پرەزيدەنتتىككە كانديدات جيگۋلي دايراباەۆ پانفيلوۆ اۋدانىنداعى «ەرنار» شارۋا قوجالىعىنا بارىپ, كاسىپورىن ۇجىمىمەن كەزدەستى. ءوز سوزىندە جيگۋلي دايراباەۆ كاسىپورىننىڭ زاماناۋي تەحنولوگيالاردى بەلسەندى قولداناتىنىن ەرەكشە اتاپ ءوتتى.
ۇمىتكەر سوڭعى جىلدارى الەمدە سۋ رەسۋرستارىنىڭ تاپشىلىعى ەرەكشە الاڭداۋشىلىق تۋعىزىپ وتىرعانىنا توقتالدى. حالىق سانى ۇلعايىپ, ونەركاسىپ پەن اۋىل شارۋاشىلىعى قارقىندى دامۋدا. بۇل ءوز كەزەگىندە سۋدى پايدالانۋدىڭ كولەمىن ارتتىرىپ وتىر.
«ءبىز جاڭا تەحنولوگيالار مەن تسيفرلاندىرۋ ارقىلى سۋدى ۇنەمدەۋگە كوشۋىمىز كەرەك. سۋ تاپشىلىعىن جويۋدىڭ باسقا جولى جوق. بۇل – اسا ماڭىزدى مىندەت. سۋارۋدىڭ سۋ ۇنەمدەۋ تەحنولوگيالارىن تولىق كولەمدە ەنگىزۋ سۋ شىعىنىن ازايتىپ, ونىمدىلىكتى ارتتىرا وتىرىپ, سۋارمالى جەرلەردى ۇتىمدى پايدالانۋعا مۇمكىندىك بەرەدى» دەدى ج.دايراباەۆ.
بۇگىندە اگروسەكتور سالاسىنا تامشىلاپ سۋارۋ ءادىسىن ەنگىزۋدىڭ تيىمدىلىگى وراسان. ءادىستى قولدانۋ كەزىندە تىڭايتقىشتار مەن قۇنارلى زاتتار جوعالىپ كەتپەيدى. ياعني نەسىبەسىن جەردەن تاباتىن ديقاندار ءۇشىن وتە قولايلى.
«تامشىلاپ سۋارۋ ءادىسى ءشولدى جانە شولەيتتى جەرلەردى يگىلىككە جاراتىپ, باۋ-باقشا ەگۋ, جىلىجايلار سالىپ, ءونىم الۋعا جاقسى مۇمكىندىك بەرەدى. اۋىل شارۋاشىلىعى سالاسىنا باعىتتالعان سۋبسيديا كولەمىن ۇلعايتۋ جانە ليزينگتىك كومپانيالارعا قولداۋ كورسەتۋىمىز قاجەت» دەدى ۇمىتكەر.
ءوز كەزەگىندە «ەرنار» شارۋا قوجالىعىنىڭ باسشىسى ولجاس جاپارقۇلوۆ كانديداتقا جانە «اۋىل» پارتياسىنىڭ وكىلدەرىنە العىسىن ءبىلدىردى.
سونىمەن قاتار جيگۋلي دايراباەۆ جاركەنت قالاسىنىڭ تۇرعىندارىمەن كەزدەسىپ, سۇراقتارىنا جاۋاپ بەردى. كوپشىلىكتى اسىرەسە قىتاي ەلىمەن ىنتىماقتاستىق ماسەلەسى قىزىقتىردى. كانديدات كورشىلەس مەملەكەتتەرمەن ءاردايىم دوستىق قارىم-قاتىناستا بولۋ ماڭىزدى ەكەنىن اتاپ ءوتتى.
