالاباقشا بوي كوتەرەدى
باس قالانىڭ بۇلدىرشىندەرى ءۇشىن بالاباقشا ماسەلەسى جىل سايىن شەشىمىن تاۋىپ كەلەدى. بەكىتىلگەن «بالاپان» باعدارلاماسى اياسىندا وتكەن جىلى 2200 ورىنعا ارنالعان 9 بالاباقشانىڭ قۇرىلىسى اياقتالعان بولاتىن. بۇل – ۇلكەن جەتىستىك. قالاداعى بالاباقشا قۇرىلىسى مۇنىمەن توقتامايدى. بيىل دا جاڭا بالاباقشالار بوي كوتەرەدى. قۇرىلىس باسقارماسىنىڭ ءمالىمەتىنە سۇيەنسەك, ناۋرىز ايىنا قاراي «كوكتال-2» اۋدانىندا تاۋلىك بويى جۇمىس ىستەيتىن 240 ورىندىق مەكتەپكە دەيىنگى ساناتوريالىق مەكەمە مەن №8 «ريابينكا» بالاباقشاسىنا جاپسارلاس سالىنعان 60 ورىندىق عيمارات ىسكە قوسىلادى.
اۋەلگى كەزەكتە الەۋمەتتىك نىساندار
قالا اكىمدىگى الەۋمەتتىك نىسانداردىڭ جەتىسپەۋشىلىگىن حالىقتىڭ كوپتىگىمەن تىكەلەي بايلانىستىرادى. استانالىقتاردىڭ سانى ارتقان سايىن ولارعا كورسەتەتىن قىزمەت ساپاسى دا جاقسى بولۋى ءتيىس.
بارشاعا بەلگىلى, كەزىندە مەكتەپ وقۋشىلارى ءۇش اۋىسىممەن دە وقىدى. قۋانتاتىنى, بۇل ماسەلە دە ءوز شەشىمىن تاۋىپ, ارتتا قالدى. بىلتىردىڭ وزىندە 4700 ورىنعا ارنالعان جالپى ءبىلىم بەرەتىن 4 مەكتەپتىڭ قۇرىلىسى اياقتالعان بولاتىن.
مامان پىكىرى
- ەربول بايساماتوۆ, استانا قالاسى قۇرىلىس باسقارماسىنىڭ ۇيىمداستىرۋ-باقىلاۋ ءبولىمىنىڭ باسشىسى:
– بيىل 600 ورىندىق جالپى ءبىلىم بەرەتىن مەكتەپ, 800 ورىندىق ەكى كاسىپتىك تەحنيكالىق مەكتەپ جانە 375 ورىندىق كوررەكتسيالىق مەكتەپ-ينتەرنات اشىلادى. بۇدان بولەك, وسى جىلى №16, 32, 37 مەكتەپتەرگە ءارقايسىسى 525 ورىندىق جاپسارلاس عيمارات سالىنادى. دەنساۋلىق ساقتاۋ نىساندارىنىڭ ىشىندە «جەلەزنودوروجنىي» تۇرعىن الابىنىڭ سولتۇستىك-شىعىسىندا ورنالاسقان 500 ورىندىق تۋبەركۋلەزگە قارسى ديسپانسەردىڭ قۇرىلىسى اياقتالادى دەپ كۇتىلۋدە. سونداي-اق, سوت-پسيحياتريا ساراپتاماسىنىڭ عيماراتى تولىقتاي اياقتالىپ, كۇنىنە 274 شاقىرۋ قابىلدايتىن جەدەل مەديتسينالىق ءجاردەم ستانتسياسىن سالۋ جۇمىسى جالعاسادى.
قۇرىلىس ونەركاسىبى قالاي دامۋدا؟
قالا قۇرىلىسى تۋرالى ايتقاندا, قۇرىلىس ونەركاسىبى تۋرالى ايتپاسقا بولماس. ەلورداداعى قارقىندى جۇمىستار كەزىندە قۇرىلىس ماتەريالدارىنا دەگەن سۇرانىستى ارتتىرعان ەدى. ماسەلەن, قالا قۇرىلىسىنا قاجەتتى تسەمەنت اقتاۋ مەن وسكەمەننەن, كىرپىش – سەمەي, پاۆلودار, قاراعاندىدان, ءمارمار تاس, ارلەۋ ماتەريالدارى الماتى جانە جامبىل وبلىستارىنداعى كەنىشتەردەن جەتكىزىلەتىن. كوبىنە سەمەي, قاراعاندى, الماتى زاۋىتتارىنان شىقان بۇيىمدار مەن جابدىقتار پايدالانىلدى. ال, عيماراتتىڭ سىرتقى قاپتاۋىشى, جىلۋ وتكىزبەيتىن جانە جابىن ماتەريالدار سىرتتان اكەلىندى.
بۇگىندە استانادا قۇرىلىس يندۋسترياسى قانات جايدى. وسى سالاداعى كاسىپورىنداردىڭ سانى ءبىرشاما ارتتى. قۇرىلىس ماتەريالدارى ءوندىرىسىنىڭ دامۋىندا وڭ وزگەرىستەر بار. بەتون, كىرپىش, اعاشتان جانە تەمىردەن جاسالعان بۇيىمدار وزىمىزدە دە وندىرىلەدى.
ەلوردالىق ستاتيستيكا دەپارتامەنتىنىڭ مالىمەتىنە سۇيەنسەك, 2016 جىلدىڭ قاڭتار-مامىر ايلارى ارالىعىندا قۇرىلىس يندۋسترياسى كاسىپورىندارىندا مەتالل ەسىكتەر مەن ەسىك بوساعالارى, تەرەزە جانە ونىڭ جاقتاۋلارى 190,3 پايىز, قۇرىلىس ەرىتىندىلەرى 150,7 پايىز ءوسىمدى قۇراعان. سونىمەن قاتار, پلاستماسسادان جاسالعان ەسىك-تەرەزەلەر, قوراپتار, تسەمەنتتەن جاسالعان بۇيىمدار, قۇرىلىس ءۇشىن جاساندى تاستان جاسالعان ەلەمەنتتەر, بولاتتان جاسالعان سەندۆيچ-پانەلدەر, جوعارى قىسىمدى ترۋبالار جانە مەتالل كونسترۋكتسيالارىن وندىرۋدەگى جەتكەن جەتىستىكتەر قۋانتادى. ءبىر سوزبەن ايتقاندا, استانادا قۇرىلىس ماتەريالدارىن شىعارۋدا الەمدىك ستاندارتقا سايكەس كەلەتىن جاڭا تەحنولوگيانى ەنگىزۋ جانە قۇرىلىس ماتەريالدارىنىڭ جاڭا تۇرلەرىن ءوندىرۋ جولىنداعى يگى قادامدار جالعاسىن تابا بەرمەك.
گۇلميرا ايماعانبەت