الماتىدا پرەزيدەنتتىككە كانديدات سالتانات تۇرسىنبەكوۆا زياتكەرلىك مەنشىكتى قورعاۋ ماسەلەلەرى بويىنشا كەڭەس وتكىزدى.
«الەمدەگى جاعداي وزگەرۋدە. قوعامنىڭ وركەندەۋىنىڭ ەڭ ۇلكەن قۇندىلىعىن قازىر تابيعي رەسۋرستار, مۇناي مەن گاز كەن ورىندارى جاسامايدى. ەڭ كوپ ناتيجەنى ءبىلىم ەكونوميكاسى بەرەدى: جاڭا تەحنولوگيالار, نوۋ-حاۋ, زياتكەرلىك مەنشىك جانە تاعى باسقالارى» دەپ اتاپ ءوتتى قۇقىق قورعاۋشى.
ونىڭ پىكىرىنشە, قازاقستاندا زياتكەرلىك مەنشىكتى قورعاۋ ءىس جۇزىندە جۇمىس ىستەمەيدى.
«ادامدار بارىنە قول سۇعۋعا كوشكەن. اسىرەسە الەۋمەتتىك جەلىدە جاريالانعان ماتىندەر, فوتوسۋرەتتەر, فيلمدەر, مۋزىكا مەن كىتاپتاردىڭ اينالاسىندا قۇقىق بۇزۋشىلار كوپ. امەريكا قۇراما شتاتتارىندا نەمەسە ەۋروپادا اعىندىق پلاتفورمالار ءۇشىن تولەم جاسامايىنشا نەمەسە فيلم بيلەتىن ساتىپ الۋعا بارمايىنشا, مۋزىكا تىڭداۋ نەمەسە فيلم كورۋ مۇمكىن ەمەس. قازاقستاندا كونتەنت ءۇشىن اقشا تولەۋ ۇيات دەپ ەسەپتەلەدى. قۇقىق قورعاۋ ءۇشىن سوتقا جۇگىنۋ مادەنيەتى جوق. ماسەلەن, ميكروتولقىندى پەش ۇرلاعانى ءۇشىن ادام تۇرمەگە تۇسسە, ونەر تۋىندىسىن ۇرلاعانى ءۇشىن جازادان قۇتىلا الادى. سوندىقتان ءبىر نارسەنى ۇرلاۋ – ۇيات, ال اقىل-وي ەڭبەگىنىڭ ءونىمىن سۇراماي-اق تارتىپ الۋ قالىپتى جاعداي بولىپ كەتكەن» دەدى س.تۇرسىنبەكوۆا.
ۇمىتكەر ءوز سوزىندە تەحنولوگيا ۇرلىعى تۋرالى دا ايتتى.
«قازاقستاندا ساراپتاما ينستيتۋتى جوق, سايكەسىنشە, تەحنولوگيانىڭ نەمەسە ءونىمنىڭ ناقتى كىمگە تيەسىلى ەكەنىن انىقتاي الاتىن ماماندار دا از. كىم ءبىرىنشى بولدى, كىم اۆتور, كىم زاڭسىز يەلەنۋشى ەكەنىن انىقتاۋ قيىن. زاڭدار بار, سونىمەن قاتار, وسى ماسەلەلەرمەن اينالىساتىن مەملەكەتتىك ۇيىمدار دا بار. الايدا ءىس جۇزىندە ەشقانداي ناتيجە بەرمەي جاتىر» دەپ اتاپ ءوتتى ول.
